«SAT & Company» ساڭلاقتار قاتارىندا

«SAT & Company» اق باس مەكەمەسى الماتى قالاسىنا ورنالاسقان. ول نەگىزىنەن مۇناي ءونىم­دەرىنىڭ كوتەرمە ساۋداسىمەن, مۇناي-حيميا ونەر­كاسىبىمەن, مەتالل وڭدەۋمەن, اۋە تاسى­مالى­مەن, ەكونوميكانىڭ ەڭ جەدەل داميتىن سالا­لارى­نا ينۆەستيتسيا تارتۋمەن, مۇناي-گاز ما­شينا­لارىن قۇراستىرۋمەن شۇعىلدانادى. ەل ەكونوميكاسىنىڭ سان سالاسىن قامتىعان اتالمىش كومپانيا جامبىل وبلىسىنىڭ ورتا­لىعىنان تاراز مەتاللۋرگيا زاۋىتىن اشقالى دا ءبىراز جىل بولىپ قالدى. اتاپ ايتساق, 2006 جىلى ەلباسىنىڭ تاپسىرماسىمەن بۇرىنعى «حيمپروم-2030» جشس «تاراز مەتاللۋرگيا زاۋى­تى» بولىپ قايتا قۇرىلدى. زاۋىت ءا دەگەن­نەن-اق فەرروقورىتپالار ءوندىرىسىن جاڭعىرتۋ جانە كەڭەيتۋ جوباسىن قولعا الىپ, ءتامامدادى. بۇگىندە زاۋىتتىڭ ەكىنشى تىنىسى اشىلىپ, العا قاراي باسقان ادىمى قارىشتاي ءتۇستى. ونىڭ فەرروسيليكومارگانەتس, ەلەكترود ماسساسى, ءجون­دەۋ ماسساسىنا دەگەن ونىمدەرىنە سۇرانىستار دا كوپ. فەرروبالقىما ءۇشىن نەگىزگى شيكىزات بولىپ تابىلاتىن مارگانەتس شيكىزاتى باتىس قامىس, تۇيەباي-سىرتسۋ, ايتكوكشە كەن ورىن­دارىنان تاسىمالدانادى. ۋاقىت تالابى – ءوندىرىستى مودەرنيزاتسيالاۋ. ول شيكىزاتتى جان-جاقتى وڭدەپ, ەكسپورتقا باعىتتالعان ءوندىرىستى دامىتۋعا مۇمكىندىك بەرەدى. بۇگىنگى تاڭدا رەسەيلىك جانە ەۋروپالىق كاسىپ­ورىن­دار تاراپىنان زاۋىتتىڭ ونىمدەرىن ساتىپ الۋعا ناقتى تاپسىرىستار مول. تاپسى­رىستى تاپ-تۇيناقتاي ورىنداۋ ءۇشىن الەۋەتى دە زور. مىسالى, كاسىپورىن جىلىنا 100 مىڭ توننا فەرروسيليكومارگانەتس وندىرە الادى. ەندى وندىرىستىك باعدار­لاما بويىنشا جىلىنا 65 مىڭ توننا فەرروسيليكومارگانەتس شىعارۋ جوسپار­لانىپ وتىر. زاۋىتتى ودان ءارى دامىتۋ ءۇشىن ايىنا 21 مىڭ توننا مارگانەتس كونتسەنتراتىن جەتكىزىپ تۇرۋ قاجەت. بۇل ءوندىرىس ورنىنىڭ جاڭارۋىنا جانە بىرقاتار مارگانەتس كەنىشتەرىنىڭ وركەن­دەۋىنە سەپتىگىن تيگىزبەك. سونىمەن قاتار, «SAT & Company» اق تاراز فيليالىنىڭ ىسكە قو­سىلۋى قاراعاندى, پاۆلودار جانە تاراز قالا­لارىنىڭ بىرقاتار كاسىپورىندارىن تاپسىرىس­تارمەن قامتاماسىز ەتەتىن بولادى. تاراز مەتاللۋرگيا زاۋىتىن جاڭعىرتۋعا 11,6 ميلليارد تەڭگە جۇمسالدى. بۇل جوباعا قولداۋ كورسەتكەن – «قازاقستان دامۋ بانكى» اق. سونىڭ ارقاسىندا زاۋىتقا رەسەي, ۋكراينا جانە وتان­دىق جاڭا قۇرىلعىلار ورناتىلىپ, فەرروقو­رىت­پالار­دى وندەۋدىڭ جاڭا تەحنولوگيالارى ەنگىزىلدى. زاۋىتتىڭ قانات جايىپ, دامۋىنىڭ ارقاسى­ن­دا, جۇمىسشىلارىنىڭ سانى بۇگىندە 1700-كە جەتتى. سونداي-اق, بولاشاقتا تابىستىڭ بەلگىلى ءبىر بولىگى بىلىكتى مامانداردى دايىنداۋعا جۇمسالماقشى. قورشاعان ورتا مەن اۋانى زياندى قوسپا­لار­مەن لاستاماۋ ءۇشىن زاۋىتتا قۇنى 200 ميلليون تەڭگە بولاتىن گاز تازالاعىش قۇرىلعى سالۋ جوسپارلانعان. بۇل جوبا زياندى قوسپالارداعى قاتتى قالدىقتاردىڭ, ياعني ورگانيكالىق ەمەس شاڭ, مارگانەتس وكسيدتەرى, اليۋميني وكسيدتەرىن 97% تازارتادى. اتالعان قۇرىلعى اۋاعا كەتەتىن نەورگانيكالىق شاڭ قالدىقتارىن جىلىنا – 257,52, مارگانەتس وكسيدىن جىلىنا – 15, 84, اليۋميني وكسيدىن جىلىنا 14, 48 تونناعا كەمىتۋگە مۇمكىندىك بەرەدى. شىنىن ايتۋ كەرەك, ونەركاسىپتىڭ وركەندەپ, كاسىپورىنداردىڭ قارىشتاپ دامۋىنىڭ «اتتەگەن-اي» دەگىزەتىن جاعى دا بار. ول – تاراز قالاسى اۋماعىنداعى اۋىر ەكولوگيالىق احۋال. بىراق تاراز مەتاللۋرگيا زاۋىتىنىڭ اتالعان جوباسى ەكولوگيانىڭ ناشارلىعىنان پايدا بولاتىن اۋرۋلار سانىن ازايتا تۇسپەك. زاۋىت جۇمىسشىلارى تاياۋدا كەزەكتى فەررو­قوس­پالار پەشىنىڭ ىسكە قوسىلعانىنا قۋانىشپەن ەسكە الادى. ويتكەنى, قازاقستاننىڭ ۇدەمەلى يندۋستريالىق-يننوۆاتسيالىق دامۋ باعدارلاما­سىنا ەنگىزىلگەن بۇل جوبا وسى مەكەمەگە 11,5 ميلليارد تەڭگە ينۆەستيتسيا تارتۋ ارقىلى ولاردىڭ الەۋمەتتىك جاعدايىن بۇرىنعىدان دا جاقسارتا تۇسۋگە مۇمكىندىك بەرىپ وتىر. كوسەمالى ساتتىباي ۇلى. جامبىل وبلىسى.