ايگىلى ءانشىنىڭ 130 جىلدىعىنا وراي ۇيىمداستىرىلاتىن مەرەيتويلىق شارالار شەڭبەرىندە 17 قازاندا ساعات 16:00-دە وبلىس ورتالىعىنداعى «يۋبيلەينىي» كينوتەاترىندا شىعارماشىلىق ينتەلليگەنيا مەن باستى رولدەردى سومداعان اكتەرلاردىڭ قاتىسۋىمەن «امىرە» كوركەم ءفيلمى كورسەتىلەدى, وسى كۇنى كەشكە, ساعات 19:00-دە «ەرتiس كونتسەرت» زالىندا فەستيۆالدىڭ سالتاناتتى اشىلۋ ءراسىمى بولادى دەپ جوسپارلانعان. 18-20 قازاندا حالىق ارتىستەرى اعايىندى ابدۋلليندەر اتىنداعى شىعىس قازاقستان ونەر ۋچيليششەسىندە امىرە قاشاۋباەۆ اتىنداعى رەسپۋبليكالىق فەستيۆالدىڭ كونكۋرستىق كۇندەرى, 21 قازان كۇنى ساعات 19.00-دە شىعىس قازاقستان وبلىستىق دراما تەاترىندا قازاقستاننىڭ مادەنيەت قايراتكەرلەرى مەن ونەر شەبەرلەرىنىڭ قاتىسۋىمەن گالا-كونتسەرت جانە قاتىسۋشىلاردى ماراپاتتاۋ ءراسىمى وتەدى دەپ كۇتىلۋدە.
بۇگىن وسكەمەندەگى ايماقتىق كوممۋنيكاتسيالار قىزمەتىندە رەسپۋبليكالىق فەستيۆالدىڭ قازىلار القاسى مەن ۇيىمداستىرۋشىلارى ءباسپاسوز كونفەرەنتسياسىن وتكىزىپ, مادەني شارا تۋرالى جان-جاقتى ايتىپ بەردى. مادەنيەت جانە سپورت مينيسترلىگىنىڭ رەپەرتۋارلىق ساياسات باسقارماسىنىڭ باسشىسى ءسابيت بارلىباەۆ رەسپۋبليكالىق ءان سايىسىنا استانا, الماتى قالالارى مەن باتىس قازاقستان, پاۆلودار, قاراعاندى, سولتۇستىك قازاقستان جانە شىعىس قازاقستان وبلىستارىنان 40 جاس ونەرپاز كەلگەنىن, ولارعا قازاقستاننىڭ حالىق ءارتىسى قاجىبەك بەكبوسىنوۆ, ونەرتانۋشى, امىرەتانۋشى جارقىن شاكارىم, باقىت ۇدەرباەۆا, تولعانباي سەمباەۆ, گۇلميرا سارينا, امانگەلدى كۇزەۋباەۆ, ەربول ايتباەۆ سەكىلدى ءداستۇرلى انشىلەر قازىلىق ەتەتىنىن جەتكىزدى. بايقاۋدىڭ باس جۇلدە يەگەرىنە 1 ميلليون, 1 ورىنعا 700, 2 ورىنعا 500, 3 ورىنعا 300 مىڭ تەڭگە بەرىلەتىنىن, بۇعان قوسا قالي بايجانوۆ, عابباس ايتباەۆ, ماناربەك ەرجانوۆ اتىنداعى ارنايى جۇلدەلەر بار ەكەندىگىن تىلگە تيەك ەتتى.
ءداستۇرلى ءانشى عاريفوللا قۇرمانعاليەۆكە 28 جىل شاكىرت بولىپ, قاسىندا ءجۇرىپ, ءتالىمىن كورگەن قاجىبەك بەكبوسىنوۆ: «امىرە تۋرالى كەڭەستىك كەزەڭدە جۇسەكەڭدەر مەن عارەكەڭدەردىڭ سىبىرلاپ ايتقانىنان ەستىدىك. اشىق ايتا المايتىن. امىرەنى امىرە قىلعان - الاننىڭ وعان بەرگەن ەرەكشە دارىنى. «امىرە قايتىس بولعاننان كەيىن مەن ەلدىڭ اۋزىنا ىلىكتىم. ايتپەسە امىرەنىڭ قاسىندا تۇككە تۇرمايتىنمىن» دەيتىن ۇستازىم عارەكەڭ. شىندىق پا؟ شىندىق. ول كىسى شىنىن ايتىپ وتىر. ول كىسى اشىعىن ايتاتىن ادام بولاتىن. ۇلتتى ساقتايتىن ءتىنى, ءدىلى - ونەرى. ۇلكەن تويعا كەلىپ وتىرمىز. ۇرپاققا ساباق بولاتىن جيىنعا كەلىپ وتىرمىز. قۇتتى بولسىن!», - دەدى.
ونەرتانۋشى جارقىن شاكارىم ءسوزىن امىرەنىڭ دە, يسا بايزاقوۆتىڭ نەبارى 46 جىل ءومىر سۇرگەنىنەن, كۇلاش بايسەيىتوۆا دا سول شامادا عۇمىر كەشكەنىنەن, ايگىلى ءانشىنىڭ جارتى عۇمىرى قازاقتىڭ ءان ايتۋ مادەنيەتىن جەر شارىنا تاراتۋمەن, جارتىسى قينالۋمەن وتكەنىنەن باستادى. «زيراتىنا شەيىن جوعالىپ كەتتى. اللا قولداپ, 1974 جىلى ماسكەۋدەن امىرەنىڭ داۋىسىن تاۋىپ, الماتىعا الىپ كەلدىم. عاريفوللا, جۇسىپبەك, قانابەك, سول كەزدەگى بارلىق انشىلەر: «ويباي, امىرەنىڭ داۋىسى تابىلدى ما؟» دەپ قاتتى تاڭعالدى. سول كەزدەگى مادەنيەت ءمينيسترى ەركىنبەك جەكسەنبەكوۆ شاقىرىپ الدى. داۋىستىڭ تابىلعانى ۇلكەن رەزونانس بولدى. 1980 جىلى امىرە اتىنداعى تۇڭعىش كونكۋرس ءوتتى. كوردىڭىز, با, داۋىستىڭ تابىلعانى امىرەنىڭ قۇلپىتاسىن ورناتۋعا, بايقاۋ وتكىزۋگە جول اشتى. مىنە, بۇگىن ءور التايدا امىرە اتىنداعى فەستيۆال ءوتىپ جاتىر. سىزدەرگە كوپ راحمەت. بۇگىن وسكەمەندە 200-300 ادامعا امىرەگە اس بەرىلدى. مادەنيەت جانە سپورت ءمينيسترى ارىستانبەك مۇحامەدي ۇلىنا, وبلىس اكىمىنە, وبلىستىق مادەنيەت باسقارماسىنىڭ باسشىسى ازاماتقا العىس ايتامىن», - دەدى امىرەتانۋشى.
ء داستۇرلى ءانشى باقىت ۇدەرباەۆا 1980 جىلى العاش رەت ۇيىمداستىرىلعان امىرە اتىنداعى بايقاۋدا تۇڭعىش گران-پري يەگەرى اتانعاندىعىن ايتىپ, سايىس ونەرگە جول اشقانىن ەسكە الدى. «بايقاۋ ءالى كۇنگە دەيىن ەسىمدە. ءبىر ايتقاندا 7 انگە دەيىن ايتاتىنبىز», - دەدى ءانشى.
ازامات قاسىم,
«ەگەمەن قازاقستان»
وسكەمەن
