– سيمپوزيۋمعا قازاقستان مەن تۇركيا, قىتاي, يران, ازەربايجان, رەسەي, وزبەكستان ەلدەرىنەن كەلگەن بەلگىلى سۋرەتشىلەر قاتىستى, – دەيدى جوبا اۆتورى, مادەنيەت قايراتكەرى كاميلا جاپالوۆا. – ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە دوڭگەلەك ۇستەل باسىنا جينالعان قوناقتار بەينەلەۋ ونەرىنىڭ بۇگىنگى احۋالى جايلى ويلارىمەن ءبولىسىپ, جاس سۋرەتشىلەرمەن كەزدەستى. وتىزدان استام سۋرەتشى ۋنيۆەرسيتەت ستۋدەنتتەرىنە شەبەرلىك سىنىپتارىن وتكىزدى, بۇل جاس دارىنداردىڭ شىڭدالۋلارىنا سەپتىگىن تيگىزەرى انىق.
سۋرەتشىلەر كەزدەسۋىندە اتىراۋ قالاسى اكىمىنىڭ ورىنباسارى پولىمبەت حاسانوۆ «رۋحاني جاڭعىرۋ» باعدارلاماسى اياسىندا ايماقتا قولعا الىنىپ جاتقان جوبالار تۋرالى باياندادى. مادەني سەرىكتەستىكتى دامىتۋعا باعىتتالعان وسىنداي شارالار جۇيەلى تۇردە ۇيىمداستىرىلاتىنىن ايتتى. قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن قايراتكەرى يليا جاقانوۆ تەك كومپوزيتور عانا ەمەس, سۋرەتشى رەتىندە دە بەلگىلى. سيمپوزيۋم جۇمىسىنا بەلسەندى قاتىسقان ونەر قايراتكەرى جالپى وڭىردە مادەنيەتتى دامىتۋعا ايرىقشا كوڭىل ءبولىنىپ جاتقانىن اتاپ ءوتتى. شارا اياسىندا اتىراۋ قالالىق اكىمدىگى مەن حالىقارالىق «تۇركسوي» ۇيىمى جانە كيپر قازىرگى زامانعى مۋزەيى اراسىندا ىنتىماقتاستىق مەموراندۋمىنا قول قويىلدى.
كيپر تاياۋ شىعىس ۋنيۆەرسيتەتىنىڭ دەكانى, ديزاينەر ەردال ايگەنچ: «كەلەر جىلدىڭ كوكتەمىندە وسىنداي سيمپوزيۋمدى كيپردە وتكىزەمىز. قازاقستاندىق سۋرەتشىلەرمەن بىرگە جاڭا جوبالاردى قولعا الماق نيەتتەمىز», دەيدى. اتىراۋدا جوعارى دارەجەدە وتكەن اۋقىمدى شارا ەندى باسقا ەلدەردە جالعاسىن تابادى.
باقىتگۇل باباش,
«ەگەمەن قازاقستان»
اتىراۋ
