سوميني سەنگۋپتا, «نيۋ-يورك تايمس» – لوس-اندجەلەس
ەفيوپيانىڭ شاعىن اۋىلىنداعى ەلەكتر جارىعى جوق ۇيدە وسكەن بالانى اناسى باسىنان ءسۇيىپ, مەكتەپكە باراتىن جولعا سالىپ جىبەردى. انانىڭ وسيەتى شىندىققا اينالدى.
42 جاستاعى ابي مىرزا قازىرگى تاڭدا ەل پرەمەر-ءمينيسترى قىزمەتىن اتقارادى. سونداي-اق ول افريكاداعى ەڭ تانىمال تۇلعاعا اينالدى. ا.احمەد ەلىن تۇبەگەيلى وزگەرتۋدى قالايتىنىن مالىمدەپ ۇلگەردى.
ناۋرىزدا جاڭا قىزمەتكە كىرىسكەن ول ەفيوپيانىڭ جيىرما جىلعا جۋىق دۇشپانىنا اينالعان, كورشى مەملەكەت ەريترەيامەن مامىلەگە كەلدى. بۇدان بولەك, ول قاتاڭ مەملەكەتتىك باسقارۋداعى ەكونوميكانى جەڭىلدەتىپ, وزگەشە ويلايتىنداردى سوتتاۋمەن تانىلعان ەلدە كوپپارتيالى سايلاۋ وتكىزۋ تۋرالى شەشىم قابىلدادى. سونداي-اق بيلىكتى قاتتى سىنعا الىپ, ءتۇرلى تولقۋلار ۇيىمداستىراتىنداردى – شەتەلدەگى ەفيوپيا دياسپورالارىن قۇرمەتتەي باستادى. بۇعان دەيىن زاڭمەن قۋدالانعان وپپوزيتسيالىق توپتىڭ باسشىلارى 15 قىركۇيەكتە ەل استاناسىنا قايتا ورالدى.
العا قويىلعان مىندەت كوپ. ەفيوپيا – افريكاداعى حالقى كوپ ەكىنشى مەملەكەت. وندا 100 ميلليون ادام تۇرادى. سونداي-اق قۇرلىقتاعى سىرتقى كۇشتەر اسەر ەتۋگە تالپىناتىن ءوڭىردىڭ ءبىر بولىگى.
سوندىقتان شەشىمىن تاپپاعان ماسەلە كوپ: ميلليونداعان نارازى جاستار, كەدەيشىلىك, ەفيوپياداعى باسەكەلەس ەتنوستىق توپتاردىڭ تابيعي رەسۋرستار ءۇشىن قاندى قاقتىعىسى, بيلىكتى جاماندايتىن جالاقورلاردىڭ سىرتتان دا, ىشتەن دە شىعۋى. ولار وزگەرىسكە ىرزا ەمەس.
ابي مىرزانىڭ باستامالارى ەفيوپياعا ۇلكەن وزگەرىس اكەلەدى. بۇرىن قىتاي بيلىگىنە ۇقساس مودەلگە ارقا سۇيەگەن ەفيوپيا مەملەكەتتىك باسقارۋداعى ەكونوميكالىق ءوسىم مەن ساياسي پىكىر الۋاندىعىنا قارسى بولىپ كەلگەن.
بىراق ابي ەل تۇرعىندارىنىڭ باسىم بولىگى جاستار ەكەنىن جاقسى بىلەدى. قازىرگى تاڭدا ورتاشا جاس 18-ءدى قۇرايدى. تۇرعىندار ەكونوميكالىق جانە ساياسي ەركىندىكتى اڭسايدى.
«ەسىكتى تارس جابۋ – قاتە شەشىم», دەدى ول «نيۋ-يورك تايمسقا» بەرگەن سۇحباتىندا. ا.احمەد لوس-اندجەلەستە اقش-تا تۇراتىن ەفيوپيالىقتارمەن كەزدەسۋدە دە وسىنى ايتتى.
ازىرگە ءابيدىڭ ۋادەلەرى تولىق ورىندالعان جوق. ول ءالى ازاماتتىق قوعامعا سالىنعان تىيىمدى الىپ تاستاۋى كەرەك. ونىڭ ۇستىنە, باسقارۋشى توپ پەن ولاردىڭ ارىپتەستەرى بۇكىل ينستيتۋتتارداعى بيلىكتى الما-كەزەك اۋىستىرعان, پارلامەنتتەگى بۇكىل ورىنعا يە ەلدە ابي مىرزا ۋادە ەتكەن كوپپارتيالى سايلاۋ قالاي جۇرگىزىلەتىنى ازىرگە بەلگىسىز.
كاليفورنيالىق دەموكرات كارەن باسس تامىزدىڭ سوڭىنا تامان ا.احمەدپەن كەزدەسكەندە ونىڭ وزگەرىستەرىن قۇپتايتىنىن جەتكىزىپ, بىراق بىرقاتار قاۋىپتىڭ بار ەكەنىن ەسكەرتتى.
«ونىڭ باستامالارى كەرەمەت. بىراق كۇندەلىكتى تۇرمىس وزگەرمەسە, ادامدار شىدامسىزدانا باستايدى», دەيدى ك.باسس.
دەموكراتيالىق ۇستانىمداعى جاڭا باسشىنىڭ ەلىن قانشالىقتى كوركەيتەرىن ۋاقىت كورسەتەدى.
© 2018 The New York Times News Service
ماقالانى اۋدارعان اباي اسانكەلدى ۇلى,
«ەگەمەن قازاقستان»
