جاقىندا استانا قالاسىندا قازاقستان كوممۋنيستىك حالىقتىق پارتياسىنىڭ قولداۋىمەن 5 جانە 15 جاس اراسىنداعى بالالار اراسىندا كاراتە-دو-دان چەمپيونات وتكىزىلدى. بۇل جارىس «التىن ايداھار» كاراتە-دو شوتوكان فەدەراتسياسىنىڭ باسشىلىعىمەن ءوتتى.
جاس كاراتەشىلەر الدىندا قكحپ حاتشىسى جامبىل احمەتبەكوۆ قۇتتىقتاۋ ءسوز سويلەدى. ول ءوز سوزىندە پارتيانىڭ جاستار اراسىنداعى دەنە تاربيەسىن دامىتۋعا ەرەكشە كوڭىل بولەتىندىگىن ايتا كەلىپ, ەلىمىزدىڭ جاستارىن بۇقارالىق سپورتقا ءتاربيەلەۋ ءۇشىن قولدان كەلگەننىڭ ءبارىن جاساۋ كەرەكتىگىن ەسكەرتتى. جارىس قورىتىندىسىندا پارتيا حاتشىسى جەڭىمپازداردى ماراپاتتاپ, كاراتە باسەكەسىندە ءوزى سەكىلدى قارا بەلبەۋگە جەتۋلەرىنە تىلەك ءبىلدىردى.
جامبىل احمەتبەكوۆ جاستايىنان وسى سپورت تۇرىمەن اينالىسىپ كەلەدى. ول تالاي جارىس مارەسىندە جەڭىمپاز تۇعىرىنان كورىنگەن. سپورتقا بەيىم حاتشىنىڭ ايتۋى بويىنشا, سايلاۋالدى ناسيحات جۇمىستارى ءادىل ءارى تۇسىنىكتى جۇرگىزىلۋ كەرەك. ول كاراتە سپورتى جاستاردىڭ شىمىر دا كۇشتى بولۋى ءۇشىن وتە قاجەت سپورت بولىپ تابىلادى.
قكحپ-نىڭ سايلاۋالدى ۇگىت-ناسيحات جۇمىسىن جۇرگىزۋ جوسپارىنا سايكەس پارلامەنت ءماجىلىسىنىڭ دەپۋتاتتىعىنان ەكى ۇمىتكەر اتىراۋ وبلىسىن ارالادى. بۇل وڭىردە كوممۋنيستىك حالىقتىق پارتيانىڭ بەلسەندىلەرى جەر-جەرلەردە ۇگىت-ناسيحات جۇمىستارىن جۇرگىزدى. اتاپ ايتقاندا, ولار اتىراۋ قالاسىنداعى مەديتسينالىق كوللەدجدە جۇزدەسۋ وتكىزىپ, پارتيانىڭ سايلاۋالدى تۇعىرناماسىمەن تانىستىردى. قالاداعى بازارلاردىڭ بىرىندە كوممۋنيستىك حالىقتىق پارتيا بەلسەندىلەرىمەن كەزدەسكەن سايلاۋشىلار شاعىن جانە ورتا بيزنەسكە قاتىستى وزدەرىن تولعاندىرعان ساۋالدارعا جاۋاپ الدى. كەزدەسۋ بارىسىندا بازارداعى جۇرت كوممۋنالدىق قىزمەت تولەمدەرى مەن ازىق-ت ۇلىك باعاسىنىڭ قىمباتتاۋىنا الاڭداۋشىلىق ءبىلدىردى.
پارتيا قاتارىنان دەپۋتاتتىققا كانديداتتار ءماجىلىس كوپپارتيالى بولۋى قاجەت ەكەندىگىن اتاپ كورسەتتى. ولار قاڭتارداعى سايلاۋدا حالىقتىڭ جەتكىلىكتى داۋىسىنا يە بولاتىن بولسا, قوعامداعى كەيبىر كەمشىلىكتەردى شەشەتىندىكتەرىن مالىمدەدى. جۇزدەسۋگە جينالعان جۇرت قازاقستان كوممۋنيستىك حالىقتىق پارتياسى ۇمىتكەرلەرىنىڭ سايلاۋالدى ۇگىت-ناسيحات جۇمىستارىنا ءتۇسىنىستىكپەن قاراپ, ۇمىتكەرلەرگە الداعى سايلاۋ دوداسىندا ساتتىلىك تىلەدى.
جىلقىباي جاعىپار ۇلى.
