اۋعان سوعىسى ارداگەرلەرىنىڭ قالاۋى وسى
قارۋلى كۇشتەردىڭ ارداگەرلەرى مەن اۋعاندىق جاۋىنگەرلەر جاڭاوزەندە بولعان وقيعاعا جانە جەكەلەگەن ادامداردىڭ ۇكىمەت وتستاۆكاعا كەتسىن دەگەن تالابىنا بايلانىستى الاڭداۋشىلىق تانىتتى. جاڭا جىل قارساڭىندا استانادا وتكىزىلگەن باسپاسوز ءماسليحاتىندا اۋعان سوعىسى ارداگەرلەرى رەسپۋبليكالىق قوعامدىق ۇيىمى مەن «قارۋلى كۇشتەر ارداگەرلەرى» رەسپۋبليكالىق قوعامدىق ءبىرلەستىگىنىڭ ورتالىق كەڭەسى جەكەلەگەن ادامداردىڭ پىكىرلەرى بۇكىل اۋعان سوعىسى ارداگەرلەرىنىڭ كوزقاراسىن بىلدىرمەيتىندىگىن اتادى. – جەكەلەگەن ادامداردىڭ بۇكىل ارداگەرلەردىڭ اتىنان بۇقارالىق اقپارات قۇرالدارىنا وسىنداي ءوزدەرىنىڭ باستاماسىمەن شىققانىنا قاتتى وكىنەمىز, – دەدى ارداگەرلەر ۇيىمىنىڭ باسشىلارى. – بارلىق ماسەلەنى وركەنيەتتى تۇردە شەشۋ قاجەت. مەملەكەتتەگى ءتارتىپ پەن تۇراقتىلىق – بۇگىنگى جانە ەرتەڭگى جەتىستىكتەرىمىزدىڭ كەپىلى بولماق. «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگىنىڭ ءتوراعاسى گەنەرال-لەيتەنانت باقىتجان ەرتاەۆ ەلباسى ن.نازارباەۆتىڭ جاڭاوزەن تۇرعىندارىمەن بولعان كەزدەسۋدە ايتقان: «قازاقستان قوعامىنىڭ باستى قۇندىلىعى – تاۋەلسىزدىك, بەيبىتشىلىك جانە تىنىشتىق» دەگەن ءسوزىن كەلتىردى. ارداگەردىڭ پىكىرىنشە, ەلىمىزدىڭ قول جەتكەن تابىستارىن ساقتاپ, ونى دامىتا ءتۇسۋ ءۇشىن قازىرگى تاڭدا قازاقستاندىقتارعا بىرلىك پەن ءوزارا تۇسىنىستىك اۋاداي قاجەت. سونداي-اق, ارداگەرلەر مەملەكەت باسشىسىنىڭ تاپسىرماسىنا سايكەس ۇكىمەت جاڭاوزەن, شەتپە, اقتاۋ قالالارىندا ءتارتىپتى قالپىنا كەلتىرۋ ءۇشىن توتەنشە جاعدايلار شاراسىن تەز ارادا قولعا العانىن اتاپ ءوتتى. ۇكىمەت جاڭاوزەندى قالپىنا كەلتىرۋ ءۇشىن بارلىق قاجەتتى جاعدايدى جاساۋدا. قالاداعى الەۋمەتتىك-ەكونوميكالىق, گۋمانيتارلىق ءماسەلەلەر تەز ارادا شەشىلۋدە. وسىنىڭ ءبارى جاپپاي ءتارتىپسىزدىك كەزىندە زارداپ شەككەن ازاماتتاردىڭ تاعدىرىنا ەل باسشىلىعىنىڭ بەي-جاي قاراي المايتىنىن كورسەتەدى.قارۋلى كۇشتەر مەن اۋعان سوعىسىنىڭ ارداگەرلەرى اتىنان قوعامدىق ۇيىمداردىڭ جەتەكشىلەرى وتانداستارىمىزدى قانداي دا ءبىر ارانداتۋعا جول بەرمەۋگە, سىن ساعاتتا دانالىق تانىتىپ, تىنىشتىق ساقتاۋعا شاقىردى.
