القالى جيىننىڭ نەگىزگى ماقساتى – ءبىلىم بەرۋ ساپاسىن ارتتىرۋ, اككرەديتتەۋ جانە رەيتينگىلىك زەرتتەۋلەردى قامتاماسىز ەتۋ جۇيەسىن دامىتۋ, حالىقارالىق ستاندارتتار بويىنشا ءبىلىم بەرۋ, وقۋ باعدارلامالارى جانە ءبىلىم الۋشىلاردى دايىنداۋ تراەكتورياسى ساپاسىن ارتتىرۋ, ەڭ ۇزدىك پراكتيكانى تالقىلاۋ ماقساتىندا حالىقارالىق ۇنقاتىسۋ الاڭىن قۇرۋ.
جيىن بارىسىندا ءبىلىم جانە عىلىم ۆيتسە-ءمينيسترى اسحات ايماعامبەتوۆ تۇلەكتەردىڭ بىلىكتى مامانعا اينالۋى مەملەكەت ءۇشىن ماڭىزدى ماسەلەلەردىڭ ءبىرى ەكەنىن تىلگە تيەك ەتىپ, بۇل ورايدا ەلىمىزدە اتقارىلىپ جاتقان جۇمىستارعا توقتالىپ ءوتتى.
«ەلباسى جاڭا جولداۋىندا جوعارى وقۋ ورىندارىنىڭ ساپاسىن كوتەرۋ بويىنشا الدىمىزعا ۇلكەن مىندەت قويىپ, بىرنەشە تاپسىرما بەرگەن بولاتىن. وسى باعىتتا ءبىلىم جانە عىلىم مينيسترلىگى ءتيىستى جۇمىس اتقارىپ جاتىر. بۇگىنگى تاڭدا ەۋروپادان, قىرعىزستاننان, فرانتسيادان, باسقا دا مەملەكەتتەردەن ساراپشىلاردى جيناپ, وسى ماسەلەنى تالقىلاۋ ۇستىندەمىز. ويتكەنى جوعارى ءبىلىمنىڭ ساپاسىن كوتەرۋ ماسەلەسى وتە وزەكتى تاقىرىپتاردىڭ ءبىرى. قازىردىڭ وزىندە بىرنەشە نورماتيۆتىك قۇقىقتىق قۇجاتتارعا مينيسترلىك ءتيىستى وزگەرىستەر ەنگىزىپ جاتىر. ەڭ باستى ماسەلەنىڭ ءبىرى – تۇلەكتەردى جۇمىسقا تۇرعىزۋ جايى. ءبىزدىڭ ويىمىزشا, جوو-نىڭ ساپالى ءبىلىم بەرىپ جاتقاندىعىنىڭ بىردەن-ءبىر بەلگىسى جۇمىسقا تۇرعىزۋ كورسەتكىشى دەپ ايتۋعا بولادى. ەگەر جوو جاقسى مامان دايىنداپ جاتسا, ارينە وندا نارىق تۇلەكتەردى جۇمىسقا قابىلدايتىن بولادى», دەدى ا.ايماعامبەتوۆ.
«ستاتيستيكا بويىنشا جوعارى وقۋ ورنىن بىتىرگەن تۇلەكتەردىڭ ءبىر جىلدا قانشاسى جۇمىسقا تۇرادى» دەگەن ءجۋرناليستىڭ قويعان سۇراعىنا ۆيتسە-مينيستر ەڭ باستىسى – مەملەكەتتىك زەينەتاقى قورىنىڭ كورسەتكىشى ەكەنىن ايتتى. «بۇل – رەسمي كورسەتكىش. ەگەر تۇلەكتەرىمىز جۇمىسقا ورنالاساتىن بولسا, وندا زەينەتاقى قورىنا تولەنەتىن قارجىنىڭ كورسەتكىشتەرى بولۋ كەرەك. سول كورسەتكىشتەرگە بايلانىستى ءبىتىرۋشى تۇلەكتەردىڭ جۇمىسقا ورنالاسۋ ماسەلەسى قانشالىقتى شەشىمىن تاۋىپ جاتقانىن بايقاي الامىز. ستۋدەنتتەردىڭ جۇمىسقا ورنالاسۋى جونىندە مالىمەتتى جوو-دان سۇرايتىن بولساق, ولار ءتۇرلى انىقتامالاردى جيناپ الىپ, بىزگە ءبىر مالىمەت بەرۋى مۇمكىن. سوندىقتان, ءبىز ءۇشىن ەڭ ءبىرىنشى جوعارى وقۋ ورىندارىنىڭ وزدەرىنىڭ اقپاراتى ەمەس, رەسمي مالىمەت, ياعني زەينەتاقى قورىنا تولەپ وتىرعان كورسەتكىشتەر ماڭىزدى. ەگەر تۇلەك جۇمىسقا ورنالاسسا, ونىڭ جالاقىسىنىڭ 10 پايىزى زەينەتاقى قورىنا اۋدارىلادى. سوندىقتان وسى كورسەتكىشتەر ارقىلى شىنايى اقپاراتقا قول جەتكىزە الامىز», دەدى ول.
فورۋم جۇمىسىنا ءماجىلىس دەپۋتاتتارى, قىرعىزستان, تاجىكستان, وزبەكستان, رەسەيدىڭ ءبىلىم جانە عىلىم مينيسترلىكتەرىنىڭ وكىلدەرى, جوعارى ءبىلىم بەرۋ ساپاسىن قامتاماسىز ەتۋ حالىقارالىق ەۋروپالىق جەلىلەرى, شەتەلدىك اكرەديتتەۋ ورگاندارىنىڭ وكىلدەرى قاتىستى.
راۋان قايدار,
«ەگەمەن قازاقستان»
