مۋزەي قورىنداعى قۇندى جادىگەرلەر نەگىزىندە شىعارىلعان البوم - كاتالوگتار «تۇركىستان جازيراسىنىڭ قىش ىدىستارى» مەن «زەرگەرلىك بۇيىمدار توپتاماسى», «ازىرەت سۇلتان» قورىق - مۋزەيىنىڭ 40 جىلدىق دامۋ تاريحىنداعى مۇراعاتتار قامتىلعان «40 جىلدىق البوم», سونداي-اق ءار كەزەڭدە حاتقا تۇسكەن, ەل اۋزىندا ايتىلىپ جۇرگەن اڭىز - ءافسانالاردان جيناقتالعان «100 اڭىز» جانە «جەتپىس حيكمەت» كىتابىنىڭ لاتىن الىپبيىندەگى نۇسقاسى تاريحي مۇرا بولىپ قالاندى.
تاريحى مەن قاسيەتى تەرەڭ تۇركىستان مەن قوجا احمەت ياسساۋي بابامىزدىڭ مۇرالارىن ۇرپاق بالاسىنا ماڭگىلىككە ساقتاپ, ناسيحاتتاۋعا ارنالعان «ازىرەت سۇلتان» قورىق - مۋزەيىندەگى جادىگەرلەر سانى قازىرگى تاڭدا 25000-عا جۋىقتادى. قۇندى دۇنيەلەردى جيناقتاپ, ساقتاۋعا كەشەگى جانە بۇگىنگى ءاربىر مۋزەي قىزمەتكەرلەرى مەن مادەنيەت جاناشىرلارىنىڭ, ارحەولوگ, تاريحشىلاردىڭ ۇلەسى زور. ومىردەن وتكەن مۋزەي مايتالماندارى مەن جاناشىر تۇلعالارىنىڭ ارۋاعىنا ارقاشان باس ءيىپ, تاعزىم ەتەمىز», دەدى «ازىرەت سۇلتان» مەملەكەتتىك تاريحي-مادەني قورىق - مۋزەيىنىڭ ديرەكتورى احمەتجانوۆ نۇربولات قادىر ۇلى.
قازاقستان رەسپۋبليكاسىنىڭ ەلورداسى – استانا قالاسىنىڭ 20 جىلدىعىنا جانە «ازىرەت سۇلتان» مەملەكەتتىك تاريحي-مادەني قورىق - مۋزەيىنىڭ 40 جىلدىعى اياسىندا « ۇلى جىبەك جولى بويىنداعى ورتاعاسىرلىق قالالار» حالىقارالىق عىلىمي-پراكتيكالىق كونفەرەنتسياسى ءوتىپ, وزبەكستان, تۇركيا, ءازىربايجان, ۋكراينا ەلدەرىمەن قاتار قازاقستاننىڭ تۇكپىر-تۇكپىرىنەن كەلگەن وتاندىق عالىمدار مەن مۋزەي ءىسىنىڭ ماماندارى قاتىستى.
كونفەرەنتسيادا تۇركىستان جازيراسىندا ورتاعاسىرلىق قونىستار, قالالار مەن استانالار, ۇلى جىبەك جولى جانە ورتاعاسىرلىق قالالارداعى عىلىم مەن مادەنيەت, شەتەلدىك زەرتتەۋشىلەر مەن ساياحاتشىلار ەڭبەكتەرىندەگى ورتاعاسىرلىق قالالار, رۋحاني جاڭعىرۋ: مۋزەي ءىسى جانە ەسكەرتكىشتەردى قورعاۋ ماسەلەلەرى مەن تاريحي-مادەني تۋريزم جانە ونى دامىتۋ جولدارى مەن باعىتتارى جونىندە قازاق, تۇرىك, ورىس جانە اعىلشىن تىلدەرىندە كەڭەستەر الماسىپ, تالداندى.
كونفەرەنتسيا اياسىندا مادەنيەت جانە سپورت ءمينيسترى ارىستانبەك مۇحامەدي ۇلى مەن تۇركىستان وبلىسىنىڭ اكىمى ج. قانسەيىت ۇلىنىڭ ارنايى قۇتتىقتاۋلارى وقىلىپ, العىس حاتتارى تابىستالدى. سونىمەن قاتار, مۋزەي سالاسىن دامىتۋعا ەڭبەك سىڭىرگەن باسشىلار مەن قىزمەتكەرلەر «ازىرەت سۇلتان» قورىق - مۋزەيىنىڭ 40 جىلدىعى مەدالىمەن ماراپاتتالدى.
