ىلگەرىرەكتە, 2013 جىلى ەمير بايعازين «اسلاننىڭ ساباقتارى» فيلمىمەن ءدال وسى اتالىمدا باق سىناپ, جوعارى جۇلدەگە يە بولعان ەدى.
ودان بولەك, «وزەن» ءفيلمى لوس-اندجەلەستە وتەتىن Asian World film festival كينوفەستيۆالىنىڭ كونكۋرستىق باعدارلاماسىنا قاتىسادى. سونداي-اق, اتالعان كينوتۋىندى ۆارشاۆاداعى جانە سان پاولوداعى فەستيۆالدىڭ ارنايى باعدارلامالارىندا كورسەتىلەدى. ال «وزەن» ءفيلمىنىڭ ازيالىق تۇساۋكەسەرى ۇستىمىزدەگى جىلى قازاننىڭ 25-ءى مەن قاراشانىڭ 3-ءى ارالىعىندا توكيوداعى حالىقارالىق كينوفەستيۆالدىڭ كونكۋرستىق باعدارلاماسى شەڭبەرىندە وتەدى.
– «وزەن» فيلمىنە قاتىستى جاڭالىقتار مەنى جانە مەنىڭ كوماندامدى, ارينە, قۋانتادى. وسى ورايدا, جۇمىس توبىنا العىسىمدى بىلدىرەمىن. ولار تەك ماعان ەمەس, مەنىڭ يدەيالارىما قاشان دا ادال. سونداي-اق, ماعان قولداۋ كورسەتىپ, سەنىم بىلدىرگەن مادەنيەت جانە سپورت مينيسترلىگىنىڭ باسشىلىعىنا دا العىس ايتامىن. بولاشاقتا دا قارىم-قاتىناستارىمىز نىعايىپ, ورتاق تابىستارعا قول جەتكىزەتىنىمىزگە سەنىمدىمىن, – دەدى رەجيسسەر.
ءفيلمنىڭ جارىققا شىعۋىنا بىرنەشە مەملەكەتتىڭ كينوستۋديالارى قاتىستى, ولار: قازاقستان (قر مادەنيەت جانە سپورت مينيسترلىگى, ش.ايمانوۆ اتىنداعى «قازاقفيلم» اق, Emir Baigazin Production), نورۆەگيا (Norsk Filmproduksjon) جانە پولشا (Madants). بۇل تۋىندى ستسەناري كەزىندە MPA APSA ازيا-تىنىق مۇحيتتىق كينوقاۋىمداستىعى گرانتىنىڭ قولداۋىنا يە بولدى. 2017 جىلى قىركۇيەكتە كينوجوبا ۆارشاۆا حالىقارالىق كينوفەستيۆالى كينونارىعىندا Pitch and Meet جوبالار بايقاۋىندا ءبىرىنشى ورىندى يەلەنگەن بولاتىن. كارتينانىڭ قورتىندى جۇمىستارى 2018 جىلى جاز ايىندا پولشا كينەماتوگرافيا ينستيتۋتىنىڭ قارجىلاي كومەگىمەن ۆارشاۆاداعى Orka جانە Dreamsound ستۋديالارىندا جۇرگىزىلگەن.
«وزەن» ءفيلمىنىڭ الەمدىك تۇساۋكەسەرى ۆەنەتسيا كينوفەستيۆالى شەڭبەرىندە وتكەن بولاتىن. بۇل فەستيۆالدىڭ «كوكجيەكتەر» باعدارلاماسىندا ەمير بايعازين ۇزدىك رەجيسسەر اتاندى. ال ءفيلمنىڭ سولتۇستىك اميريكاداعى تۇساۋكەسەرى ۇستىمىزدەگى جىلى قىركۇيەك ايىندا حالىقارالىق تورونتو كينوفەستيۆالى اياسىندا ءوتتى. كينوتۋىندى فەستيۆالدىڭ «تۇعىرناما» («پلاتفورما») كونكۋرستىق باعدارلاماسىندا كورسەتىلىپ, قازىلار القاسىنىڭ قۇرمەتتى اتالىمىنا جانە Screen Daily تاۋەلسىز كينوسىنشىلاردىڭ رەيتينگى تىزىمىندە الدىڭعى قاتاردان كورىندى. ودان بولەك, «وزەن» ءفيلمى ءۇشىن ەمير بايعازين گولليۆۋدتىڭ شەتەل ءباسپاسوزى قاۋىمداستىعىنىڭ گرانتىنا يە بولدى.
«وزەن» ءفيلمى وركەنيەتتەن الىس جەردە تۇراتىن, قالادان كەلگەن قوناقتان كەيىن ومىرلەرى كۇرت وزگەرە باستاعان بەس اعايىندى تۋرالى باياندايدى.
ايگۇل احانبايقىزى,
«ەگەمەن قازاقستان»
الماتى
