ەۋروپامەن سەرىكتەستىكتىڭ جاڭا بەلەسى
ەلباسىنىڭ بەلگيا بيزنەس وكىلدەرىمەن كەزدەسۋى تۋرالى جازعان ازەربايجاننىڭ Azernews اقپاراتتىق اگەنتتىگى ن.نازارباەۆتىڭ شەتەلدەن ينۆەستيتسيا تارتۋ جوسپارىنا توقتالعان.
«قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ بەلگيادا وتكەن ەۋروپا كاسىپكەرلەرىمەن كەزدەسۋىندە ەۋروپا مەملەكەتتەرىنىڭ قازاقستاننىڭ ساۋدا, ەكونوميكا, ينۆەستيتسياداعى ماڭىزدى سەرىكتەستەرى ەكەنىن ايتىپ ءوتتى. قازاقستان ەۋروپا وداعىنىڭ ورتالىق ازياعا ارنالعان جاڭا ارىپتەستىك ستراتەگياسىنىڭ مۇشەسى. ەۋروپا وداعى قازاقستاننىڭ ۇلكەن ساۋدا-ەكونوميكالىق سەرىكتەسى. قازاقستان نەگىزىنەن ەۋرووداققا ەنەرگيا ەكسپورتتايدى. ال ەۋرووداقتان ماشينا, ترانسپورت جابدىقتارى جانە حيميالىق زاتتار يمپورتتايدى», دەلىنگەن ازەربايجان گازەتىندە.
اقپاراتتا ەۋروپادان قازاقستانعا 180 ميلليارد اقش دوللارىنان كوپ تىكەلەي ينۆەستيتسيا تارتىلىپ, ەۋروپا قايتا قۇرۋ جانە دامۋ بانكى جالپى قۇنى 7 ميلليارد ەۋرو بولاتىن بىرنەشە جوبانى قارجىلاندىرعانى تۋرالى ايتىلعان. سونداي-اق ەۋروپالىق «الستوم», «ليندە گرۋپ», «ەر ليكيد», «دانون», «ۆيكات», «حايدەلبەرگتسەمەنت» كومپانيالارىمەن سەرىكتەستىك جايى دا قوزعالعان.
مازمۇندى ديالوگ قاي كەزدە دە ماڭىزدى
The London post گازەتى ەلباسى نۇرسۇلتان نازارباەۆتىڭ «ازيا-ەۋروپا» فورۋمىنىڭ ءحىى سامميتىندە سويلەگەن سوزىنە توقتالىپ, الەمنىڭ تابىستى ديالوگ پەن ءوزارا تۇسىنىستىككە قول جەتكىزۋى ماڭىزدى ەكەنىن اتاپ وتكەن.
گازەتتىڭ باس رەداكتورى شاحيد كۋرەشي ەلباسىنىڭ ويلارىمەن كەلىسەتىنىن ايتا كەلىپ: «نۇرسۇلتان نازارباەۆتىڭ ۇلتتار اراسىندا ماردىمدى ديالوگ پەن كەلىسسوزدەر قۇرىلماسا, وتكەن عاسىرداعى قاقتىعىستارعا قايتىپ ورالۋ قاۋپى بار» دەۋى وتە ورىندى. ويتكەنى ۇلتتار اراسىنداعى مازمۇندى بايلانىس قاي كەزدە دە ماڭىزدى بولدى. وتكەن جۇزجىلدىقتاعى كونفرونتاتسيانى بولدىرماۋىمىز ءۇشىن ناتيجەلى كەلىسسوزدەرگە تىرىسۋىمىز كەرەك», دەيدى ءوز ماقالاسىندا.
ادامزات الدىنداعى جاۋاپكەرشىلىكتى سەزىنۋگە شاقىردى
مۋلتيمەديالىق جاڭالىقتاردىڭ ەۋروپالىق پلاتفورماسى eureporter قازاننىڭ 21 كۇنى جاريالاعان «قازاقستان پرەزيدەنتى اسەم سامميتىندە كوزقاراسىن ءبىلدىردى» اتتى ماقالادا ن.نازارباەۆتىڭ سامميتتە نەگىزگى بايانداماشىلاردىڭ ءبىرى بولعانىن اتاپ كورسەتكەن.
«كوشباسشىلار ساۋدا جانە ينۆەستيتسيالار, بايلانىس, ورنىقتى دامۋ مەن كليمات, تەرروريزم, كيبەرقاۋىپسىزدىك جانە رەتتەلمەگەن كوشى-قون سياقتى اۋقىمى كەڭ ماسەلەلەر بويىنشا ەكى قۇرلىق اراسىندا ديالوگ پەن ارىپتەستىكتى نىعايتۋعا تىرىستى.
ولار ساۋدا-ساتتىقتى ۇلعايتۋ, قاۋىپسىزدىكتى جاقسارتۋ, قورشاعان ورتانى قورعاۋ جانە قوعامداردى جاقىنداستىرۋ ماقساتىندا ەكى قۇرلىق اراسىن بۇرىنعىدان دا بايلانىستىرۋعا كەلىستى.
ولاردىڭ اراسىندا ءسامميتتىڭ نەگىزگى باياندامالارىنىڭ ءبىرىن جاساعان قازاقستان پرەزيدەنتى نۇرسۇلتان نازارباەۆ تا بولدى» دەپ جازدى.
بۇدان ءارى اقپارات قۇرالى «پرەزيدەنت نازارباەۆ اقش, رەسەي, قىتاي جانە ەو سياقتى الپاۋىت ويىنشىلاردى ادامزات الدىنداعى جاۋاپكەرشىلىكتى سەزىنۋگە جانە حالىقارالىق شيەلەنىستەردى شەشۋدىڭ جولىن ىزدەۋگە شاقىردى.
سونىمەن قاتار, اقش, رەسەي, قىتاي ەلدەرىنىڭ, سونداي-اق ەۋروپا وداعىنىڭ باسشىلارىن ديالوگقا شاقىرىپ, وزەكتى پروبلەمالاردى تالقىلاۋ ءۇشىن استانا الاڭىن پايدالانۋدى ۇسىندى» دەپ تارقاتادى.
وزەكتى حالىقارالىق ماسەلەلەر تۋرالى سۇحبات بەردى
ەۋروپا ساياساتىنا نەگىزدەلگەن Euractive مەديا-پلاتفورماسى رەسمي سايتىندا اقپارات قۇرالىنىڭ باس رەداكتورى گەورگي گوتەۆتىڭ ەلباسىمەن سۇحباتىن جاريالادى. قازاقستان مەن ەۋروپا ەلدەرىنىڭ سەرىكتەستىگى, ينۆەستيتسيالىق جوبالارى, ەكونوميكالىق دامۋى تۋرالى سۇحباتتا اۋعانستانداعى جاعداي دا نازاردان تىس قالماعان. پرەزيدەنت اۋعانستانداعى جاعدايدى وڭالتۋ باعىتىندا قازاقستاننىڭ قولداۋىمەن اتقارىلىپ جاتقان تەرروريزم مەن ەكسترەميزمگە قارسى ءىس-شارالار تۋرالى ايتىپ وتكەن. سونىمەن قاتار قازاقستاننىڭ بۇۇ قاۋىپسىزدىك كەڭەسىندەگى مۇشەلىگى, سىرتقى ساياسي جوسپارى تۋرالى وي بولىسكەن.
بۇدان ءارى ەلباسى 2018 جىلعى 28 قىركۇيەكتە بۇۇ باس اسسامبلەياسىنىڭ 73-ءشى سەسسياسىندا بۇۇ-عا مۇشە 70-تەن استام مەملەكەت قازاقستان باستاماسىن قولداپ, تەرروريزم مەن ازات الەمگە قول جەتكىزۋ مىنەز-ق ۇلىق كودەكسىنە قول قويعانىن اتاپ وتكەن. سونداي-اق ەلىمىزدىڭ حالىقارالىق بەيبىتشىلىك پەن قاۋىپسىزدىكتى قولداۋ ماقساتىندا بەلسەندى جۇمىس اتقارىپ, كۇن تارتىبىندەگى بارلىق ماسەلەلەردى جۇزەگە اسىرۋعا قولداۋ كورسەتۋگە نيەتتى ەكەنىن اتاپ وتكەن.
دايىنداعان
سۆەتلانا عالىمجانقىزى,
«ەگەمەن قازاقستان»
