سايلاۋ الدىنداعى ۇگىت-ناسيحات جۇمىستارىمەن اينالىسىپ جۇرگەن «ادىلەت» پارتياسى بۇقارا حالىققا نەعۇرلىم جاقىن كەلۋدىڭ جولدارىن ىزدەستىرىپ وتىرعانى بايقالادى. ورال قالاسىنداعى ءوندىرۋشى جانە وڭدەۋشى كاسىپورىنداردا ءارى ازىق-ت ۇلىك ساتاتىن نىسانداردا كوشپەلى كونفەرەنتسيالار ۇيىمداستىرۋعا ۇيىتقى بولعاندارى وسى پىكىرىمىزدىڭ دالەلى.
اتالعان ءىس-شارالاردىڭ مازمۇنىن بايىتۋ ءۇشىن اقجايىققا «ادىلەت» پارتياسى توراعاسىنىڭ ورىنباسارلارى ءۋاليحان قايساروۆ پەن ءمادي ارتىعاليەۆ كەلدى. ولارعا جول كورسەتىپ جۇرگەندەردىڭ قاتارىندا پارتيانىڭ وبلىستىق فيليالىنىڭ جەتەكشىسى مۇحيت بيسەنعاليەۆ پەن ونىڭ ورىنباسارى نۇرلان ءتاشىموۆ بار.
كوشپەلى كونفەرەنتسيا وبلىستاعى بىرقاتار نىساندار مەن ۇجىمداردى قامتىدى. اسىرەسە, ورال گاز-تۋربينالى ەلەكتر ستانساسىندا ينجەنەر-تەحنيك قىزمەتكەرلەرمەن بولعان باسقوسۋ قىزۋ وتكىزىلدى. بۇدان كەيىن ادىلەتتىكتەر ورال قالاسىنداعى «ەل ىرىسى» كوممۋنالدىق بازارىنا اتباسىن بۇردى. وسى جەردە ولار وزدەرىنىڭ ۇگىت-ناسيحات پاراقشالارىن تاراتىپ, بازارداعى باعانىڭ جاي-كۇيىمەن تانىستى.
– رەسپۋبليكامىزدا ازىق-ت ۇلىك باعالارىن رەتتەۋ مەن كوممۋنالدىق قىزمەت سالاسىندا شەشىلمەگەن ءتۇيىندەر جەتكىلىكتى. بۇل ورايدا ناقتى ىستەردەن گورى, ەشقانداي پايدا بەرمەيتىن قىزىل سوزدەردىڭ كوبەيىپ بارا جاتقانى ءبىزدى الاڭداتادى. تاريفتەردى وسىرمەي, كوممۋنالدىق قىزمەت ءورىسىن جاڭا ساتىعا كوتەرىپ, ازىق-ت ۇلىك باعالارىن جىلدىڭ ءتورت مەزگىلىندە تۇراقتى قالىپتا ۇستامايىنشا, الەۋمەتتىڭ كوڭىلى جايلانا قويمايدى. ارينە, عالامدىق قۇبىلىستاردىڭ ىشكى نارىققا اسەر ەتەتىنىن جوققا شىعارۋعا بولمايدى. سوعان قاراماستان, ۇكىمەت ونىڭ سالقىنى مەن زاردابى حالىققا بارىنشا از اسەر ەتۋىن قاداعالاۋى ءتيىس, – دەپ ءوز وي-پىكىرىن ءبىلدىردى كونفەرەنتسيادا «ادىلەت» پارتياسى باتىس قازاقستان وبلىستىق سايلاۋ شتابىنىڭ جەتەكشىسى باۋىرجان قازيەۆ.
بۇل كۇندەرى «ادىلەت» پارتياسى پارلامەنت ءماجىلىسى دەپۋتاتتىعىنان ۇمىتكەرلەر تىزىمىنە ەنگىزىلگەن ادامداردان ۇكىلەۋمەن بىرگە, ءماسليحاتتارعا دا ءبىرشاما كانديداتتارىن ۇسىنعانىن ايتا كەتكەن ءجون.
تەمىر قۇسايىن.
باتىس قازاقستان وبلىسى.
