سەمەيدەگى سەرپىلىس
ۇكىمەت باسشىسى وڭىردەگى ساپارىن سەمەي قالاسىنان باستادى. اۋەلى شاھاردا جوندەۋ جۇمىستارى جۇرگىزىلىپ جاتقان اۋەجايدىڭ ۇشۋ-قونۋ جولاعىمەن تانىستى. ايتا كەتەيىك, 30 جىل بويى جوندەۋ كورمەگەن اۋەجايعا مەملەكەتتىك «نۇرلى جول» باعدارلاماسى ارقىلى 10 ملرد تەڭگەدەن استام قارجى بولىنگەن بولاتىن. جاڭعىرتۋ قورىتىندىسى بويىنشا اۋەجاي «ۆ» ساناتىنداعى حالىقارالىق اۋەجايلارعا ارنالعان يكاو (حالىقارالىق ازاماتتىق اۆياتسيا ۇيىمى) تالاپتارىنا ساي بولماق. ال بۇل 300 جولاۋشىعا دەيىن تاسىمالداي الاتىن Boeing, Airbus, يل-76 تۇرىندەگى اۋە كەمەلەرىن قابىلداۋعا مۇمكىندىك بەرەدى. ياعني, تاۋلىگىنە 25-30 رەيسكە دەيىن, ساعاتىنا 200 ادامعا دەيىن قىزمەت كورسەتۋگە جول اشىلادى.
پرەمەر-مينيستر بۇدان كەيىن قالاداعى جەدەل مەديتسينالىق جاردەم اۋرۋحاناسىندا بولدى. مۇنداعى وپەراتسيا جاساۋ, قابىلداۋ بولمەلەرى جاڭا Triaqe جۇيەسىنە كوشىرىلگەن. وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ جەدەل جاردەم اۋرۋحاناسى زاماناۋي جابدىقتارمەن قامتاماسىز ەتىلگەنىن, بيىلعى 8 اي ىشىندە 9 مىڭعا جۋىق ناۋقاسقا قىزمەت كورسەتىلگەنىن ايتىپ بەردى. سونىمەن قاتار وسى جەردە ب.ساعىنتاەۆقا وبلىستاعى «دەنساۋلىق» باعدارلاماسىنىڭ ورىندالۋى تۋرالى اقپارات ۇسىنىلدى.
ۇكىمەت باسشىسى ءوڭىردىڭ يندۋستريالىق دامۋىمەن, اتاپ ايتقاندا ماشينا جاساۋ سالاسىمەن تانىسۋ ماقساتىندا «Daewoo Bus Kazakhstan» جانە «سەماز» جشس-نا باردى. ب.ساعىنتاەۆ اۆتوقۇراستىرۋ زاۋىتىنىڭ جۇمىسىن كورىپ, تەحنولوگيالىق پروتسەسپەن جانە قوسالقى بولشەكتەر مەن اككۋمۋلياتورلار ءوندىرىسى جەلىسىمەن, ءتۇرلى دايىنداۋ ساتىلارىنداعى اۆتوكولىك قۇراستىرۋ ساپاسىمەن تانىستى. كاسىپورىننىڭ باس ديرەكتورى اسەمحان دوسقوجانوۆ 2017 جىلى 3 ملرد تەڭگەگە 136 اۆتوبۋس, ال بيىلعى قاڭتار-تامىز ايلارىندا 2,3 ملرد تەڭگەنىڭ ءونىمى ءوندىرىلىپ, كونۆەيەردەن 82 Daewoo اۆتوبۋس شىعارىلعانىن باياندادى.
پرەمەر-مينيستر سەمەي قالاسىنىڭ زيالى قاۋىم وكىلدەرىمەن دە جۇزدەستى. ەلباسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى بيىلعى جولداۋىنىڭ باسىم باعىتتارىنا جان-جاقتى توقتالدى. «مەملەكەت باسشىسىنىڭ بيىلعى جولداۋىنىڭ وزگەشەلىگى – ءاربىر قازاقستاندىققا ارنالعاندىعىندا. جولداۋدىڭ نەگىزگى وزەگى – حالىقتىڭ ءومىر ساپاسىن جاقسارتۋ. بۇل رەتتە ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, ءبىلىم جانە عىلىم مينيسترلىگىنە جۇكتەلگەن شارۋا جەتەرلىك. ەڭبەك جانە حالىقتى الەۋمەتتىك قورعاۋ مينيسترلىگى جاڭا جىلدان باستاپ ەڭ تومەنگى جالاقى مولشەرىن ءبىر جارىم ەسەگە ءوسىرۋى ءتيىس. ال اتقارۋشى بيلىك جەرگىلىكتى جەرلەردە مەملەكەتتىك باعدارلامالار بويىنشا تۇرعىن ۇيلەر سالۋى قاجەت. تۇرعىندار ەڭ الدىمەن بالا-شاعاسىن ويلايدى. قولىنداعى سوڭعى مالىن ساتسا دا, بالاسى ءبىلىم السا دەپ ارماندايدى. سوندىقتان جاس ۇرپاققا ءبىلىم بەرەتىن پەداگوگتەردىڭ مارتەبەسى جوعارى بولۋى ءتيىس. ءبىز قازىر ءبىلىم جانە عىلىم مينيسترلىگىمەن بىرلەسە مەكتەپ پسيحولوگى ماماندىعىنىڭ مارتەبەسىن كوتەرۋدى, ولاردىڭ جالاقىسى تۋرالى ماسەلەنى قاراستىرىپ جاتىرمىز», دەدى ب.ساعىنتاەۆ.
كەڭەستە ۇلتتىق ەكونوميكا, ەڭبەك جانە حالىقتى الەۋمەتتىك قورعاۋ, دەنساۋلىق ساقتاۋ, ءبىلىم جانە عىلىم, ينۆەستيتسيا جانە دامۋ, اۋىل شارۋاشىلىعى مينيسترلىكتەرى مەن «اتامەكەن» ۇكپ باسشىلارى جولداۋدى جۇزەگە اسىرۋ اياسىندا اتقارىلاتىن جۇمىستار جايلى باياندادى. ال سەمەي قالاسىنىڭ تۇرعىندارى مەملەكەت باسشىسىنىڭ جولداۋىندا ايتىلعان باستامالاردى قۋاتتاپ, قولدايتىنىن جەتكىزدى. كەزدەسۋدە «فيرما «ازيا» جشس-نىڭ قۇرىلتايشىسى اسەمحان دوسقوجانوۆ ەلباسىنىڭ الەۋمەتتىك باستامالارىنا قولداۋ كورسەتۋ ماقساتىندا كاسىپورىن قىزمەتكەرلەرىنىڭ ەڭ تومەنگى جالاقى مولشەرىن 50 پايىزعا كوتەرۋ تۋرالى شەشىم قابىلدانعانىن ايتتى. ء«بىز پرەزيدەنت جولداۋىندا العا قويىلعان مىندەتتەردى ىسكە اسىرۋعا ءازىرمىز», دەدى ول.
شاكارىم اتىنداعى سەمەي مەملەكەتتىك ۋنيۆەرسيتەتىنىڭ پروفەسسورى, بەلگىلى عالىم اراپ ەسپەنبەتوۆ مەملەكەت باسشىسىنىڭ جولداۋىندا پەداگوگتەردىڭ مارتەبەسىن ارتتىرۋ بويىنشا قويىلعان مىندەتتەردىڭ ماڭىزدىلىعى مەن ۋاقتىلى كوتەرىلگەنىن اتاپ ءوتىپ, پرەزيدەنتكە اباي ەلى مەن سەمەي حالقى اتىنان ىستىق ىقىلاسىن جەتكىزۋدى ءوتىندى.
ءوندىرىسى وسكەلەڭ ءوڭىر
ۇكىمەت باسشىسىنىڭ جۇمىس ساپارى ودان ءارى جارما اۋدانىندا جالعاستى. ب.ساعىنتاەۆ باقىرشىق تاۋ-كەن ءوندىرۋ كاسىپورنىندا بولدى. بۇگىنگى تاڭدا كەن ءوندىرۋ كەشەنىندە 1097 ادام جۇمىسپەن قامتىلىپ وتىر. ونىڭ ىشىندە 97,2 پايىزى – ەلىمىزدىڭ ازاماتتارى. بۇدان وزگە كاسىپورىنعا مەردىگەر ۇيىمداردىڭ 700-گە جۋىق قىزمەتكەرى تارتىلعان. قازىرگى كەزدە مۇندا جىلىنا 2 ملن توننا كەن وندىرەتىن تاۋ-كەن بايىتۋ كومبيناتىن سالۋ جوباسى ىسكە اسىرىلىپ جاتىر. جوبا يندۋستريالىق-يننوۆاتسيالىق دامۋ باعدارلاماسىنا ەنگەن. كاسىپورىنعا سالىنعان ينۆەستيتسيانىڭ جالپى كولەمى 133 ملرد تەڭگەدەن اسادى. ءوندىرىس ورنىن ارالاۋ بارىسىندا كومبيناتتىڭ باس ديرەكتورى يۋري وۆچيننيكوۆ كەن ءوندىرۋ كەشەنىنىڭ كۇللى ۇجىمى جولداۋداعى الەۋمەتتىك باستامالاردى قىزۋ قولدايتىندىعىن ەرەكشە اتاپ ءوتىپ, ءوز كەزەگىندە جۇمىسكەرلەرىنىڭ ەڭبەكاقىسىن ارتتىرۋ ماسەلەسى قارالىپ جاتقانىن تىلگە تيەك ەتتى.
ۇكىمەت باسشىسى بۇدان كەيىن وبلىس ورتالىعىنا كەلدى. وسكەمەندەگى جاڭا شاعىن اۋداندا ورىن تەپكەن №46 ورتا مەكتەپتە بولىپ, «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى تالاپتارىنا سايكەس جابدىقتالعان فيزيكا, بيولوگيا, حيميا جانە روبوتتى تەحنيكا كابينەتتەرىن, IT-سىنىپتى ارالاپ كورىپ, وڭىردەگى ءبىلىم بەرۋ ساپاسىنا وڭ باعاسىن بەردى. مەكتەپ ديرەكتورى گ.اۋعانباەۆا جاڭا موديفيكاتسياداعى سىنىپتار ينتەراكتيۆتى سەنسورلىق تاقتالارمەن, ميكروسكوپتارمەن, حيميالىق تاجىريبەلەرگە, بيولوگيا جۇمىستارىنا ارنالعان ارنايى جابدىقتارمەن جاراقتاندىرىلعانىن ايتتى.
بۇگىندە وبلىستا «نازارباەۆ زياتكەرلىك مەكتەپتەرى» ستاندارتتارىنا سايكەس 277 ورتا مەكتەپتى جاڭا موديفيكاتسيالاۋ جانە روبوتتى تەحنيكا سىنىپتارىمەن جابدىقتاۋ جۇمىستارى جۇرگىزىلدى. 1 قىركۇيەكتەن باستاپ 277 جالپى ءبىلىم بەرۋ مەكتەبىندە IT-سىنىپتارى اشىلدى.
سونداي-اق شىعىس قازاقستان وبلىستىق دراما تەاترىندا وتكەن وبلىس اكتيۆىمەن جانە قالا جۇرتشىلىعىمەن كەزدەسۋ بارىسىندا ب.ساعىنتاەۆ باستاعان ۇكىمەت مۇشەلەرى مەن ءوڭىر باسشىسى دانيال احمەتوۆ جولداۋ اياسىندا الداعى ۋاقىتتا قولعا الىناتىن جوبالار تۋرالى ايتا كەلىپ, جۇمىس ساپارىن قورىتىندىلادى. د.احمەتوۆ جولداۋدى جۇزەگە اسىرۋ بويىنشا ءار سالادا كەڭىنەن وڭىرلىك جۇمىس جوسپارى ازىرلەنگەنىن, نەگىزگى مىندەت حالىقتىڭ ءال-اۋقاتىن ارتتىرۋ, ءومىر ساپاسىن جاقسارتۋ, تابىسىن ەسەلەۋدەن تۇراتىنىن اتاپ ءوتتى.
راۋشان نۇعمانبەك,
ازامات قاسىم,
«ەگەمەن قازاقستان»
شىعىس قازاقستان وبلىسى
