اباي عازيز ۇلىن تورعاي, قوستاناي كولەمىندە بىلمەيتىن ادام جوق. جاستايىنان ءوزىنىڭ ولمەس ونەرىمەن تانىلعان ا.ءامىرحانوۆ ەسىمى ونىڭ تالانتىن قۇرمەتتەگەن ۇلكەن-كىشىگە جاقسى تانىس. ول كەزىندە قوستانايداعى "ميراس" ءانسامبلىن ۇيىمداستىرىپ, ۇلتتىق ونەردى ناسيحاتتاۋعا ەرەكشە ۇلەس قوستى. كەيىن استانا قالاسىنا قىزمەتكە اۋىسىپ, سونداعى "سارىارقا" انسامبلىنە جەتەكشىلىك ەتتى. استانا قالالىق فيلارمونياسىن باسقاردى.
اباي تۇركى تىلدەس جاستاردىڭ باسىن بىرىكتىرىپ, "ورال مۇڭى" حالىقارالىق فەستيۆال-باياۋىن ۇيىمداستىرۋشىلاردىڭ ءبىرى بولعان ەدى. ەكى جىلدا ءبىر رەت باشقۇرتستاننىڭ ۋفا قالاسىندا وتەتىن بۇل ونەر جارىسىنا قىرعىزستان, تۇركىمەنستان, قازاقستان, التاي رەسپۋبليكاسى, شەشەنستان, داعىستان, حاكاسيا, تۋۆا, تاتارستان, باشقۇرتستان جانە باسقا ەلدەردەن ۇلتتىق ونەر مايتالماندارى جينالىپ, دۋمان قىزدىراتىن. ابايدىڭ "ميراسى" سول الامان بايگەدەن جۇلدەلى ورالعان ەدى.
«ەگەر اباي بولماسا, «ميراس» بولماس ەدى. بۇگىن اباي ءىنىمىزدىڭ, مەنىڭ ەڭ جاقسى كورەتىن دوسىمنىڭ ارۋاعى ءبىر اۋناپ تۇسكەن شىعار. بۇگىنگى كەشتى ۇيىمداستىرىپ وتىرعان وبلىستىق فيلارمونيا مەن قالالىق مادەنيەت بولىمىنە, «ميراس» مادەنيەت ۇيىنە العىسىم شەكسىز, – دەيدى قر كومپوزيتورلار وداعىنىڭ مۇشەسى قاليبەك دەرىپسالدين.
فەستيۆالدە ءار اۋداننان كەلگەن ونەر ۇجىمدارى قازاقتىڭ كۇيلەرىن اسقاقتاتتى. سونداي-اق, حالىقارالىق بايقاۋلاردىڭ جۇلدەگەرلەرى ماناپبەك قادىروۆ, ازامات مۇقاتوۆ, كۇنسۇلۋ جاقاەۆا, قىدىربەك قيىسقان, بوتاگوز دۇبىرباەۆا, بايدوس قوجاساعيەۆ, نۇرسۇلتان قاسىم ت.ب انشىلەر حالىق اندەرىن, قازاق كومپوزيتورلارىنىڭ اندەرىن اۋەلەتە شىرقادى.
قىسقاسى, «عاسىرلار پەرنەسى» فەستيۆالى قازاقتىڭ اباي ءامىرحانوۆتاي ونەرپاز ۇلىنا جاسالعان تاعزىم ءارى جاس ۇرپاق بويىنا سىڭىرە جۇرەر تاعىلىمدى باسقوسۋ بولدى.
ءنازيرا جارىمبەت,
«ەگەمەن قازاقستان»
قوستاناي
سۋرەتتى تۇسىرگەن نۇرلان سەيدەعالي
