تۇلكىباس اۋدانىنا ارنايى ىسساپارمەن كەلگەن پارلامەنت سەناتىنىڭ دەپۋتاتتارى اسقار بەيسەنباەۆ پەن ءالي بەكتاەۆ اۋدان اكتيۆىمەن جانە تۇرعىندارمەن كەزدەسۋىندە ەلباسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنىڭ باسىم باعىتتارىنا جەكە-جەكە توقتالىپ, ماڭىزدىلىعىن ءتۇسىندىردى. ال سايرام اۋدانى تۇرعىندارىمەن بولعان كەزدەسۋدە سەناتور ءا.بەكتاەۆ «بيزنەستىڭ جول كارتاسى -2020» باعدارلاماسىنىڭ نە سەبەپتەن تاعى دا 5 جىلعا ۇزارتىلعانىن ءتۇسىندىرىپ ءوتتى. ءوزىنىڭ ومىرشەڭدىگىن دالەلدەگەن باعدارلامانىڭ ارقاسىندا ەلىمىزدە تالاي كاسىپكەر نەسيە الىپ, كوپتەگەن كاسىپكەرلىك سۋبەكتىلەرى ىسكە قوسىلدى, مىڭداعان جۇمىس ورىندارى اشىلدى.
ماقتاارالدا اۋدان اكتيۆىمەن كەزدەسۋ وتكىزگەن سەناتور ءالىمجان قۇرتاەۆ ەلباسىنىڭ جولداۋىنداعى نەگىزگى باعىتتارعا جەكە-جەكە توقتالىپ, ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە, ياعني 28 مىڭنان 42 مىڭعا دەيىن ءوسىرۋ تاپسىرىلعانىن اتاپ ءوتتى. جولداۋدا ايتىلعان تۇرمىس ساپاسىن ارتتىرۋ, ءومىر سۇرۋگە جايلى ورتا قالىپتاستىرۋ, ازاماتتار سۇرانىسىنا بەيىمدەلگەن مەملەكەتتىك اپپارات قۇرۋ, ءتيىمدى سىرتقى ساياسات, ءاربىر قازاقستاندىقتىڭ ەلىمىزدەگى وزگەرىستەر ۇدەرىسىنە اتسالىسۋى ماسەلەلەرi بويىنشا ناقتى مىسالدارمەن, جان-جاقتى تالداي وتىرىپ تۇسىنىكتەمە بەردى.
كەزدەسۋدە ءسوز العان ماقتاارال اۋدانىنىڭ قۇرمەتتى ازاماتى قاسىمحان حامەتوۆ جولداۋدا ايتىلعان باسىم باعىتتاردى ورىنداۋ ءۇشىن اتقارۋشى ورگاندار سەرگەك جۇمىس ىستەۋى كەرەكتىگىن تىلگە تيەك ەتتى. اۋداندىق ءماسليحاتتىڭ دەپۋتاتى, اكادەميك يبادۋللا ۇمبەتاەۆ اۋىل شارۋاشىلىعى سالاسىندا 2 ەسە پايدا تابۋ ءۇشىن الەمنىڭ ۇزدىك تەحنولوگيالارىن جەرگىلىكتى جەرگە بەيىمدەپ ەنگىزۋ كەرەكتىگىن جەتكىزدى. جەرگىلىكتى ءماسليحات دەپۋتاتى بەرىك شامپيەۆ ماقتاعا بەرىلەتىن سۋبسيديانىڭ كولەمىن ۇلعايتۋ بويىنشا ۇسىنىس جاساسا, اۋداندىق ءماسليحاتتىڭ حاتشىسى قادىر سارسەكباەۆ كۇزدە جانە كوكتەمدە بەرىلەتىن جانار جاعارمايدىڭ مەرزىمىن وزگەرتۋ بويىنشا ماسەلە كوتەردى. سونداي-اق ارداگەر پەردەش ەسەنبەكوۆ وبلىس ورتالىعى شىمكەنت قالاسىنان تۇركىستان قالاسىنا اۋىسقالى ماقتاارال ەڭ شالعاي اۋدان بولعانىن, جاڭا اۋداندا اۋىل شارۋاشىلىعى ونىمدەرىن سىرتقا جونەلتۋ ءۇشىن تەمىر جول مەن اۋەجاي قاجەتتىلىگىن العا تارتتى. اۆتوجولداردىڭ ساپاسىن جاقسارتۋ كەرەكتىگى دە ايتىلدى. ءوز پىكىرلەرىن ورتاعا سالعانداردىڭ بارلىعى ەلباسى جولداۋىن ۇلكەن ىقىلاسپەن قولدايتىندىقتارىن جانە ءوز ۇلەستەرىن قوساتىندارىن ءبىلدىردى.
عالىمجان ەلشىباي,
«ەگەمەن قازاقستان»
تۇركىستان وبلىسى
