ايماق باسشىسى ستراتەگيالىق قۇجاتتا الەۋمەتتىك-ەكونوميكالىق ماسەلەلەر جان-جاقتى قامتىلعانىن, ەل تۇرعىندارىنىڭ ءومىر ساپاسىن جاقسارتۋ باستى باسىمدىق رەتىندە ايقىندالعانىن, العا قويعان مىندەتتەردى جۇزەگە اسىرۋعا بارلىق مۇمكىندىكتەر قاراستىرىلعانىن جەتكىزە كەلىپ, جەرگىلىكتى جەرلەردە اتقارىلاتىن شارالارعا توقتالدى. ەلباسى تاپسىرمالارىنىڭ ىشىندە جاحاندىق باسەكەلەستىككە قابىلەتتىلىكتى ودان ءارى قامتاماسىز ەتە وتىرىپ, ەكسپورتقا باعىتتالعان ەكونوميكانى قالىپتاستىرۋ وتە ماڭىزدى. بۇل ورايدا وبلىس اگروونەركاسىپ كەشەنىنىڭ الەۋەتىن تولىق ىسكە قوسۋدىڭ ءمانى زور. نەگىزگى مىندەت ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2020 جىلعا قاراي 2,5 ەسە كوبەيتۋگە لايىقتى ۇلەس قوسۋ بولىپ تابىلادى. ءىرى سەرپىندى جوبالاردىڭ مەملەكەت تارپىنان قولداۋ تابۋى ارقاسىندا اگرارشىلار وزىق تەحنولوگيالاردى كەڭىنەن قولدانىپ كەلەدى. بيىلعى كۇزگى وراق ناۋقانى ۇيىمشىلدىقپەن اتقارىلىپ, گەكتار بەرەكەلىگى 18 تسەنتنەردەن اينالدى. «بابىق-بۇرلىق», «زەنچەنكو جانە ك», «شاعالا-اگرو» سەكىلدى سەرىكتەستىكتەر ءار گەكتاردان 40-28 تسەنتنەر ءونىم جيناي ءبىلدى. استىق ءوندىرىسىن ءارتاراپتاندىرۋ, تسيفرلىق جۇيەنى ەنگىزۋ باعىتىندا ارنايى باعدارلامالار جۇمىس ىستەيدى. بايانداماشى جەر قاتىناستارى سالاسىندا شەشىمىن تاباتىن ماسەلەلەرگە نازار اۋدارىپ, سوڭعى ءۇش جىلدا ماقساتسىز پايدالانىلعان 1,3 ميلليون گەكتار جەر تەلىمىنىڭ قايتارىلعانىن, ودان 1 ميلليون گەكتارى اۋىل شارۋاشىلىق اينالىمىنا قوسىلعانىن جەتكىزدى. وكىنىشتىسى سول, «بوگۆي», «ترانس اۆتو» سەكىلدى الپاۋىت كومپانيالاردىڭ الەۋمەتتىك جاۋاپكەرشىلىگىنىڭ تومەندەپ كەتكەنى سونشالىق, جىلدار بويى پاي ۇلەستەرىن بەرمەۋدى, جالاقى تولەمەۋدى ادەتكە اينالدىرعان. ونىمدىلىك كەمىپ كەتكەن. جۇمىسشى-قىزمەتكەرلەردىڭ ءومىر ءسۇرۋ دەڭگەيى ولاردى قىزىقتىرمايتىن سەكىلدى.
جولداۋ تالاپتارىنىڭ بىرى–شاعىن جانە ورتا بيزنەسكە, ەكسپورتتاۋشىلارعا قولداۋ كورسەتۋ, قايتا وڭدەۋ سەكتورىنا باسىمدىق بەرۋ, حالىق تۇتىناتىن تاۋارلاردىڭ اۋقىمىن كوبەيتۋ, ىشكى نارىقتى وتاندىق ونىمدەرمەن تولىقتىرۋ ەكەنىن اتاپ كورسەتكەن بايانداماشى بۇل باعىتتتار بويىنشا اتقارىلاتىن ىستەردىڭ جاي-جاپسارىن اڭگىمەلەدى. بيىل 3400 باس سيىرعا لايىقتالعان 8 ميلليارد تەڭگەنىڭ 7 جوباسى ىسكە قوسىلادى. سوندا جىلىنا 17 مىڭ توننا ءسۇت وندىرۋگە قوسىمشا مۇمكىندىك بەرەدى. ەكى ەت وڭدەيتىن كەشەن, قۇس فابريكاسى پايدالانۋعا بەرىلەدى. 8 ايدا 70 ميلليارد تەڭگەنىڭ اۋىل شارۋاشىلىق ونىمدەرى تەرەڭدەتىپ وڭدەلدى. ەكسپورت 1,2 ەسەگە ۇلعايىپ, يمپورت 10,3 پايىزعا ازايعان.
زالداعىلار جەرگىلىكتى بيۋدجەت ەسەبىنەن جەڭىلدەتىلگەن يپوتەكا بويىنشا العاشقى جارنانى سۋبسيديالاۋعا 200 ميلليون تەڭگە بولىنەتىنى, ءبىرىنشى كەزەكتە بيۋدجەت سالاسى قىزمەتكەرلەرى قامتىلاتىنى تۋرالى جاڭالىقتى قۋانىشپەن قابىلدادى. مۇنىڭ ءوزى «7-20-25» تۇرعىن ءۇي باعدارلاماسىنا قاتىسۋشىلار ءۇشىن قولجەتىمدىلىكتى ارتتىرا تۇسەرى ءسوزسىز. القالى باسقوسۋدا 43 مىڭ سولتۇستىكقازاقستاندىقتىڭ , ونىڭ ىشىندە 300 ۋچاسكەلىك دارىگەر مەن 750 مەيىربيكەنىڭ جالاقىسى وسەتىنى, وبلىس ورتالىعىندا 1500 ورىندى 2 ءبىلىم ءۇيى سالىنىپ جاتقانى, 120 مەكتەپتىڭ جوندەلەتىنى, 4 مىڭ كومپيۋتەر ورناتىلاتىنى, كەلەسى جىلى 1500 پاتەرلىك 12 كوپقاباتتى تۇرعىن ءۇي بوي كوتەرەتىنى, مەديتسينا مەكەمەلەرىنە 2,8 ميلليارد تەڭگەنىڭ جاڭا قوندىرعىلارى ساتىپ الىناتىنى, ورتالىق سۋ جۇيەسىنە 29 ەلدى مەكەننىڭ قوسىلاتىنى, مۇنىڭ ءبارى تۇرعىنداردىڭ ساپالى ءومىر ءسۇرۋ دەڭگەيىنە قولايلى جاعدايلار جاسايتىنى , الداعى ۋاقىتتا دا جاڭا مازمۇنمەن تولىقتىرىلاتىنى اتاپ ايتىلدى.
جولداۋدى تالقىلاۋعا «تايىنشا-استىق» اگروفيرماسىنىڭ باس ديرەكتورى اناتولي رافالسكي, كاسىپكەرلەر پالاتاسىنىڭ جەتەكشىسى دارحان قاليەۆ, ايىرتاۋ اۋدانىنىڭ اكىمى بەيبىت يسمانوۆ, پەتروپاۆل قالاسىنداعى № 23 مەكتەپتىڭ ۇستازى ازامات ەسىلباەۆ, تاعى باسقالارى قاتىسىپ, جولاۋدىڭ ءمان-ماڭىزىن اشىپ كورسەتتى. سولتۇستىكقازاقستاندىقتاردى ەلىمىزدەگى وزگەرىستەر ۇدەرىستەرىن بەلسەنە قولداۋعا شاقىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
