ۇكىمەت دەلەگاتسياسىنىڭ قۇرامىندا قىتايعا بارعان وبلىس اكىمىنىڭ ورىنباسارى مەيىرجان مىرزاليەۆ قوستاناي قالاسىنداعى يندۋستريالىق ايماقتا تەلەديدار شىعاراتىن زاۋىتتىڭ بيىل باستالاتىن قۇرىلىسىنىڭ جول كارتاسىنا قول قويدى. جاقىندا تراكتور, اۋىل شارۋاشىلىعى, قۇرىلىس تەحنيكالارىن شىعاراتىن قىتايداعى, ءتىپتى جالپى الەمدەگى ەڭ ءىرى ءوندىرىستىڭ ءبىرى YTO Group Corporation كومپانياسىنىڭ دەلەگاتسياسى قوستانايعا كەلىپ كەتتى. كومپانيانىڭ ديرەكتورلار كەڭەسىنىڭ توراعاسى چجاو يشۋي قوستانايلىقتارمەن ىنتىماقتاستىق ورناتۋعا, ونىڭ ىشىندە تراكتور ءوندىرىسىن دامىتۋعا ىنتالى ەكەنىن ءبىلدىردى. ايتا كەتەيىك, قىتاي جاعى وسى جوباعا جوسپارلاعان ينۆەستيتسيالىق قارجىنىڭ العاشقى ساتىسىنداعى كولەمى 25 ميلليون دوللاردى قۇرايدى.
قوستاناي وبلىسىنىڭ ينۆەستيتسيالىق الەۋەتىنە قىتاي دا, رەسەي دە قىزىعۋشىلىق تانىتىپ وتىر. شىعىستاعى كورشىمىزدىڭ ماشينا شىعاراتىن Sinotruk, Hanteng automobile Co., Ltd., SANY Group كومپانيالارى جانە رەسەيدىڭ «كراسنوگۆاردەيسكي ماشينوسترويتەلنىي زاۆود» اق, «سيبەكو» ااق قوستاناي قالاسىنداعى يندۋستريالىق ايماققا ءوندىرىسىن ورنالاستىرۋعا ىنتالى. الدىمەن يندۋستريالىق ايماققا اۋىلشارۋاشىلىق تەحنيكالارىن وندىرەتىن «كومپوزيت گرۋپپ» ترانسۇلتتىق حولدينگى كەلىپ ۇلگەردى. ونىڭ ءونىمى ەكسپورتقا تمد ەلدەرىنە ارتىلادى.
اۋىل شارۋاشىلىعى ونىمدەرىن جەتكىزە وڭدەيتىن زاماناۋي كەشەندى قازاقستاندىق «BioQrain» جاۋاپكەرشىلىگى شەكتەۋلى سەرىكتەستىگى قىتايلىق ينۆەستورلارمەن بىرىگىپ سالاتىن بولادى. قىتايلىق ينۆەستيتسيا ارقىلى جۇزەگە اساتىن بۇل ءۇشىنشى جوباعا قۇيىلاتىن قارجىنىڭ كولەمى 300 ميلليون اقش دوللارىن قۇرايدى. كەشەننىڭ قۇرىلىسى كەلەسى جىلى باستالادى. قوستانايدا جۇزەگە اساتىن وسى ءۇش جوبا دا ء«بىر بەلدەۋ – ءبىر جول» جانە «نۇرلى جول» باعدارلامالارى قولداۋ كورسەتەتىن قازاقستان-قىتاي ينۆەستيتسيالىق جوبالاردىڭ تىزىمىنە كىرەدى.
– ءىرى ءۇش جوبا دا ءوڭىر ەكونوميكاسىنا سەرپىن بەرەتىن بولادى. ارينە قۇرىلعان ءار كاسىپورىننان قوستانايلىقتار ءوزىنىڭ جۇمىس ورنىن تابادى. ولار وندىرگەن ءونىمنىڭ بارلىعى دا ءوڭىردىڭ, ەلىمىزدىڭ ەكسپورتتىق الەۋەتىن كەڭەيتە تۇسەدى, – دەيدى وبلىس اكىمىنىڭ ورىنباسارى م.مىرزاليەۆ.
وسىنداي ءىرى ينۆەستيتسيالىق جوبالار ارقىلى قوستاناي ءوڭىرى ەكونوميكاسىنىڭ ارتاراپتىلىعى دا ارتا تۇسۋدە.
ءنازيرا جارىمبەت,
«ەگەمەن قازاقستان»
قوستاناي
