ۆەلوسپورتتان كەشەندى جارىس قورىتىندىسى بويىنشا قازاقستان قىزدار كومانداسى التىنشى ورىن يەلەندى. مارينا كۋرنوسوۆا مەن سۆەتلانا پاششەنكو ۇزدىكتەر قاتارىنان كورىنۋ ءۇشىن سوڭعى جارىس كۇنىندە بارىن سالۋى ءتيىس ەدى. الايدا, ەۋروپالىق قارسىلاستارىنا ەسە جىبەرگەن قازاقستاندىقتار جالپى ەسەپتە العاشقى التىلىققا عانا ەنە الدى.
«ارينە, ۇزدىك ۇشتىككە ەنەمىز دەگەن ماقساتىمىز بولعان. الايدا, بۇگىنگى كۇن ءبىز ءۇشىن قولايلى بولمادى. جارىستىڭ بۇل ءتۇرى بىزگە قول ەمەس. ازيا مەن ەۋروپاداعى دەڭگەيدى سالىستىرا المايسىڭ. ەۋروپالىق قىزدار بىزدەن ءبىر باس جوعارى ەكەنىن مويىنداۋ كەرەك. ولاردىڭ تاكتيكالىق ادىستەرى, جىلدامدىعى, مارەگە جاقىنداعان تۇستاعى قيمىل-ارەكەتتەرى ءبىزدى وراپ كەتەدى. سوندىقتان, جولىمىز بولمادى», - دەيدى پاششەنكو.
ال ۆەلوسپورتتان ەرلەر كومانداسى ناعىز ەرلىك جاساپ, جاسوسپىرىمدەر وليمپياداسىنىڭ چەمپيونى اتاندى! گلەب برۋسەنسكي مەن ەۆگەني فەدوروۆ قارسىلاستارىنا ەش ايلا قالدىرعان جوق. ولار ءبىرىنشى جارىس كۇنىنەن باستاپ كوز تىزگىنىن قولعا العان بولاتىن. سايىس بارىسىندا قارسىلاستارىنان وق بويى وزىق تۇرعان ءبىزدىڭ سپورتشىلار جانكۇيەرلەر مەن باپكەر ءۇمىتىن اقتاپ وتىر.
«دايىندىقتى بىلتىر باستادىق. قۇرلىق دوداسىنان باس تارتۋعا تۋرا كەلدى. ارينە, ول جاقتا دا جەڭەتىنىمىزگە كۇمان جوق. الايدا, جاراقاتتان امان بولۋ ءۇشىن ازيا بىرىنشىلىگىنە ەكى سپورتشىنى جىبەرمەدىك. ماۋنتينبايكتىڭ جارىس باعدارلاماسىنا ەنەتىنىن بىلگەن سوڭ, يسپانيادا قارقىندى تۇردە جاتتىعۋ جۇمىستارىن جۇرگىزدىك. كەيىن تاس جولداعى جارىستان الەم كۋبوگىنە قاتىسقانىمىز بار. شىلدەدە قايتادان ماۋنتينبايكتى قولعا الدىق. سول جاتتىعۋ جيىندارىنىڭ كەشەگى كروسس-كانتريدە كومەگى ءتيدى. جىگىتتەر جاراپ تۇر! ءوزىم دە ءۇشىنشى ورىننان ۇمىتتەنىپ كەلگەم. الايدا,ولار مەن ويلاعاننان دا اسىپ ءتۇستى», - دەپ اعىنان جارىلدى گورباچەۆسكي.
قازاق ەلىنىڭ بوكسشىلارى كەشەگى جارىس كۇنىندە ءۇش رەت تۇعىرعا شىقتى. نادەجدا ريابەتس قولا, دامير تويباي كۇمىس جۇلدەگەر اتانسا, ايبەك ورالباي التىننان القا تاقتى.
وليمپيادا چەمپيونى اتانعان ايبەك ورالباي ەل نامىسى ءۇشىن بار كۇشىن سالعانىن جاسىرعان جوق.
"مەن بۇل بوكسشىمەن الەم چەمپيوناتىنىڭ جارتىلاي فينالىندا كەزدەسكەن ەدىم. ول جولى دا, بۇگىن دە جەڭىسكە جەتتىم. ەكىنشى راۋندتا قارقىندى كۇشەيتىپ, ودان باسىم ءتۇستىم. بۇگىن قولداۋ بىلدىرۋگە كەلگەن قازاقستاندىق باسقا سپورتشىلارعا, باپكەرلەرگە العىسىم شەكسىز. ولاردىڭ قولداۋىن سەزىندىم. نامىستى قولدان بەرمەي, التىنعا قول جەتكىزدىم", - دەدى وليمپيادا چەمپيونى ايبەك ورالباي.
اشىلۋ سالتاناتىندا ەلىمىزدىڭ كوك بايراعىن كوتەرىپ شىققان دامير تويباي ءوزىنىڭ ادىلەتسىزدىك قۇربانى بولعانىن اشىق ايتتى. سپورتشى قارسىلاسىن قۋالاپ ءجۇرىپ ۇرسا دا, تورەشىدەن ۇپاي الا الماعان. دەسە دە, ءداميردىڭ بولاشاعى ءالى الدا. ءبىز ونىڭ تالاي باسەكەدەن التىنمەن ورالارىنا سەنىمدىمىز!
