قازان ايىنىڭ 19 كۇنى پولشانىڭ باس قالاسى ۆارشاۆا شاھارى ءتۋريزمنىڭ شىنايى ورتالىعىنا اينالىپ شىعا كەلدى. ونىڭ سەبەبى سول كۇنى ۆارشاۆاداعى «Ptak Warsaw Expo» كورمە جانە كونگرەسس ورتالىعىندا «World Travel Show» حالىقارالىق تۋريستىك جارمەڭكەسى ءوز جۇمىسىن باستاعان بولاتىن. وسى ورايدا ءىرى ماسشتابتاعى ءىس-شارالاردى وتكىزۋگە ارنايى سالىنعان اتالعان نىساننىڭ ورتالىق ەۋروپاداعى ەڭ ۇلكەن كورمە كەشەنى ەكەندىگىن ايتۋعا ءتيىسپىز. شارتاراپتان جينالعان جۇزدەگەن تۋروپەراتوردىڭ, تۋريزم سالاسىنا قاجەتتى تاۋار وندىرۋشىلەردىڭ باسىن قوسقان جارمەڭكە «جەرگىلىكتى جانە شەتەلدىك تۋريستىك سالونى», «Camper&Caravan» (اۆتوۇيلەر) جانە «ۆارشاۆا ياحتا» سالوندارى قۇرىلىمىندا جۇمىس جاساۋدا.
پولشا تاراپىنىڭ «World Travel Show» حالىقارالىق تۋريستىك جارمەڭكەسىن ۇدايى وتكىزۋى كەزدەيسوقتىق ەمەس. سەبەبى ەۋروپانىڭ ورتالىعىندا ورنالاسقان بۇل مەملەكەت تۋريزم سالاسىن قارقىندى دامىتۋ باعىتىندا كوپ جۇمىس اتقارۋدا. قازىر پولشادا تۋريزم يندۋسترياسى قالىپتاسقان دەپ ايتۋعا تولىق نەگىز بار. ەلدىڭ اتالمىش سالاداعى قۇزىرلى سپورت جانە تۋريزم مينيسترلىگىنىڭ كەلتىرگەن رەسمي مالىمەتىنە سايكەس, بۇگىندە مەملەكەتتەگى ءىجو-ءنىڭ 6%-ى تۋريزم سالاسىنىڭ ۇلەسىنە تيەدى ەكەن. ول دەگەنىمىز – جۇزدەگەن مىڭ جۇمىس ورىندارى.
بيىل تۋريستىك سالادا وزىندىك ورنى بار, ءتورتىنشى رەت وتكىزىلىپ وتىرعان وسى جارمەڭكەدە قازاقستان پاۆيلونى اشىلىپ, شاراعا قاتىسۋشىلار اراسىندا ۇلكەن قىزىعۋشىلىق تۋعىزدى.
ەلىمىزدىڭ پاۆيلونىنا ارنايى كەلگەن پولشا رەسپۋبليكاسىنىڭ سپورت جانە تۋريزم ءمينيسترى ۆيتولد بانكا قازاقستاننىڭ پولشاداعى توتەنشە جانە وكىلەتتى ەلشىسى مارعۇلان بايمۇحانمەن بىرگە ونىڭ لەنتاسىن قيۋ راسىمىندە ۇلتتىق تاعامدارىمىزدان ءدام تاتا وتىرىپ, پاۆيلون جۇمىسىمەن تانىستى.
«قازاق تۋريزم» ۇلتتىق كومپانياسىنىڭ ۇيىمداستىرۋىمەن جانە قازاقستاننىڭ پولشاداعى ەلشىلىگىنىڭ قولداۋىمەن جۇمىسىن باستاعان وتاندىق پاۆيلوننىڭ تۇپكىلىكتى ماقساتى – ايتۋلى حالىقارالىق شارا اياسىندا ەلىمىزدىڭ تۋريستىك الەۋەتىن شەتەلدىكتەرگە كەشەندى تانىستىرۋ, كەلەشەكتە مەملەكەتىمىزگە تۋريستەر لەگىن كوبىرەك تارتۋ.
«World Travel Show» حالىقارالىق تۋريستىك جارمەڭكەسىنىڭ كورنەكتى جەرلەرىنىڭ بىرىندە ورىن تەپكەن قازاقستان پاۆيلونىندا پولشامەن, جالپى ەۋروپا ەلدەرىمەن تىعىز جۇمىس جاساسىپ كەلە جاتقان 5 تۋريستىك وپەراتور كەلۋشىلەرگە ءوز قىزمەتتەرىن تانىستىرۋدا.
قازاقستان ءۇشىن ەۋروپالىق, ونىڭ ىشىندە پولياك تۋريستەرىنىڭ كوپتەپ كەلۋى اسا ماڭىزدى. ەلىمىزدىڭ پولشاداعى توتەنشە جانە وكىلەتتى ەلشىسى مارعۇلان بايمۇحان مىرزا ەلباسىنىڭ وتاندىق تۋريزم سالاسىنىڭ دامۋىنا ايرىقشا نازار اۋدارىپ وتىرعانىن اتاپ ءوتىپ, قازىرگى ۋاقىتتا سالادا ۇلكەن سەرپىلىستىڭ بار ەكەنىن ءسوز ەتتى. ەلشىنىڭ سوزىنە قاراعاندا, وتكەن جىلى ەلىمىزگە كەلۋشى پولياك ازاماتتارى ءۇشىن ۆيزالىق رەجىمنىڭ الىپ تاستالۋى بۇگىندە وڭ ناتيجەسىن بەرۋدە. وسى جىلدىڭ ءبىرىنشى جارتىجىلدىعىندا وتكەن جىلدىڭ مەجەلى ۋاقىتىمەن سالىستىرعاندا ەلىمىزگە كەلۋشى پولياك تۋريستەرىنىڭ سانى 27%-عا ارتقان. سونىمەن قاتار ەۋروپا قۇرلىعىنان كەلگەن تۋريستەردىڭ ۇشتەن ءبىر بولىگىن پولياك تۋريستەرى قۇراعان ەكەن.
شارا اياسىندا قازاقستاننىڭ تۋريستىك پاۆيلونىن تاماشالاۋشىلار ءبىر ساتكە دە ۇزىلمەدى. كەلۋشىلەر اراسىندا وقۋشى جانە ستۋدەنت جاستاردى, نەمەرەسىن ەرتكەن زەينەتتەگى كەيۋانانى, شەتەلدىك تۋريستىك فيرمالار وكىلدەرى مەن جۋرناليستەر بولدى. جيىن بارىسىندا سولاردىڭ بىرقاتارىن سوزگە تارتتىق.
تسەزارى رۋدجينسكي, ارداگەر جۋرناليست: مەن ءومىر بويى ساياحاتتاپ كەلە جاتقان جانمىن. قازاقستان – ۇلكەن مەملەكەت. سىزدەردىڭ ەلدەرىڭىزدىڭ تۋريستىك الەۋەتى زور. ەلدەرىڭىزدە زاڭعار بيىك تاۋلار دا, ۇش-قيىرى جوق جازىق دالا دا بار. سونىمەن قاتار سىزدەردە تۋريستەر ءۇشىن قىزىقتى بولاتىن جەرلەر جەتىپ-ارتىلادى. وسى ورايدا قازاقستان تاراپىنىڭ مۇنداي شارالارعا قاتىسىپ, ءوز تۋريستىك مۇمكىندىكتەرىن تانىستىرۋى اسا قاجەت دەپ بىلەمىن.
مەچيسلاۆ لاپانوۆسكي, «REMIX S.A.» كومپانياسى باسشىسىنىڭ كەڭەسشىسى: مەن ءوز ءومىرىمنىڭ بەس جىلىن قازاقستاندا وتكىزگەن اداممىن. مەملەكەتتەرىڭىز ءتۇرلى بەلدەۋلەر ۇيلەسكەن, تاماشا قايتالانباس تابيعاتى بار ەل. بىراق ەۋروپالىق تۋريستەر ءۇشىن باستىسى جەرگىلىكتى حالىق, ولاردىڭ ۇلتتىق مادەنيەتى مەن سالت-داستۇرلەرى قىزىقتى بولماق. وسى ورايدا سىزدەردە قازىرگى ەۋروپادا سيرەك كەزدەستىرەتىن بەرىك وتباسىلىق قۇندىلىقتار جاقسى ساقتالعان. قازاقستاندا ءبىر رەت بولعان ادام ونى استە ەسىنەن شىعارمايدى, ۇنەمى قايتا بولۋعا اڭسارى اۋىپ تۇرادى.
تۋريستىك جارمەڭكە اياسىندا ەلىمىزدىڭ تۋريستىك الەۋەتىن تانىستىرۋدان وزگە «قازاق تۋريزم» ۇلتتىق كومپانياسى مەن پولياك تۋريستىك ۇيىمى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. اتالعان كەلىسىم قوس مەملەكەتتىڭ تۋريزم سالاسىن ۇيلەستىرۋشى ورتالىق مەكەمەلەرىنە ءوزارا اقپارات جانە تاجىريبە الماسۋ, بىرلەسكەن ءىس-شارالار وتكىزۋ, مامانداردى وقىتۋ مەن بىلىكتىلىگىن ارتتىرۋ سىندى تىڭ مۇمكىندىكتەر بەرمەك.
جاندوس اۋەلبەك ۇلى,
«ەگەمەن قازاقستان»
پولشا
