«برەكسيت» ۇلىبريتانيا ەكونوميكاسىمەن قوسا تۇگەل ەۋروپا وداعىنىڭ ەكونوميكاسىنا دا كەسەل كەلتىرمەك», دەدى نەمىس ونەركاسىبى فەدەرالدى بىرلەستىگىنىڭ باسشىسى يواحيم لانگ.
ونىڭ ايتۋىنشا, اتالمىش جاعداي ورىن السا, مىڭداعان كومپانياعا ۇلكەن قاۋىپ تونبەك. بۇل تىزىمدە گەرمانيا دا بار. سوندىقتان نەمىس مەكەمەلەرى ءۇشىن بريۋسسەل مەن لوندوننىڭ ورتاق مامىلەگە كەلۋى ماڭىزدى بولىپ وتىر.
«بىرىككەن كورولدىكتىڭ ەۋروپا وداعىنان كەلىسىمسىز شىعۋ ىقتيمالى ءالى دە بار. ەۋرووداقتاعى شەشۋشى سامميت قارسانىندا جاعداي قيىنداي تۇسۋدە. ەگەر «برەكسيت» شەشىمى ماقۇلدانسا, ۇلكەن قاۋىپتەن قاشا المايمىز. بارىنەن بۇرىن, بريۋسسەل مەن لوندوننىڭ قاراشا ايىنىڭ ورتاسىنا دەيىن كەلىسىمگە كەلگەنى نەمىس ونەركاسىبى ءۇشىن ماڭىزدى», دەدى لانگ.
«سونىمەن قاتار, اۋىسپالى كەزەڭ كەزىندە ۇلىبريتانيانىڭ كەدەندىك وداق پەن ىشكى نارىقتا قالۋى نەمىس كومپانيالارى ءۇشىن وتە قاجەت. ەۋروپا مەن بريتانيا پارلامەنتى جاڭا زاڭناماسىن ناۋرىز ايىنا دەيىن بەكىتىپ ۇلگەرۋى ءۇشىن وزگەرىستەر بىرنەشە اپتا ىشىندە قابىلدانۋى كەرەك. باسقا جاعدايدا ەۋروپانى ۇلكەن داعدارىس كۇتىپ تۇر», دەدى فەدەرالدى بىرلەستىك باسشىسى.
