تۇركى ەلدەرىنە ورتاق ادەبيەت پەن مادەنيەتتى قايتا جاڭعىرتۋ, رۋحاني دۇنيەلەردى ۇرپاق جادىندا قالدىرۋعا ىقپال جاساۋ ماقساتىمەن وتكىزىلىپ وتىرعان شارا ىستانبۇل مادەنيەت ۋنيۆەرسيتەتىمەن بىرلەسە ۇيىمداستىرىلعان.
تۇركىستان وبلىسىنىڭ باسشىسى جانسەيىت تۇيمەباەۆ العاشقى بولىپ ءسوز الىپ, قاتىسۋشىلاردى سيمپوزيۋمنىڭ باستالۋىمەن قۇتتىقتادى. «بۇگىنگى سيمپوزيۋمنىڭ ءرولى ەرەكشە. ويتكەنى, بۇل تۇركىستان وبلىسى قۇرىلىپ, جاڭا وبلىس ورتالىعى تۇركىستان قالاسى بولىپ بەكىتىلگەن تۇستا ۇيىمداستىرىلىپ وتىرعان حالىقارالىق سيمپوزيۋم. تۇركىستان - تۇركى الەمىنىڭ رۋحاني ورتالىعى. مۇندا ەلدىڭ تاعدىرىنا قاتىستى كەلەلى ماسەلەلەر شەشىلگەن. بۇگىنگى جيىننان دا كۇتەرىمىز مول», - دەدى جانسەيىت قانسەيىت ۇلى.
كەيىن ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتى وكىلەتتى كەڭەسىنىڭ توراعاسى, پروفەسسور مۋسا يىلدىز, ىستانبۇل مادەنيەت ۋنيۆەرسيتەتىنىڭ رەكتورى, پروفەسسور يحسان كارامان, ق.ا.ياساۋي اتىنداعى حقتۋ پرەزيدەنتى, پروفەسسور بولاتبەك ءابدىراسىلوۆ, وقۋ ورنىنىڭ I ۆيتسە-پرەزيدەنتى جەنگيز تومار سيمپوزيۋمنىڭ ءمان-ماڭىزىنا كەڭىرەك توقتالدى. سونداي-اق باسقوسۋعا تۇركيا, قىرعىزستان, بوسنيا, ازەربايجان ەلدەرىنەن عالىمدار قاتىستى.
حالىقارالىق جيىن 11 تاقىرىپتىق باعىت بويىنشا وتەدى. اتاپ ايتقاندا, ادەبيەت, باق جانە مادەني زەرتتەۋ, ءبىلىم, ەكونوميكا, قۇقىق, مەملەكەتتىك باسقارۋ, قوعامدىق ساياسات, ساياساتتانۋ, الەۋمەتتانۋ, تاريح, حالىقارالىق قاتىناستار سىندى سالالار قامتىلماق. سيمپوزيۋم 13 قازانعا دەيىن جالعاسادى.
