سونىڭ ناتيجەسىندە مەملەكەت باسشىسىنىڭ تاپسىرمالارىن ءتيىمدى ورىنداۋعا جاعداي جاسالماق. وسىعان وراي كەشە پارتيانىڭ ورتالىق اپپاراتىندا قۇقىقتىق كەڭەستىڭ كەزەكتى كەڭەيتىلگەن وتىرىسى ءوتتى. وندا قاتىسۋشىلار ەلىمىزدەگى تۇرعىن ءۇي-كوممۋنالدىق شارۋاشىلىعىن رەفورمالاۋعا قاتىستى وزەكتى ماسەلەلەردى تالقىلادى. جيىنعا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ قاتىستى.
ەلباسى جولداۋدا ەكونوميكادا باسەكەلەستىكتى دامىتۋ جانە تۇرعىن ءۇي-كوممۋنالدىق شارۋاشىلىعى مەن تابيعي مونوپوليالاردىڭ قىزمەتى ءۇشىن بەلگىلەنەتىن تاريفتەر سالاسىندا ءتارتىپ ورناتۋ ماقساتىندا باتىل شارالار قابىلداۋ كەرەكتىگىن ناقتى تاپسىرعان بولاتىن. بۇل ورايدا مەملەكەت باسشىسى كوممۋنالدىق قىزمەت پەن تابيعي مونوپوليالاردى رەتتەۋ سالالارىندا ءتاريفتىڭ جاسالۋىنىڭ جانە تۇتىنۋشىلاردان جينالعان قارجىنىڭ جۇمسالۋىنىڭ ءالى كۇنگە دەيىن اشىق ەمەستىگىنە, مونوپوليستەردىڭ ينۆەستيتسيالىق مىندەتتەمەلەرىنە ءتيىمدى مونيتورينگ پەن باقىلاۋ جۇرگىزىلمەي وتىرعانىنا ەرەكشە نازار اۋداردى. وسىعان بايلانىستى پرەزيدەنت ۇكىمەتكە 3 اي مەرزىم ىشىندە وسى ماسەلەمەن اينالىسىپ, باسەكەلەستىكتى قورعاۋ فۋنكتسياسىن ەلەۋلى تۇردە كۇشەيتە وتىرىپ, مونوپولياعا قارسى ۆەدومستۆونىڭ جۇمىسىن رەفورمالاۋدى تاپسىردى.
جولداۋدا قاراستىرىلعان بارلىق شارالاردىڭ جۇزەگە اسىرىلۋىن زاڭنامالىق تۇرعىدا قامتاماسىز ەتۋ ءۇشىن پارتيا وكىلدەرى «قازاقستان رەسپۋبليكاسىنىڭ تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭ جوباسىن تالقىلادى. بۇل جايتتىڭ قازاقستاندىقتاردى كوپتەن بەرى تولعاندىرىپ جۇرگەن وزەكتى ماسەلەلەردىڭ ءبىرى ەكەنى بەلگىلى.
«نۇر وتان» پارتياسىنىڭ ستراتەگيالىق زەرتتەۋلەر ينستيتۋتىنىڭ دەرەكتەرىنە سۇيەنسەك, قازاقستاندىقتاردىڭ 36 پايىزدان استامى پاتەر يەلەرى كووپەراتيۆىنىڭ قىزمەتىنە كوڭىلدەرى تولمايدى. بۇل رەتتە حالىق قىزمەت كورسەتۋشى كومپانيا ارەكەتتەرىنىڭ اشىق ەمەستىگىن جانە تۇسكەن قارجىنىڭ قايدا جۇمسالعانىن باقىلايتىن تەتىكتىڭ جوقتىعىنا نارازىلىقتارىن بىلدىرگەن.
وسى ماسەلەلەردىڭ بارلىعى قۇقىقتىق كەڭەس وتىرىسىندا كەڭىنەن تالقىلاندى. جيىندى اشقان «نۇر وتان» پارتياسى توراعاسىنىڭ ءبىرىنشى ورىنباسارى تۇرعىن ءۇي قۇرىلىسى قارقىندى جۇرگىزىلگەنىمەن, تۇكش سالاسىندا شەشىمىن تاپپاعان ماسەلەلەر سول كۇيىندە قالىپ وتىرعانىن ايتتى. سونىڭ ىشىندە كوممۋنالدىق قىزمەت تاريفتەرىنىڭ اشىق بولماۋى مەن نەگىزسىزدىگىنە جانە كوپپاتەرلى تۇرعىن ۇيلەردى باسقاراتىن كومپانيالاردىڭ قىزمەت ساپاسىنا قاتىستى ماسەلەلەرگە ەرەكشە نازار اۋداردى.
سونىمەن قاتار جيىندا ەلباسى تاپسىرمالارىن ساپالى ورىنداپ, حالىقتىڭ كوپتەن كۇتكەن ماسەلەسىن وڭتايلى شەشۋ ءۇشىن تۇرعىن ءۇي-كوممۋنالدىق قاتىناستارىن جاڭعىرتاتىن جۇيەلى نەگىز قالىپتاستىرۋ كەرەكتىگى ايتىلدى. ودان بولەك, تۇرعىن ءۇي-كوممۋنالدىق شارۋاشىلىعىن رەفورمالاۋداعى باستى مىندەت كوپپاتەرلى تۇرعىن ۇيلەردى باسقارۋ قىزمەتىنىڭ جوعارى ساپاسىنا قول جەتكىزۋ ەكەندىگى دە ءسوز بولدى. وسىعان وراي قاتىسۋشىلار ەنگىزىلىپ وتىرعان زاڭ جوباسى تۇرعىن ءۇي-كوممۋنالدىق شارۋاشىلىعىنىڭ بارلىق سالاسىن رەفورمالاۋ جانە جاڭعىرتۋدىڭ زاڭنامالىق نەگىزى رەتىندە قاراستىرىلۋى كەرەكتىگىنە باسا ءمان بەردى. سول سەبەپتى دە پارتيا وكىلدەرى زاڭ جوباسىن بۇكىلحالىقتىق جانە جان-جاقتى تالقىلاۋدى قولداپ, بارشا ازاماتتار مەن ۇكىمەتتىك ەمەس ۇيىمداردى وسى ۇدەرىسكە بەلسەندى قاتىسۋعا شاقىردى.
– تۇرعىن ءۇي-كوممۋنالدىق شارۋاشىلىعىن رەتتەيتىن زاڭ جوباسى ءماجىلىستىڭ قاراۋىندا. بۇل رەتتە ءبىزدىڭ باستى مىندەتتەرىمىزدىڭ ءبىرى – اتالعان زاڭ جوباسىن تياناقتى ساراپتاپ, ونىڭ حالىق كۇتكەن ماسەلەلەردى شەشۋگە جانە ەلىمىزدىڭ تۇرعىن ءۇي قورىن ءتيىمدى باسقارۋعا اسەر ەتۋىن قامتاماسىز ەتۋ. سونداي-اق وسى سالادا ءتيىمدى مونيتورينگ جۇرگىزىپ, مونوپوليستەر مەن پاتەر يەلەرى كووپەراتيۆىنىڭ جۇمىسىن انىقتاۋ دا ءبىزدىڭ باستى مىندەتىمىز. پارتيا وسى باعىتتا قوعامدىق بىرلەستىكتەرمەن جانە ۇكىمەتتىك ەمەس ۇيىمدارمەن كۇش بىرىكتىرىپ, جۇيەلى باقىلاۋ جۇرگىزۋگە دايىن. سوندىقتان بۇگىنگى باسقوسۋىمىزدى سول اۋقىمدى جۇمىستىڭ باستاماسى دەپ تە قابىلدايمىز, – دەدى م.اشىمباەۆ.
نۇروتاندىقتار ۇسىنعان تۇزەتۋلەر كوندومينيۋم وبەكتىلەرىن باسقارۋ مەن ولارعا قىزمەت كورسەتۋ جانە ونىڭ ورىندالۋ ءتارتىبىن رەتتەۋگە باعىتتالعان. ياعني, وندا مەنشىك يەلەرىنىڭ قاتىسۋىمەن جانە بۇل جۇمىستارعا جەرگىلىكتى اتقارۋشى ورگانداردىڭ تۇرعىن ءۇي ينسپەكتسياسىن جۇمىلدىرۋ ارقىلى ورتاق م ۇلىكتى كۇردەلى جوندەۋگە قاراجات جيناقتاۋ ۇدەرىستەرى كورسەتىلگەن. جاڭارتىلعان زاڭ جوباسىندا تۇرعىن ءۇي-كوممۋنالدىق شارۋاشىلىعىنىڭ بىرىڭعاي مەملەكەتتىك اقپاراتتىق جۇيەسىن قۇرۋ مۇمكىندىگى دە قاراستىرىلعانىن اتاپ وتكەن ءجون. دايىندالعان نورماتيۆتىك-قۇقىقتىق اكتىلەر حالىقتىڭ تۇرعىن ءۇي قۇرىلىس كومپانيالارىنا قوسىلۋى ارقىلى باسپانالى بولۋ تەتىكتەرىنىڭ اشىقتىعىن ارتتىرۋعا, سونداي-اق قولدانىستاعى زاڭنامالىق كەمشىلىكتەردى جويۋعا باعىتتالعان.
جالپى, اتالعان تۇزەتۋلەر تۇرعىن ءۇي-كوممۋنالدىق شارۋاشىلىعى جۇيەسىن رەفورمالاۋ ءۇشىن بىرنەشە ماسەلەنى قاتار شەشۋگە باعىتتالعان.
ايتا كەتەيىك, جيىنعا پارلامەنت دەپۋتاتتارى, «نۇر وتان» پارتياسى جانىنداعى قۇقىقتىق كەڭەستىڭ مۇشەلەرى, مەملەكەتتىك ورگاندار مەن ۇكىمەتتىك ەمەس ۇيىمداردىڭ باسشىلىعى جانە ولاردىڭ وڭىرلەردەگى وكىلدەرى قاتىستى. ال قۇقىقتىق كەڭەستىڭ وتىرىسى ناتيجەسىندە دايىندالعان ءتيىستى ۇسىنىستار الداعى ۋاقىتتا جاۋاپتى مەملەكەتتىك ورگاندار مەن باسقا دا مۇددەلى ۇيىمدارعا جولدانادى.
جاقسىباي سامرات,
«ەگەمەن قازاقستان»
