بۇل كۇندەرى ەكىباستۇزدا «قازاقستان حالىق بانكى» اق- بولىمشەسىنىڭ باستاماسىمەن «سۇيىكتى قالاعا سىيلىق» اتتى شارا وتكىزۋدە. جالپى, ەكىباستۇزدىقتار «سۇيىكتى قالامىز» دەپ ءوز تۋعان قالالارىن جاقسى كورەدى. بيىل 61 جىل تولعان تۋعان كۇنىن دە اتاپ ءوتتى.
ال, بانك ء وز قاراجاتتارىنىڭ ەسەبىنەن قالاداعى ءماشھۇر ءجۇسىپ اتىنداعى كوشە 75 تۇرعىن ءۇي اۋلاسىندا, ەنەرگەتيكتەر كوشەسىندە بالالارعا ارنالعان ويىن الاڭدارىن ورناتىپ بەرىپتى.
فيليال ديرەكتورى داۋرەن شەشەمبەكوۆتىڭ ايۋتىنشا, بانك باستاماسىمەن وتكىزىلەتىن شارالار كەنشىلەر قالاسىنىڭ كىشكەنتاي تۇرعىندارى-بالالارعا ارنالۋدا. بالالار ويىن كەزىندە جاراقات الىپ قالماس ءۇشىن, قاۋىپسىزدىك شاراسى ەسكەرىلىپ, ءۇي اۋلالارىنداعى ويىن الاڭدارىنا رەزەڭكە جابىندى ورناتىلدى.
بانك وكىلدەرىنىڭ «سۇيىكتى قالاعا سىيلىق» شاراسى ءار الۋان, قالا تۇرعىندارىن قىستا تەگىن كونكي تەبۋگە, تۋعان ولكەنىڭ شەجىرەلى تاريحىن كورىپ ءبىلۋ ءۇشىن «تۋعان ولكەڭدى ءبىل» اتتى جەرگىلىكتى مۋزەي جادىگەرلەرىن كورۋگە شاقىرادى. سوعىس جانە ەڭبەك ارداگەرلەرىنە دە ۋاقىت بولەدى, ورتالىق قالالىق اۋرۋحانادا ەمدەلىپ جاتقان كىشكەنتايلارعا بارىپ قايتتى. مەشىتتىڭ اۋلاسىنا اعاش ەگۋ سياقتى كوگالداندىرۋ جۇمىستارىن قولعا الۋدا.
قالادا ءالى دە بولسا, جوندەۋ كورمەگەن تۇرعىن ءۇي اۋلالارى بار. بانك وكىلدەرىنىڭ «سۇيىكتى قالاعا سىيلىق» باستاماسىن قولدايتىن باسقا دا ۇيىمدار, كاسىپكەرلەر نازارى تۇسەر دەپ سەنەدى تۇرعىندار. قالالىق اكىمدىكتىڭ تۇرعىن ء–ۇي كوممۋنالدىق شارۋاشىلىق ءبولىمىنىڭ مالىمەتتەرىنشە, ەندى «حالىق» بانكىنىڭ جەرگىلىكتى بولىمشەسى بيىلعى جىل سوڭىنا دەيىن 10 تۇرعىن ءۇيدىڭ اۋلاسىنا بالالارعا ارنالعان ويىن الاڭدارىن ورناتۋدى جوسپارلانىپ وتىر. الداعى جىلى قالاداعى بارلىق تۇرعىن ۇيلەر اۋلالارى تولىق جوندەلىپ, قوسىمشا فۋتبول جانە سپورت الاڭدارى قۇرىلادى. سونىمەن قاتار, جالپى اۋدانى 29 گەكتاردى قۇرايتىن باق جوباسى-قالانىڭ وزگەشە ءساندى دەمالىس ورنى قۇرىلىسى دا باستالماق.
فاريدا بىقاي,
«ەگەمەن قازاقستان»
پاۆلودار وبلىسى
