ىشكى ساياسي تۇراقتىلىق – ورنىقتى دامۋ كەپىلى
حالقىمىز ەلباسى ايقىنداعان ورتاق مۇددە جولىندا اۋىزبىرشىلىك تانىتپاسا, ەلىمىزدىڭ ساياسي جانە الەۋمەتتىك-ەكونوميكالىق دامۋى, سونداي-اق دامىعان 30 ەلدىڭ قاتارىنا كىرۋ مىندەتى جۇزەگە اسپايتىنىنا ەشكىم كۇمان كەلتىرمەيدى.
ەلدىڭ الەمدىك ەليتاعا كىرۋىنىڭ نەگىزگى شارتتارى ەتنو-كونفەسسيالىق توزىمدىلىك, ىشكى ساياسي تۇراقتىلىق جانە دامىعان ازاماتتىق قوعام بولىپ تابىلادى.
ەل تاۋەلسىزدىگىنىڭ 27 جىلىندا قول جەتكىزىلگەن تابىستارىمىزدىڭ بارلىعى – كوپ ەتنوستى ەلىمىزدىڭ ىنتىماعىنىڭ, قوعامدىق كەلىسىمنىڭ, پرەزيدەنتىمىز العا قويعان ستراتەگيالىق مىندەتتەردى بارشا قازاقستاندىقتار جۇمىلا ەڭسەرۋىنىڭ ناتيجەسى.
الەمدىك قوعامداستىق ازاماتتىق قوعامنىڭ ءتيىمدى ۇلگىسى رەتىندە تانىعان ەلىمىزدەگى ساياسي تۇراقتىلىق پەن ەتنوسارالىق جانە كونفەسسياارالىق كەلىسىمنىڭ قازاقستاندىق مودەلى نەگىزىندە «ارالۋاندىقتان بىرتەكتىلىككە» قاعيداتى بەكىتىلدى. بۇل پرينتسيپ ءومىردىڭ بارلىق سالاسىندا قولدانىلادى: الەمدىك ساياساتتا (كوپ ۆەكتورلىق), ەكونوميكادا (جاڭا تەحنولوگيالاردى پايدالانۋ جانە ەكسپورتقا باعدارلانعان يندۋستريالاندىرۋ), الەۋمەتتىك جانە ىشكى ساياساتتا (حالىقتىڭ كىرىستەرىنىڭ ءوسۋى جانە ءومىر ءسۇرۋ ساپاسىن قوعامدىق كەلىسىم جانە توزىمدىلىك قاعيداتتارىمەن جاقسارتۋ).
باعزى زامانداردان بەرى تولەرانتتىلىق پەن ەتنوسارالىق تاتۋلىق ۇلى دالانىڭ نەگىزگى قاعيداسى بولىپ تابىلاتىندىعىن اتاپ ءوتۋ كەرەك. ۇلى جىبەك جولى بويىندا ورنالاسقان ورتاعاسىرلىق قالالاردا ءتۇرلى ءدىني عيماراتتار – مەشىتتەر, شىركەۋلەر, حرامدار, سيناگوگالار, بۋدديستەردىڭ عيباداتحانالارى سالىندى. تەك ولاردىڭ بيىكتىكتەرى مەشىتتەن اسپاۋى كەرەك بولعان.
قازاقستاننىڭ ستراتەگيالىق جەتىستىكتەرىنىڭ باستاۋىندا ەلباسىنىڭ ارىدەن ويلاي بىلەر كورەگەندىگى, كەڭ اۋقىمدى ساياساتى جانە جاسامپاز جوسپارلارى مەن حالىقتى ورتاق مۇددەگە جۇمىلدىرا بىلگەن ماڭىزدى باستامالارى تۇر.
بۇگىندە قازاقستاندى الەمنىڭ باسەكەگە بارىنشا قابىلەتتى ەلدەرىنىڭ قاتارىنا جىلجىتۋ باستى ماقساتىمىز. وسى ورايدا الدىمىزعا ەلدەگى تۇراقتىلىقتى, ازاماتتاردىڭ بارلىق كونستيتۋتسيالىق قۇقىقتارى مەن بوستاندىقتارىن قامتاماسىز ەتە وتىرىپ, قوعام مەن مەملەكەتتى باسقارۋدىڭ ەڭ ءتيىمدى جۇيەسىن ىسكە اسىرا الاتىن قازىرگى زامانعى دەموكراتيالىق باسقارۋ فورماسىنا كوشۋ مىندەتى قويىلىپ وتىر. بۇل مىندەتتى ىسكە اسىرۋ ماقساتىندا ەلىمىزدە كورپوراتيۆتىك باسقارۋدىڭ, ونىمدىلىكتىڭ, اشىقتىقتىڭ جانە ەسەپتىلىكتىڭ قاعيداتتارىن نەگىزگە العان ساپالى جاڭا مودەل قۇرىلۋدا.
ءبىزدىڭ وتانداستارىمىز مەملەكەتتىك بيلىكتىڭ تيىمدىلىگىن كورسەتكىشتەر مەن ەسەپتەرگە ەمەس, شىنايى ءومىر ءسۇرۋ ساپاسىنا جانە ءوز تابىستارىنىڭ وسۋىنە قاراي باعالايدى.
ەل پرەزيدەنتى ن.ءا.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى ءبىزدىڭ بارلىعىمىز ءۇشىن جاڭا قازاقستاندىق شىندىقتى قالىپتاستىرۋعا باعىتتالعان.
تۇركىستان وبلىسى بويىنشا مەملەكەتتىك, قوعامدىق جانە ىسكەرلىك قۇرىلىمداردىڭ الەۋمەتتىك ارىپتەستىگى, ايماقتىڭ الەۋمەتتىك-ەكونوميكالىق جانە الەۋمەتتىك دامۋىنىڭ وزەكتى ماسەلەلەرىن شەشۋگە قاتىسۋى جوسپارلى جانە ماقساتتى جۇمىس بولىپ تابىلادى.
بۇل جۇمىستاردىڭ ناتيجەسى ايماق تۇرعىندارىنىڭ الەۋمەتتىك وركەندەۋى مەن ەكونوميكالىق ءوسۋىنىڭ ناقتى كورسەتكىشتەرىنەن كورىنەدى.
شىمكەنتتىڭ رەسپۋبليكالىق ماڭىزى بار قالا مارتەبەسىن الۋى جانە تۇركىستان قالاسىن وبلىس ورتالىعى رەتىندە قالىپتاستىرۋ شارالارى وبلىستىڭ الەۋمەتتىك-ەكونوميكالىق الەۋەتىن ارتتىرۋ باعىتىنداعى جۇمىستاردى جانداندىرا ءتۇستى.
ايماقتاعى ونەركاسىپتىك كاسىپورىنداردىڭ, اۋىل شارۋاشىلىعى تاۋارىن وندىرۋشىلەردىڭ, شاعىن جانە ورتا بيزنەس سالاسىنىڭ جەتىستىكتەرى ءوندىرىستىڭ ءوسۋىن كورسەتەدى. ولار جۇمىس ورىندارىنىڭ كوبەيۋىنە وڭ اسەرىن تيگىزىپ وتىر. مىسال رەتىندە بىرنەشە كورسەتكىشتەردى كەلتىرە كەتەيىن.
وبلىستا جىل سايىن 500 مىڭ شارشى مەتردەن استام تۇرعىن ءۇي پايدالانۋعا بەرىلەدى. 180 مىڭنان استام شاعىن جانە ورتا بيزنەس سۋبەكتىلەرى ءتيىمدى جۇمىس ىستەيدى, جەڭىلدىكتى ميكروكرەديت بەرۋ اياسىندا 2,7 ملرد تەڭگە بولىنگەن, اۋىل شارۋاشىلىعى سالاسىنىڭ ايماقتىڭ ەكونوميكالىق قوزعاۋشى كۇشىنە اينالاتىنىنا سەنىم مول. تۋريستىك الەۋەت ءتيىمدى ىسكە اسىرىلۋدا – وسى جىلدىڭ 8 ايىنىڭ قورىتىندىسى بويىنشا تۇركىستان قالاسىنا كەلگەن تۋريستەردەن وبلىستىق ەكونوميكاعا 3,73 ملرد تەڭگە تۇسكەن.
ايماقتىق شكالا بويىنشا جۇرگىزىلگەن سوتسيولوگيالىق ساۋالنامالاردىڭ ناتيجەلەرى كورسەتكەندەي, رەسپوندەنتتەردىڭ 90%-ى وزدەرىنىڭ تۇرمىس جاعدايىنا قاناعاتتانعان جانە ايماقتاعى الەۋمەتتىك-ەكونوميكالىق جاعدايدى تۇراقتى جانە گۇلدەنگەن دەپ باعالاعان. سونداي-اق رەسپوندەنتتەردىڭ 96,7%-ى ەلدەگى ءارتۇرلى ەتنوستىق توپتار اراسىنداعى قارىم-قاتىناستاعى احۋالدى قاۋىپسىز جانە تىنىش دەپ باعالاعان. بۇل ەلباسىنىڭ ايتقان سوزدەرىنە سايكەس, ەلىمىزدىڭ ەكونوميكالىق ءال-اۋقاتى قازاقستان حالقىنىڭ بىرلىگىنە نەگىزدەلگەنىن بىلدىرەدى.
ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ, «رۋحاني جاڭعىرۋ» باعدارلاماسىنىڭ, سونداي-اق جولداۋدىڭ مازمۇنى ءبىزدىڭ ءبارىمىزدى – قوعامدىق جانە مەملەكەتتىك قۇرىلىمداردىڭ وكىلدەرىن ءوزارا قارىم-قاتىناستار, قازاقستاندىق مەملەكەتتىلىكتىڭ بولاشاعى ءۇشىن سەرىكتەستىك, جەكە باستامالار مەن جاۋاپكەرشىلىك جۇيەسىنە ساپالى وزگەرىستەر جاساۋعا شاقىرادى.
ۆلاديمير جارينوۆ,
وبلىس اكىمى اپپاراتى «قوعامدىق كەلىسىم» كمم-ءنىڭ ەتنوسارالىق قاتىناستار سالاسىنىڭ احۋالدىق مونيتورينگى جانە تالداۋ ءبولىمىنىڭ باسشىسى
تۇركىستان وبلىسى
***
تۋريزم – ەكونوميكاعا سەرپىن قوساتىن سالا
ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ەلدىگىمىزگە سىن بولاتىن اۋقىمدى ىستەر بايىپپەن باعامدالدى. قوعام بولىپ جۇيەلى جۇزەگە اسىرا بىلسەك, بۇل ۇلان-عايىر جولداۋ تارماقتارى – الەم ءورىستى تسيفرلى تەحنولوگياعا نىق قادام باسقان بۇگىنگى داۋىردە دامۋدىڭ كوكەيكەستى شەشىم تۇيىندەرى تابىلۋعا ءتيىستى ارنالاردىڭ جولىن اشاتىن ماڭىزدى قۇجات.
وزگەسىن ايتپاعاندا, الەم وركەنيەتىنىڭ تاجىريبەلەرىنە سۇيەنسەك, ەلباسىنىڭ ەل ەكونوميكاسىن تابىستى ارناعا بۇرۋدا ءتۋريزمدى دامىتۋ سالاسىنا ايرىقشا نازار اۋدارۋى تەگىن ەمەس. رۋحاني جاڭعىرۋىمىز بۇگىنگى جانە كەلەر ۇرپاقتىڭ كەمەل بولاشاعى ءۇشىن كەرەك. وسى تۇستا پرەزيدەنت جولداۋدا مەكتەپ ءتۋريزمى تۋرالى ء«وز جەرىڭدى تانىپ ءبىل» جاڭا باستاماسى اياسىندا ەلىمىزدىڭ وڭىرلەرى بويىنشا جاپپاي مەكتەپ ءتۋريزمىن قايتا جاڭعىرتۋ كەرەك», دەپ اتاپ كورسەتتى.
بايتاق ەلىمىزدىڭ وڭىرلەرىندە قانشاما تانىمدىق تاريحي-شەجىرەلى ماڭىزدى مادەني وبەكتى, مۇراجاي, قورىق, دەمالىپ ساياحاتتايتىن سۋى شيپالى, اينالاسى كوك جەلەكتى وزەن-كول. ءيا, ەلىمىز تاريحى تەرەڭ مەكەندەرگە وتە باي. قازاقتىڭ بايتاق دالاسى جەراستى بايلىعىمەن عانا ەمەس, شەجىرەگە تولى مازارلارىمەن, تاريحي كونە جادىگەرلەرىمەن دە قۇندى. وزگەسىن ايتپاعاننىڭ وزىندە مادەنيەتىمىزدىڭ مايەگى سەمەي وڭىرىندەگى, ياعني اباي اۋدانىنداعى تاريحي-مادەني جانە ادەبي-مەموريالدىق جيدەباي قورىعىنىڭ ءوزى ىشكى تۋريزم ءۇشىن ماڭىزدى نىسان. ونداعى كلاسسيكالىق ادەبيەتىمىزدىڭ التىن دىڭگەكتەرى – اباي قۇنانباي ۇلى مەن مۇحتار اۋەزوۆتىڭ مۇراجايلارى, سارىكول, قوڭىر اۋليە ۇڭگىرلەرى, ەڭلىك-كەبەك ەسكەرتكىشى سياقتى كەشەندەر, ەلىمىزدىڭ وزگە وڭىرلەرىندەگى تاريحي ەسكەرتكىشتەر مەن مۇراجايلاردى تاماشالاۋعا ءبىلىم ۇيىمدارى كوشپەلى اقىلى تۋريزمدەر ۇيىمداستىرۋى كەرەك. ء«وزىڭدى ءوزىڭ جاتتاي سىيلا, جات جانىنان ءتۇڭىلسىن» دەگەندەي ءوزىڭدى سىيلاۋ دەگەندى بۇل ارادا – ءوزىڭدى عانا ەمەس, ەلىڭدى, جۇرتىڭدى, مادەنيەتىڭدى تانىپ-ءبىلۋ, رۋحاني بيىك بولۋ دەگەن كەڭەيتىلگەن ماعىنادا دا قولدانۋعا بولادى. ول ءۇشىن تۋعان جەردىڭ داستان-تاريحىن وقى, ءبىل, ۇيرەن, ۇلىلار ەلىنە, قاسيەتتى جەرلەرگە بارىپ تابان تىرەپ, ءتاۋ ەتىپ ساياحاتتا. 1899 جىلى «رۋسسكي تۋريست» جۋرنالىندا ارنايى مەكتەپ تۋريزمىنە ارنالعان جەكە ايدار پايدا بولعان. سول ايداردا اپتا سايىن قاي مەكتەپ وقۋشىلارى قانداي ەلدى مەكەندەردە بولعانى تۋرالى قىزىقتى ماقالالار جاريالانىپ وتىرعان. وسى ارقىلى باسقا مەكتەپ وقۋشىلارىنىڭ ءدال سول جەرگە بارۋىنا سەبەپ بولعان ەكەن. قازىرگى تسيفرلى داۋىردە فەيسبۋك, ينستاگرام جەلىلەرى ارقىلى ءدال وسى مەكتەپ ءتۋريزمىن ەل ىشىندە ماڭىزدى ۇردىسكە اينالدىرۋعا بولادى. مەكتەپ وقۋشىلارى اراسىنداعى ەسسە, شىعارمالار بايقاۋى رەسپۋبليكا كولەمىندە اتالىپ وتسە.
بولاشاقتا قازاقستانداعى تۋريزم وڭىرلىك قانا ەمەس, جاھاندىق تا سيپات الۋى كەرەك. ول ءۇشىن, ياعني ەلىمىزدەگى ءتۋريزمنىڭ وركەندەۋى ءۇشىن تاريحي ورىندارىمىز, شيپالى وزەن-كولدەرىمىز, جەر جانناتى كوكشەتاۋداعى عاجايىپ مەكەن بۋراباي, شيپالى الاكول جانە ت.ب. مەكەندەردى يننوۆاتسيالىق جانە مادەني ورتالىق رەتىندە دامىتىپ قالىپتاستىرۋدى قامتاماسىز ەتە بىلسەك, مەملەكەتتىك بيۋدجەت ايتارلىقتاي تولىعىپ, الەۋمەتتىڭ ءال-اۋقاتى كوتەرىلەر ەدى. «باي تابيعاتىمىز بەن مادەني الەۋەتىمىزدى پايدالانۋ ءۇشىن سىرتتان كەلەتىن جانە ىشكى ءتۋريزمدى دامىتۋعا ەرەكشە كوڭىل ءبولۋ قاجەت», دەپ ەلباسى جولداۋىندا ايتىلعانداي, ءتۋريزمنىڭ بارلىق ءتۇرىن قازاقستاندا دامىتۋعا بولادى. ال تۇبەگەيلى ماقسات – تسيفرلى ءتۋريزمدى دامىتۋ بولۋى كەرەك.
سايابەك زيادين,
ەكونوميكا عىلىمدارىنىڭ
دوكتورى, پروفەسسور, ءال-فارابي اتىنداعى قازۇۋ
ەكونوميكالىق زەرتتەۋ ورتالىعىنىڭ ديرەكتورى
***
بارشامىزعا جىگەر بەرگەن جولداۋ
ەلباسىنىڭ جولداۋى ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال-اۋقاتىن ودان ءارى ارتتىرۋ مىندەتتەرىنە ارنالدى.
مەملەكەت باسشىسى بۇگىندە حالىق سانى 18 ملن-نان اسىپ, ءومىر ءسۇرۋ ۇزاقتىعىنىڭ 72,5 جاسقا جەتكەنىن, العاش تاۋەلسىزدىك العان جىلدارى حالىق سانى 14 ملن بولعانىن اتاپ ايتتى. بۇل, ارينە, ەلدەگى ساياسي, ەكونوميكالىق-الەۋمەتتىك جاعدايدىڭ دۇرىس قالىپتاسقانىنىڭ ءبىر كورسەتكىشى ەكەنى بەلگىلى.
جولداۋدا ەلباسى قوعامنىڭ ءار سالاسىنا قاتىستى ارنايى توقتالىپ, ناقتى مىندەتتەردى اتادى. سونىڭ ىشىندە مەنى مەديتسينا قىزمەتكەرى رەتىندە دەنساۋلىق ساقتاۋ سالاسىندا ناقتىلانعان تاپسىرمالار ەرەكشە قىزىقتىردى. مەملەكەت باسشىسى باستاپقى مەديتسينالىق-سانيتارلىق كومەكتىڭ ساپاسىن ارتتىرۋ ماسەلەسىنە توقتالعانى, 2019 جىلعى 1 قاڭتاردان باستاپ ۋچاسكەلىك مەديتسينا قىزمەتكەرلەرىنىڭ جالاقىسىن 20 پايىزعا كوتەرۋدى تاپسىرعانى ءوزىم باسقاراتىن ۇجىم مۇشەلەرىن قۋانىشقا بولەدى. وسى ماقساتتا كەلەسى جىلى بيۋدجەتتەن 5 ملرد تەڭگە بولىنەتىنى بەلگىلى بولدى. بۇل ءبىر جاعىنان ەمحانالارعا ۇلكەن سەنىم ارتىپ, جاۋاپكەرشىلىك جۇكتەيدى.
جالپى, ەلباسىنىڭ بيىلعى جولداۋى بارىمىزگە ايرىقشا جىگەر بەردى.
گۇلستان ماقسۇتوۆا,
قىزىلوردا قالاسىنداعى №3 ەمحانانىڭ باس دارىگەرى
***
ەڭ باستى قۇندىلىق – ادام تاعدىرى
ەلباسى نۇرسۇلتان ءابىش ۇلى نازارباەۆتىڭ بۇل جولداۋى بۇرىنعىلارىنان شىن مانىندە وزگەرەك بولدى. ونەر ادامى عانا ەمەس, قازاقستاننىڭ ءبىر ازاماتى رەتىندە تىڭداپ وتىرىپ تامساندىم, شىن مانىندە ريزا بولدىم. مەملەكەتىمىزدىڭ ەڭ باستى قۇندىلىعى – ادام تاعدىرى مەن ونىڭ كەمەل كەلەشەگىنە قاتىستى بىرقاتار سۇبەلى جوبالار مەن باستامالار قولعا الىناتىن بولدى. ەلباسىنىڭ 2019 جىلدى «جاستار جىلى» دەپ بەكىتۋىنىڭ ءوزى ۇلتىنىڭ كەمەل كەلەشەگىنە سەنگەن دانا باسشىنىڭ كورەگەندىگى دەپ بىلەمىن. ودان كەيىن, ارينە, مۇعالىمدەردىڭ مارتەبەسىنە قاتىستى الداعى ۋاقىتتا قابىلداناتىن زاڭ دا ءومىرىن ەلىمىزدىڭ كەلەشەگىن تاربيەلەۋگە ارناعان ۇلاعاتتى جاندارعا كاسىبي مەرەكەسى قارساڭىندا تەڭدەسسىز سىي بولدى عوي دەپ ويلايمىن. كەز كەلگەن ادامنىڭ بۇل ومىردە عۇمىر بويى قارىز بولىپ وتەتىن ەكى ادامى بار. ونىڭ ءبىرى – اتا-اناسى بولسا, ەكىنشىسى – وسى ۇستازى. مەنىڭ اكەم دە, انام دا بار عۇمىرىن بالا تاربيەسىنە ارناعان ۇلاعاتتى ۇستازدار. مەن ۇستازدىق جۇمىستىڭ اۋىرتپالىعى مەن جاۋاپكەرشىلىگىن جاقسى ءبىلىپ, جانىممەن تۇسىنەمىن. اكەمنىڭ ماڭداي تەرى مەن ادال ەڭبەگى, انامنىڭ ءار كۇرسىنىسى ماعان وسىنى ۇعىندىرىپ, ۇستازداردىڭ قادىرىنە جەتۋگە ۇيرەتتى. سوندىقتان دا ۇلاعاتتى جاندارعا كورسەتىلىپ جاتقان بۇل مارتەبە شىن مانىندە دەر شاعىندا قابىلدانعان وتە دۇرىس شەشىمدەردىڭ ءبىرى دەپ سانايمىن.
تالعات تەمەنوۆ,
ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى, قازاقستاننىڭ حالىق ءارتىسى
***
ەكسپورتتى ۇلعايتايىق
ەلباسىنىڭ بيىلعى جولداۋىندا اۋىل شارۋاشىلىعى سالاسىنا اسا كوڭىل بولىنگەنى بەلگىلى. سونىمەن قاتار باستى قۇجاتتا كورسەتىلگەن باعىتتاردىڭ قايسىسىن الىپ قاراساڭىز دا حالىق ءۇشىن وتە ماڭىزدى.
مەملەكەت باسشىسى جولداۋدىڭ بەسىنشى باعىتىندا ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2022 جىلعا قاراي 2,5 ەسە كوبەيتۋدى تاپسىردى. مەملەكەت تاراپىنان جاسالىپ جاتقان قولداۋلاردىڭ ءتيىمسىز باعىتتارى قىسقارتىلىپ, زاماناۋي اگروتەحنولوگيالار قولدانۋعا باسىمدىق بەرىلەتىنى ايتىلدى. بۇل ءوز كەزەگىندە اۋىلشارۋاشىلىق تاۋارىن وندىرۋشىلەردىڭ باسەكەگە قابىلەتتى جانە ساپالى ءونىم وندىرۋىنە, سونداي-اق ءونىمىن ەكسپورتقا شىعارۋىنا زور مۇمكىندىك بەرەدى.
ال ەندى ءوزىمنىڭ شارۋا قوجالىعىما كەلەتىن بولسام, جوعارىدا اتالعان قولداۋلاردىڭ ارقاسىندا قانت قىزىلشاسى داقىلىنىڭ كولەمىن 2 ەسەگە ارتتىردىق. وندىرگەن 700 توننا كوكونىس ونىمدەرى جامبىل وبلىسىمەن قاتار استانا, الماتى قالالارىنا وتكىزىلدى. سونىمەن قاتار ءسۇت فەرماسىنداعى 200 باس اسىل تۇقىمدى ساۋىن سيىردىڭ ونىمدەرىن ءسۇت وڭدەۋشى كاسىپورىندارعا وتكىزىپ جاتىرمىز.
جولداۋدا ايتىلعانداي, قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2022 جىلعا قاراي 2,5 ەسە كوبەيتۋدى قولداي وتىرىپ, مۇددەلى كاسىپورىندار توڭىرەگىندە شارۋاشىلىقتاردى ۇيىمداستىرىپ, ەت ەكسپورتى كولەمىن ارتتىرۋ جۇمىستارىن جۇرگىزەتىن بولامىز. بۇل جۇمىستار ەڭبەك ونىمدىلىگىنىڭ وسۋىنە دە ءوز سەپتىگىن تيگىزەدى.
جولداۋداعى اگرارلىق سالانى دامىتۋعا باعىتتالعان باستامالاردى اۋىل شارۋاشىلىعى تاۋارىن وندىرۋشىلەر اتىنان قولدايتىنىمىزدى بىلدىرگىم كەلەدى. ەلباسى جولداۋىندا اتاپ وتكەن مىندەتتەردى تولىق جۇزەگە اسىرۋعا بارىنشا اتسالىساتىن بولامىز.
ساحا ماناتوۆ,
«ساحا» شارۋا قوجالىعىنىڭ جەتەكشىسى
جامبىل وبلىسى,
بايزاق اۋدانى
