مينيستر جاڭا جولداۋدىڭ الەۋمەتتىك باعىتى مەن قازاقستاندىقتاردىڭ ءومىر ءسۇرۋ ساپاسىن ارتتىرۋعا باعىتتالۋىنىڭ ماڭىزىن اتاپ ءوتتى. سونداي-اق ول مەملەكەتتىك قىزمەتتەردى تسيفرلاندىرۋ جانە اۆتوماتتاندىرۋ ەرەكشە ءرول اتقاراتىنىن تىلگە تيەك ەتتى. «بۇل ماسەلە بارلىق ازاماتقا قاتىستى. مەملەكەتتىك قىزمەتتەر بەلسەندى تۇردە ورىندالۋى ءتيىس. ءبىزدىڭ الدىمىزعا مەملەكەتتىك قىزمەتتىڭ 90 پايىزىن ەلەكتروندى فورماتقا كوشىرۋ مىندەتى قويىلدى جانە ءبىز مۇنى مىندەتتى تۇردە جۇزەگە اسىرامىز», دەدى د.اباەۆ.
بۇل ماسەلەلەر بارلىق سالاعا تىكەلەي قاتىستى. مىسالى, 2019 جىلى ەلەكتروندى دەنساۋلىق تولقۇجاتىن ەنگىزۋ جانە قۇجات اينالىمىن تسيفرلى جۇيەگە اۋىستىرۋ ۇزىن-سونار كەزەك پەن قاعازباستىلىقتان قۇتىلۋعا كومەكتەسەدى.
كەزدەسۋ بارىسىندا وڭىرلىك باق-تىڭ جاي-كۇيى, وزەكتى ماسەلەلەرى دە نازاردان تىس قالعان جوق. ايماقتىق جۋرناليستەر مينيسترمەن بىرگە تولعاندىرعان ماسەلەلەرىن, قازاقستاندىق جۋرناليستيكانىڭ دامۋ پەرسپەكتيۆالارىن تالقىلادى. شىعىس قازاقستان وبلىسى اكىمىنىڭ ورىنباسارى اسەم ءنۇسىپوۆانىڭ ايتۋىنشا, كەزدەسۋگە 152-گە جۋىق ايماقتىق جۋرناليست قاتىسقان. ونىڭ 123-ءى ءباسپاسوز باسىلىمدارىندا جۇمىس ىستەيدى. سۇراقتاردىڭ باسىم بولىگى مەرزىمدى باسىلىمداردا كەزدەسەتىن قيىندىقتارعا قاتىستى قويىلدى.
اقپارات جانە كوممۋنيكاتسيالار ءمينيسترى ينتەرنەت رەسۋرستاردىڭ بەلسەندىلىگىنە قاراماستان, ءباسپاسوزدىڭ عۇمىرى ۇزاق بولاتىنىن ايتتى.
«زەرتتەۋلەرگە سۇيەنسەك, ينتەرنەت رەسۋرستاردان ماقالانى وقۋعا ورتا ەسەپپەن 40 سەكۋند كەتەدى, ال گازەتتە وسى ماقالانى وقۋ 40 مينۋتقا دەيىن سوزىلۋى مۇمكىن. بۇل ءبىزدىڭ گازەتتى مۇقيات وقيتىنىمىزدى بىلدىرەدى. بۇگىنگى تاڭدا وقۋ مادەنيەتى تومەندەپ بارا جاتقانداي, بىراق ونى قايتا قالىپتاستىرۋ ءۇشىن بارىمىزدى سالامىز», دەدى مينيستر.
اقمارال اعزامقىزى,
«ەگەمەن قازاقستان»
