جاقىندا ءوزىمىز تۇراتىن دەنيسوۆ ستانساسىنا «سالاماتتى قازاقستان» اتتى دەنساۋلىق پويىزى كەلدى. كەنت, جاقىن ماڭداعى اۋىلدار تۇرعىندارى جاپا-تارماعاي بارىپ كورىندى. پويىز دەگەنى بولماسا, كادىمگى كوشپەلى ەمحانا سەكىلدى. ىشىندە ات سابىلتىپ اۋدان, وبلىس ورتالىعىنداعى اۋرۋحانالارعا ىزدەپ بارىپ كورىنەتىن مەديتسينالىق جاڭا ۇلگىدەگى جابدىقتاردىڭ بارلىعى بار. دارىگەرلەر مەن مەدبيكەلەر جىلى قارسى الىپ, قۇراق ۇشىپ, مەديتسينالىق تەكسەرۋلەردىڭ بارلىعىنان وتكىزەدى. مەنىڭ ءبىرازدان بەرى دەنساۋلىعىم سىر بەرىپ, مازام بولماي جۇرگەن. اۋىلدا تۇرعان سوڭ, كۇندەلىكتى شارۋامەن كەيدە دەر ۋاقىتىندا دارىگەرگە جۇگىرۋگە ءمۇمكىندىك بولا بەرمەيتىنى جاسىرىن ەمەس.
كەزەگىم كەلگەن سوڭ مەن دە ءدارىگەردىڭ الدىنا كىردىم. كارديولوگ ءدارىگەر قاراعان سوڭ, ماعان: «ءسىزدىڭ ناۋقاسىڭىز جەدەل ەمدەۋدى تالاپ ەتەدى. قازىر اۋرۋحاناعا جەتكىزەمىز. وندا باراتىنىڭىزدى وتباسىڭىزعا حابارلاپ ايتىپ قويىڭىز, قورىقپاسىن, ەمدەلىپ شىعاسىز», دەدى. ءسال كەشىككەنىمدە, جۇرەك تالماسىنان قۇلايتىنداي جاعدايدا ەكەنمىن. «جەدەل جاردەم» قىزمەتىن شاقىردى دا, ءدارىگەرلەر مەنى تەز ارادا اۋداندىق اۋرۋحاناعا جەتكىزدى. سول جەردە جۇرەگىمە ەم الىپ, وتباسىما ءتاۋىر بولىپ ورالدىم.
اجالدان امان قالعان ادامنىڭ كوڭىل-كۇيىن اركىم تۇسىنەر دەپ بىلەمىن. وسى پويىزدا قىزمەت كورسەتكەن وبلىستىق تەمىر جول اۋرۋحاناسىنىڭ دارىگەرلەرىنە العىسىمدى ايتتىم. بۇرىن وسىنداي ۇزدىك مەديتسينالىق قىزمەت بۇگىنگىدەي اۋىلدى ارالاپ ءجۇرىپ پە ەدى؟! بۇل دا تاۋەلسىز ەلىمىزدىڭ العا باسقان ءساتتى قادامىنىڭ ءبىرى دەپ ويلايمىن. «سالاماتتى قازاقستان» دەنساۋلىق پويىزىن ۇيىمداستىرۋدى تاپسىرعان ەلباسى نۇرسۇلتان نازارباەۆقا العىسىم شەكسىز.
دەنيسوۆ اۋدانى وبلىس ورتالىعىنان شالعايلاۋ جاتسا دا, جاعدايىمىز جامان ەمەس. اۋدانىمىزدىڭ ءبىرقاتار ەلدى مەكەندەرى ءبىراز جىلداردان بەرى كوگىلدىر وتىندى پايدالانادى. اۋىلدا وتىرىپ وق جاقپايدى. ەندى وتكەن جىلدان بەرى كوگىلدىر وتىن اۋدان ورتالىعىنا جانە باسقا اۋىلدارعا دا جەتكىزىلىپ جاتىر. اۋىلداعىلاردىڭ جاعدايى ءبىرتە-بىرتە كوتەرىلىپ كەلەدى, تاماعىمىز توق, كويلەگىمىز كوك. اۋىل-ءۇي, كورشىلەردىڭ اراسىندا قانداي ۇلتتىڭ وكىلى جوق دەرسىز. بارلىعى دا ءبىر اتانىڭ بالالارىنداي تاتۋ-ءتاتتى ءومىر ءسۇرۋدە. كەڭ قولتىق قازاق جۇرتى قانداي قوناقجاي دەسەڭشى, ادامگەرشىلىك قاسيەتتى جاراتقان وسى حالىقتىڭ قانىنا بەرگەن. اۋىلدا ءبىر-بىرىمىزگە قاراپ, العا ۇمتىلامىز, ءبىرى-ءبىرىمىزدى سىيلاپ ارالاسامىز.
وسىنداي جەردە تۋىپ, وسىنداي ەلدە ءومىر ءسۇرىپ جاتقانىمىزعا ريزامىز. تىلەگىمىز ەلدىڭ ۇستىندە.
ل.چەرنياۆسكايا.
قوستاناي وبلىسى, دەنيسوۆ اۋدانى.
