سايلاۋ-2012
جاڭا جىل قارساڭىندا استانالىق نۇروتاندىقتار تاعى دا سايلاۋشىلارمەن كەزدەستى. جالپى, بۇل كۇندەرى «نۇر وتان» پارتياسىنىڭ ناسيحات جۇمىسى «ەسىكتەن – ەسىككە» ۇرانمەن ءجۇرىپ جاتىر. سايلاۋالدى ناۋقانعا ارنايى جاتتىعۋ ساباقتارىنان وتكەن 64 ەرىكتى جۇمىلدىرىلعان. بۇل جۇمىس كۇندەلىكتى جەدەل ۇگىت توپتارىندا, ۇگىت بەكەتتەرىندە جۇزەگە اسىرىلۋدا. ەڭ باستىسى, ول ءتۇرلى ورتادا, ءتۇرلى توپتاردا, سونىمەن قاتار, ناقتى وڭىرلەر مەن اۋدانداردا جەكە-جەكە اتاۋلى رەتتە قولعا الىنۋدا.
پارتيا تۇعىرناماسىن جان-جاقتى ءتۇسىندىرۋ بويىنشا ەلىمىز كولەمىندە ءۇش مىڭعا جۋىق جەدەل ۇگىت توپتارى ءجۇر. ولار قازىردىڭ وزىندە كوپتەگەن وتباسىلارىنا بارىپ ۇلگەردى. سونىمەن قاتار, بارلىق ءىرى ساۋدا ورتالىقتارىندا, بازارلاردا, قالالار مەن اۋىلداردا پارتيانىڭ ۇگىت بەكەتتەرى جۇمىس ىستەۋدە. ولاردىڭ سانى – رەسپۋبليكامىز بويىنشا ەكى جارىم مىڭ. نۇروتاندىقتار ۇگىت ماتەريالدارىن تاراتىپ, سايلاۋشىلارمەن اڭگىمەلەسەدى.
وسى كۇندەرى ۇگىت بەكەتتەرى ارقىلى 2 ميلليوننان استام ادام ءوتتى. سوندىقتان پارتيا ءوز مۇمكىندىگىن كەڭىنەن جۇزەگە اسىرىپ, قازاقستاندىقتاردىڭ جان-جاقتى قولداۋىن سەزىنىپ, جەڭىسكە دەگەن سەنىمىن ارتتىرا ءتۇستى.
«نۇر وتان» حالىقتىق-دەموكراتيالىق پارتياسىنىڭ ءتىزىمى بويىنشا پارلامەنت ءماجىلىسىنىڭ دەپۋتاتتىعىنان ۇمىتكەرلەردىڭ ءبىرى – ورال مۇحامەدجانوۆ تا سايلاۋشىلارمەن كەزدەسىپ, ۇگىت-ناسيحات جۇمىستارىن جۇرگىزۋدە. جاقىندا كانديدات قوستاناي وبلىسىنىڭ ناۋىرزىم, امانگەلدى, جانگەلدى سياقتى شالعاي اۋداندارىندا سايلاۋشىلارمەن كەزدەستى.
حالىقپەن بولعان بۇل جۇزدەسۋلەردە پارتيانىڭ «قازاقستان. 2017 جىل ماقساتتارى. ۇلتتىق ءىس-قيمىل جوسپارى» اتتى تۇعىرناماسىمەن تانىستىردى. «بۇل قۇجات مەملەكەت باسشىسىنىڭ ەل دامۋىنىڭ ستراتەگياسىن جۇزەگە اسىرۋعا باعىتتالىپ وتىر», – دەيدى ورال مۇحامەدجانوۆ.
ايماقتاردىڭ تۇرعىندارى قازاقستان تاۋەلسىزدىگىنىڭ 20 جىلدىعىندا جەتكەن جەتىستىكتەردەگى ەلباسىنىڭ ەرەن ەڭبەگىن اتاپ, وزدەرىنىڭ پارتيانى قولدايتىندىقتارىن ءبىلدىردى.
جەلتوقسان ايىنىڭ كولەمىندە ءماجىلىس دەپۋتاتتىعىنا كانديدات ورال مۇحامەدجانوۆ جوعارىدا اتالعان ءۇش اۋداندا جيىرماعا تارتا كەزدەسۋ وتكىزدى.
داستان كەنجالين.
