جەكە جاتتىعۋلاردىڭ فينالدارىنا ۇزدىك سەگىز سپورتشىدان شىعادى. ىرىكتەۋ سايىسىندا 202 سپورتشى باقتارىن سىناپ كوردى.
الەم چەمپيوناتىنىڭ العاشقى جارىس كۇنىندە ونەر كورسەتكەن ناريمان كۋربانوۆ ات سناريادىنداعى جاتتىعۋى ءۇشىن 14.466 ۇپاي ەنشىلەپ, ءبىرىنشى كۇننىڭ قورىتىندىسى بويىنشا كوش باستاعان ەدى. ىرىكتەۋ كەزەڭىنىڭ ەكىنشى كۇنىندە دە ناريمان ۇزاق ۋاقىت ءبىرىنشى ورىندا كەلە جاتتى. تەك جارىس كۇنىنىڭ سوڭىندا عانا وسى سناريادتا ەكى دۇركىن وليمپيادا چەمپيونى, 2017 جىلعى الەم چەمپيوناتىنىڭ جەڭىمپازى اتانعان بريتاندىق ماكس ۋيتلوك (14.966) پەن 2017 جىلعى الەم چەمپيونى, وسى جىلعى ازيا ويىندارىندا توپ جارعان قىتايلىق سياو جوتەندى (14.633) العا جىبەرىپ قويدى.
«ىرىكتەۋدە ات سناريادىندا ەكى دۇركىن وليمپيادا چەمپيونى, الەم چەمپيونى جانە كوپسايىس بويىنشا الەم چەمپيونىنان كەيىن ءۇشىنشى ورىن العانىما وتە قۋانىشتىمىن. دەنە قىزدىرىپ جاتقان كەزدە قاتتى قوبالجۋ بولدى. بىراق سناريادقا كەلىپ, ونەر كورسەتكەن كەزدە قوبالجۋ باسىلىپ, ءوز كومبيناتسيامدى جاساپ شىقتى. ءمىنسىز ورىندادىم دەپ ايتا المايمىن. دەگەنمەن, فينالعا شىقتىم», دەيدى ناريمان كۋربانوۆ.
ايتا كەتەيىك, وتكەن جىلعى مونرەالداعى الەم چەمپيوناتىندا ناريمان ات سناريادىندا جاڭا كۇردەلى ەلەمەنتتى ورىنداعاننان كەيىن حالىقارالىق گيمناستيكا فەدەراتسياسى وعان سپورتشىنىڭ ەسىمىن بەرىپ, The Kurbanov دەپ اتاعان ەدى. سول كەزدە ناريمان كۋربانوۆ ات سناريادىنىڭ ىرىكتەۋ سىنىندا 54-ءشى ورىن العان ەدى.
«مەن ءوز كومبيناتسيامدا ءوزىمنىڭ اتىممەن اتالعان ەلەمەنتتى مىندەتتى تۇردە جاسايمىن. بىراق, جارىسقا شىعار الدىندا ءبىر ەلەمەنتتى الىپ تاستادىم. دۇرىس شەشىم بولدى دەپ ويلايمىن. وسى الەم چەمپيوناتىندا ەشكىم مەنىڭ ەلەمەنتىمدى قايتالاي المادى. بىراق جاتتىعۋ كەزىندە سپورتشىلاردىڭ جاساپ جۇرگەن بەينەروليكتەردى كوردىم», دەيدى قازاقستاندىق سپورتشى.
وسى چەمپيوناتتا ەل نامىسىن ناريمانمەن بىرگە ميلاد كاريمي, ەربول جانتىقوۆ, ءىلياس ءازيزوۆ پەن اكىم مۇساەۆ قورعاپ جاتىر. جالپى ءبىزدىڭ گيمناستشىلارىمىز 239.291 ۇپاي جيناپ, ىرىكتەۋدەن كەيىن ۇزدىك جيىرما قۇرامانىڭ قاتارىنا ىلىكتى. ءبىزدىڭ كوماندا 46 قۇرامانىڭ ىشىندە 16-شى ورىندا.
«مەنىڭ ماقساتىم ۇلتتىق قۇراماعا ۇزدىك جيىرما ءتورت كوماندانىڭ ىشىنە كىرۋ جانە جەكەلەي سىندا فينالدا شىعۋ بولدى. ارينە, ىرىكتەۋدەن ءساتتى وتكەننەن كەيىن مەدالعا تالاسىپ كورەم. ەڭ باستىسى فينالدا قوبالجىماي ونەر كورسەتۋىم كەرەك», دەدى سپورتشى.
ناريمان كۋربانوۆتىڭ فينالى قاراشانىڭ 2-دە وتەدى. ەرتەڭ قازاقستاننىڭ ايەلدەر قۇراماسى جارىس جولىنا شىعادى. ەلىمىزدىڭ اتىنان ايدا باۋىرجانوۆا مەن ەكاتەرينوي چۋيكينا ونەر كورسەتەدى. سپورتتىق گيمناستيكادان دوحادا ءوتىپ جاتقان الەم چەمپيوناتى قاراشانىڭ 3-ءى كۇنى اياقتالادى.
