2014 جىلدان بەرى باستالعان ىسكە وبلىستىق بيۋدجەتتەن 3,3 ملرد تەڭگە قارجى بولىنگەن بولاتىن. بيىلعى جىل سوڭىنا دەيىن اياقتالۋى ءتيىس جوبا مەرزىمىنەن بۇرىن جۇزەگە اسىپ, ايماق بويىنشا تۇرعىن ۇيمەن بىرىكتىرىلىگەن 100 عيمارات سالىندى. ياعني, ەندى الىس اۋداندارداعى ءتارتىپ ساقشىلارى جۇمىس ورنى مەن قاتار باسپانامەن دە قامتىلىپ وتىر.
ءتارتىپ ساقشىلارىن تۇرعىن ءۇي جانە جۇمىس كابينەتىمەن قامتاماسىز ەتۋ وڭىردەگى قۇقىق بۇزۋشىلىقتىڭ الدىن الىپ, پوليتسيا قىزمەتىنىڭ ساپاسىن ارتتىرماق. بۇل جۇمىستار قولدانىسقا بەرىلگەن 100 پوليتسيا پۋنكتىمەن توقتاپ قالمايدى. جىل سوڭىنا دەيىن تاعى 77 نىساننىڭ قۇرىلىس اياقتالسا, كەلەر جىلى 43 نىسان سالۋ جوسپاردا تۇر. ناتيجەسىندە, ايماقتاعى قۇقىق قورعاۋ قىزمەتىنىڭ جۇمىسىن جەڭىلدەتۋ ءۇشىن بولىنگەن قارجى تولىق يگەرىلىپ, ەلدى مەكەندەردەگى پوليتسيا پۋنكتتەرى ەسىك اشپاق. اتاپ ايتقاندا, ەڭبەكشىقازاق, جامبىل اۋداندارىندا 25 ۋچاسكەلىك پوليتسيا پۋنكتى, الاكول اۋدانىندا - ون توعىز, كەربۇلاقتا – 14, اقسۋ, ۇيعىر اۋداندارىندا – 13, پانفيلوۆ اۋدانىندا – 12, ىلە, بالقاش اۋداندارىندا – 11, ەسكەلدى اۋدانىندا – 10, كوكسۋ, كەگەن, تالعار, رايىمبەك اۋداندارىندا - 9, قاراساي اۋدانىندا – 8, سارقان, قاراتال اۋداندارى مەن تالدىقورعان قالاسىندا – 6, قاپشاعاي قالاسىندا – 2 جانە تەكەلىدە 1 پوليتسيا پۋنكتى جۇمىس ىستەيتىن بولادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
