جوبا ماقساتى – جاس دارىندى بالالاردىڭ شىعارماشىلىعىن قولداۋ جانە ناسيحاتتاۋ ارقىلى ءداستۇرلى ءان, كۇي, بي ونەرلەرىن كاسىبي دەڭگەيدە ورىنداۋعا مۇمكىندىك جاساۋ.
ونەرلى جەتكىنشەكتەردىڭ ورەلى ونەرلەرىن بالالار مەن جاسوسپىرىمدەر اراسىندا كەڭىنەن ناسيحاتتاۋ بارىسىندا «دارىندار الەمى» ونەر جوباسىنىڭ ۇيىمداستىرۋىمەن 2018 جىلدىڭ 14 قازانىندا استاناداعى «قازمەديا ورتالىعىنىڭ» كونتسەرت زالىندا II حالىقارالىق بالالار مەن جاسوسپىرىمدەر ونەر بايقاۋى بولىپ, 30-عا جۋىق بي ۇجىمدارى قاتىسقان تارتىستى ونەر دوداسى ءوتتى. وعان ەلىمىزدىڭ ءار شالعايى مەن پاۆلودار, تالدىقورعان, قىزىلوردا, قاراعاندى, ەكىباستۇز قالالارىنان ءبيشى ونەرپازدار قاتىسىپ باعىن سىنادى.
قازىلار القاسىنىڭ شەشىمى بويىنشا باس جۇلدەلەردى 3-6 جاس ارالىعىندا استانادان قاتىسقان «ەركەم-اي» بي ءانسامبلى مەن قىزىلوردادان اتسالىسقان «سىر جۇلدىزى» بيشىلەر توبى يەلەنسە, 7-11 جاس ارالىعىنداعى ونەرپازدار اراسىنان تالدىقورعان قالاسىنان قاتىسقان «گورەتس» بي ءانسامبلى جەڭىمپاز بولىپ, باس جۇلدەنى قانجىعالارىنا بايلادى.
بەرىك سادىر,
«ەگەمەن قازاقستان»
