ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا جۇمىس كۇشى كوپ ايماقتاردان وڭىرگە بيىل 348 وتباسى كوشىپ كەلدى. جىل اياعىنا دەيىن تاعى 60 وتباسى قونىس اۋدارادى. قىزىلجار اۋدانىندا تۇرعىندارمەن وتكەن كەزدەسۋدە ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا قونىستانۋشىلاردى جۇمىسقا ورنالاستىرۋ, جايلى باسپانامەن قامتۋ, باسقا دا الەۋمەتتىك جاعدايلاردى جاساۋ باعىتىندا جەرگىلىكتى جەردە اتقارىلىپ جاتقان شارالارعا وڭ باعا بەردى.
«كەلەسى جىلى سولتۇستىك قازاقستان وبلىسىندا قولجەتىمدى تۇرعىن ءۇي قاناتقاقتى جوباسى ىسكە قوسىلادى. ول بويىنشا ءار باسپانانى سالۋعا 6 ميلليون تەڭگە مولشەرىندە قاراجات ءبولۋ, كەيىن جەكەمەنشىككە ساتۋ جولدارى قاراستىرىلعان. كۇنگەيدەن كوشىپ كەلۋشىلەر اراسىندا بىلىكتى ماماندار از ەمەس. تەرىسكەيدە دارىگەر, مۇعالىم كادرلار جەتىسپەيدى. كەلەشەكتە وسىنداي ولقىلىقتاردىڭ ورنى تولتىرىلادى», دەدى مينيستر.
ساپار بارىسىندا ول «احمۋددينوۆ» شارۋا قوجالىعىنىڭ جۇمىسىمەن تانىستى. شارۋاشىلىق ديرەكتورى سەرمۇحامەد ورال ۇلى اعاشتى قالدىقسىز وڭدەۋمەن اينالىساتىندارىن, وڭتۇستىكتەن كەلگەن 9 ازامات جۇمىس ىستەيتىنىن, 70 ادامنىڭ جۇمىسپەن قامتاماسىز ەتىلگەنىن, ورتاشا جالاقى 150 مىڭ تەڭگەنى قۇرايتىنىن, الداعى ۋاقىتتا 40 ادامدىق جاڭا جۇمىس ورنى قۇرىلاتىنىن جەتكىزدى. سوڭعى بەس جىلدا قوجالىق ەسەبىنەن 12 باسپانا تۇرعىزىلىپتى.
پەتروپاۆل الەۋمەتتىك قىزمەت كورسەتۋ ورتالىعىندا 300 ناۋقاسقا قىزمەت كورسەتىلەدى. ولاردىڭ 23-ءى ءى توپتاعى مۇگەدەكتەر. مەكەمەدە پسيحولوگتار بار, ارنايى سەنسورلى كابينەت جۇمىس ىستەيدى. ۇجىممەن كەزدەسكەن مينيستر قويىلعان سۇراقتارعا جاۋاپ بەرىپ, جولداۋدان تۋىندايتىن اۋقىمدى مىندەتتەرگە بايلانىستى كەلەشەكتە اتقارىلاتىن ءىس-جوسپارلارمەن ءبولىستى. قالا اكىمىنىڭ ورىنباسارى ەۆگەني گلوتوۆ زاماناۋي ءۇش مەكتەپتىڭ قۇرىلىسى باستالعانىن, بۇل ماقسات ءۇشىن 50 ميلليارد تەڭگە قاراجات بولىنگەنىن, 6 مىڭنان استام قىزمەتكەردىڭ جالاقىسى كوبەيىپ, 13 مىڭ ادام سالىقتان بوساتىلاتىنىن جەتكىزدى. «بيزنەستىڭ جول كارتاسى-2020» باعدارلاماسى شەڭبەرىندە 41 جوبا قولداۋ تاپتى. كەلەسى جىلى كاسىپكەرلەردى سۋبسيديالاۋ مولشەرى 3 ەسە ارتتىرىلادى», دەدى ول.
اقپاراتتىق-ناسيحاتتىق توپتىڭ مۇشەلەرى ەڭبەك ۇجىمدارىندا وتكەن كەزدەسۋ-جۇزدەسۋلەردە مۇعالىم بەدەلىن كوتەرۋ, العاشقى مەديتسينالىق-سانيتارلىق قىزمەت كورسەتەتىن قىزمەتكەرلەردى ىنتالاندىرۋ, ساپالى ءارى قولجەتىمدى تۇرعىن ۇيلەر سالۋ, سىبايلاس جەمقورلىققا قارسى بەلسەندى جۇمىستى كۇشەيتۋ, تاعى باسقا باعىتتار جايلى كەڭىنەن اڭگىمەلەنىپ, حالىقتى ەلباسى تاپسىرمالارىن بىرلەسىپ اتقارۋعا شاقىردى. جارقىن باستامالاردىڭ ودان ءارى جالعاساتىنىنا سەندىردى
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
