«شەبەرحانا», «شىعارماشىلىق ەسەپ» دەگەنىمىزبەن, ءاسانالى ءاشىموۆتىڭ شاكىرتتەرىنەن قۇرالعان جاڭا تەاتر قاۋىرسىن قاناتىن جايىپ, ونەر الەمىنە قانات قاققان كۇن بولدى بۇل. كەز كەلگەن جاس تەاتردىڭ ماڭگى ومىرشەڭ كلاسسيكادان اتتاپ كەتە المايتىن ەجەلگى ءداستۇرى ەسكەرىلىپ, ومىرگە جولداما العان جاڭا ترۋپپا كوپشىلىككە م.اۋەزوۆتىڭ «قاراگوزىن» ۇسىندى.
پرەمەرا الدىندا قازاقستاننىڭ ەڭبەك سىڭىرگەن قايراتكەرى, PhD دوكتورى, تەاتر ديرەكتورى اسحات ماەميروۆ ءسوز الىپ, جاستارعا, جاڭا تەاترعا عاسىرعا قادام باسقان قاراشاڭىراق ونەر ورداسىنىڭ اتىنان قۇتتىقتاۋىن جەتكىزدى. ا.ماەميروۆ تەاتر ونەرىندە مۇنداي تاجىريبەنىڭ بۇرىننان كەزدەسەتىنىن, مىسالى, ماسكەۋدە «تاباكەركا» اتالىپ كەتكەن ولەگ تاباكوۆتىڭ تەاتر-ستۋدياسى, ۆسەۆولود شيلوۆسكيدىڭ تەاترى جۇمىس ىستەيتىنىن, ايگىلى شەبەرلەردىڭ ءوز شاكىرتتەرىنەن ترۋپپا جاساقتاپ, سپەكتاكلدەر قويۋى باسقا تەاترلاردى ديالوگقا شاقىرعان ادەمى قادام ەكەنىن اتاپ ءوتتى. «ەلباسى الداعى جىلدى – جاستار جىلى دەپ جاريالاپ جاتىر. جاستارعا جاساعان ناقتى قولداۋىمىز بولسىن دەپ, ء بىز وسىنداي شەشىم قابىلداپ, جاڭا تەاتردىڭ تۇساۋىن كەسكەلى وتىرمىز. ترۋپپا كورەرمەنگە العاشقى ءۇش قويىلىمىن ۇسىنعالى وتىر. «قاراگوز» م.اۋەزوۆ دراماتۋرگياسىنىڭ ءىنجۋى بولسا, ي.ءميچچيدىڭ «ارىستاندار پاتشالىعى» مۋزىكالىق دراماسى, ە.تاشكەنبايدىڭ «سوڭعى قوڭىراۋ» پوەتيكالىق دراماسى, كورەرمەن تاماشالايتىن ءۇش سپەكتاكل دە ءۇش ءتۇرلى جانردا ساحنالانعان, يدەياسى دا, ءپىشىنى دە ءبىر-بىرىنە ۇقسامايتىن دارا مىنەزدى سپەكتاكلدەر», دەدى جاڭا تەاترعا اقجول تىلەگەن تەاتر ديرەكتورى.
بۇدان كەيىن قازاقستاننىڭ حالىق ءارتيسى نۇكەتاي مىشباەۆا دا ۇلتتىڭ سالتىنا ساي جاس تەاترعا ساتتىلىك تىلەپ, كورەرمەنگە جاعالاتا شاشۋ شاشتى.
شاكىرتتەرىنىڭ ۇلكەن ساحناداعى ونەرى مەن العاشقى اياقالىسىنا قۋانىپ, العىسىن بىلدىرگەن ۇستازى ا.ءاشىموۆ كەلەشەكتە تەاتردىڭ جەكە عيماراتى دا بولۋى مۇمكىن ەكەنىن جەتكىزدى. ايتا كەتۋ كەرەك, ت.جۇرگەنوۆ اتىنداعى قازاق ۇلتتىق ونەر اكادەمياسىندا «تەاتر ونەرى» فاكۋلتەتىنىڭ ءاسانالى ءاشىموۆ شەبەرحاناسىندا 2014-2018 جىلدارى ءبىلىم الىپ, وسى جىلى عانا وقۋدى تامامداعان 30 جاس تۇلەك تۇتاس ءبىر ۇجىم رەتىندە الداعى ۋاقىتتا ۇزدىك قويىلىمدار قويىپ, زامان تالابىنا ساي جۇيەمەن جۇمىس ىستەۋدى كوزدەيدى.
ايگۇل احانبايقىزى,
«ەگەمەن قازاقستان»
الماتى
