بۇل جەڭىستىڭ بىزدەر ءۇشىن ءجونى بولەك. ولاي دەۋگە نەگىز, قازىرگى كەزدە ء«اۆتوموبيليستىڭ» قارقىنى وتە كۇشتى. قحل-دىڭ بيىلعى ماۋسىمىندا ولار 18 رەت مۇز ايدىنىنا شىعىپ, بارلىق باسەكەدە باسىمدىق تانىتتى. ياعني, قاتارىنان 18 جەڭىس! ايتۋلى كوماندانىڭ ويىنشىلارى 66 رەت نىسانانى ءدال كوزدەپ, ءوز قاقپالارىنا نەبارى 24 شايبا جىبەرىپ الدى. سونىڭ ناتيجەسىندە 36 ۇپايدى قورجىنعا سالعان ەكاتەرينبۋرگتىك كلۋب جارىس كەستەسىندە جەكە-دارا كوش باستاپ تۇر.
مىنە, وسىنداي ازۋلى كوماندامەن كۇش سىناسقان جەرلەستەرىمىز وتە كەرەمەت ويىن ورنەگىن كورسەتتى. ساۋاتتى تاكتيكا قولدانىپ, ءار ويىنشى وزىنە جۇكتەلگەن مىندەتتى اسقان جاۋاپكەرشىلىكپەن اتقارعاننىڭ ارقاسىندا «بارىس» ادۋىندى ء«اۆتوموبيليستى» ءسۇرىندىردى. ماتچتىڭ 15 جانە 26 مينۋتتارىندا كانادالىق لەگيونەر پاتريس كورمە سوققان قوس گولعا ايدىن يەلەرى ءبىر عانا شايبامەن جاۋاپ قايتارا الدى. ءبىزدىڭ قاقپاعى سوعىلعان جالعىز گولدىڭ اۆتورى كەزىندە «بارىستىڭ» نامىسىن قورعاپ, بۇل كۇندەرى ء«اۆتوموبيليستىڭ» ساپىندا ونەر كورسەتىپ جۇرگەن نايدجەل دوۋس ەكەنىن دە ايتا كەتۋگە ءتيىسپىز.
وسى جەڭىسىنەن كەيىن استانالىق كلۋب قحل-دىڭ تۇراقتى بىرىنشىلىگىنىڭ جارىس كەستەسىندە 10 ورىنعا كوتەرىلدى. 16 كەزدەسۋدەن كەيىن «بارىس» 22 ۇپايدى يەلەنىپ وتىر.
عالىم سۇلەيمەن,
«ەگەمەن قازاقستان»
