ماڭىزدى ماسليحاتقا ءۇندىستاننىڭ ادامي رەسۋرستاردى دامىتۋ جونىندەگى باس ءمينيسترى س.سينگح, قازاقستاننىڭ ءبىلىم جانە عىلىم ءمينيسترى ە.ساعاديەۆ, قىتاي حالىق رەسپۋبليكاسى ءبىلىم ءمينيسترىنىڭ ورىنباسارى ل.حۋەيتسين, قىرعىز رەسپۋبليكاسى ءبىلىم جانە عىلىم ءمينيسترى ك.كوجوبەكوۆ, پاكىستان يسلام رەسپۋبليكاسى جوعارى ءبىلىم جونىندەگى كوميسسيانىڭ اتقارۋشى ديرەكتورى ا.الي, رەسەي فەدەراتسياسى عىلىم جانە جوعارى ءبىلىم ءمينيسترىنىڭ ورىنباسارى م.بوروۆسكايا, قازاقستانداعى تاجىكستاننىڭ توتەنشە جانە وكىلەتتى ەلشىسى ن.اليزودا جانە وزبەكستاننىڭ جوعارى جانە ورتا ارنايى ءبىلىم بەرۋ ءمينيسترىنىڭ ورىنباسارى ۋ.بەگىمقۇلوۆ قاتىستى.
باسقوسۋ بارىسىندا ەلىمىزدىڭ ءبىلىم جانە عىلىم ءمينيسترى ەرلان ساعاديەۆ اتالعان القالى جيىننىڭ ءبىلىم سالاسى ءۇشىن ماڭىزدى ەكەنىن اتاپ ءوتتى.
«شانحاي ىنتىماقتاستىعى ۇيىمىنا مۇشە ەلدەردىڭ ءبىلىم مينيسترلەرىنىڭ VII كەڭەسى جاستاردىڭ جان-جاقتى, ءبىلىمدى جانە ءوز ءىسىنىڭ بىلىكتى مامانى بولۋى ءۇشىن ءتۇرلى جاعداي جاساۋ جولدارىن تالقىلايدى. بۇل ماسەلە بۇعان دەيىن دە كوتەرىلىپ, ماڭىزدى ءماسليحاتتاردا قوزعالعان بولاتىن. بۇگىنگى شاراعا جينالعان شىۇ-عا مۇشە ەلدەردىڭ ءبىلىم باسشىلارى ءبىلىم سالاسىندا تاجىريبە ءبولىسۋ, ستۋدەنتتەرمەن الماسۋ سياقتى وزەكتى تاقىرىپتار توڭىرەگىندە ويلارىن ورتاعا سالادى. ءبىزدىڭ ەلىمىزدىڭ جاستارى دا الەمنىڭ تۇكپىر-تۇكپىرىندە سان الۋان ماماندىق بويىنشا بىلىمدەرىن جەتىلدىرۋ ۇستىندە. سونىمەن قاتار شەتەلدەن كەلىپ ءبىزدىڭ ءبىلىم وردالارىمىزدان ءتالىم الىپ جاتقان وزگە ۇلتتىڭ وكىلدەرى دە بار. بۇگىنگى تاڭدا ولاردىڭ سانى 18 مىڭعا جۋىق. كوبى شىۇ-عا مۇشە ەلدەردىڭ جاستارى. مىسالى, ءۇندىستان مەملەكەتىنىڭ ءبىلىم مينيسترىمەن مەديتسينالىق ماماندىق يەلەرىن, ياعني دارىگەرلەردى جانە IT ماماندارىن كوبىرەك دايىنداۋ تۋرالى كەلىسىم جاساستىق. قازاقستاننىڭ دا, شەتەلدەردىڭ دە مامان دايىنداۋدا وزىندىك وزىق تاجىريبەلەرى بار. كوپتەگەن مەملەكەتتەر قازاقستاندىق ستۋدەنتتەرگە گرانتتار بولۋدە. ولاردىڭ ىشىندە جاپونيا, قىتاي, رەسەي سياقتى ەلدەر جىل سايىن گرانت سانىن ارتتىرۋدا. بارامىز دەگەن بالالاردىڭ باعىن بايلاماي, ولاردىڭ وقۋ-ءبىلىم جيناپ قايتۋىن قولدايمىز. ءبىزدىڭ قازىرگى كەزدەگى ماڭىزدى مىندەتىمىز ەلىمىزگە 40 مىڭ ستۋدەنت تارتۋ. بيىل شەتەلدەن 14-18 مىڭ ستۋدەنت كەلدى. بۇل – شامامەن 20 پايىز. جىل سايىن گرانت سانىن ارتتىرساق, الداعى 5-6 جىلدا قازاقستاننىڭ وزىق ءبىلىم بەرەتىن حابقا اينالۋ مۇمكىندىگى بار. بۇل ءۇشىن بىرنەشە شارا قابىلداندى», دەدى ەرلان كەنجەعالي ۇلى.
كەڭەستىڭ قاتىسۋشىلارى شىۇ-عا مۇشە ەلدەردىڭ ۇلتتىق ءبىلىم بەرۋ جۇيەلەرىن دامىتۋ جانە جاڭعىرتۋ تۋرالى ماسەلەلەرىن, سونداي-اق 2019-2020 جىلدارعا ارنالعان ىنتىماقتاستىقتىڭ باسىم باعىتتارىن تالقىلادى. سونداي-اق دەلەگاتسيا باسشىلارى ءبىلىم قىزمەتكەرلەرىن ىنتالاندىرۋعا, ولاردىڭ ءمىنسىز جۇمىسقا قىزىعۋشىلىقتارىن ارتتىرۋعا, كاسىبي دەڭگەيىن جوعارىلاتۋعا, ءوزىنىڭ قىزمەتتىك مىندەتتەرىن دەر كەزىندە, ساپالى ءارى ەرىكتى ورىنداۋعا باعىتتالعان شىۇ ءبىلىم بەرۋ جۇيەسىنىڭ «قۇرمەتتى جۇمىسشىسى» تۋرالى قۇجاتتاردى ازىرلەۋدىڭ ماڭىزدىلىعىن اتاپ ءوتتى. ايتا كەتەتىن تاعى ءبىر جايت, كەڭەسكە كەلگەندەر شىۇ-عا مۇشە ەلدەردىڭ ءبىلىم مينيسترلەرىنىڭ VIII كەڭەسىن رەسەيدە وتكىزۋگە ۋاعدالاستى.
راۋان قايدار,
«ەگەمەن قازاقستان»
