بۇل دەرەكتەردى تۇركىستان وبلىسى اكىمى اپپاراتى مەملەكەتتىك قۇقىق ءبولىمىنىڭ باسشىسى ن.ەشەنقۇلوۆ سىبايلاس جەمقورلىقتىڭ الدىن الۋ جانە بولدىرماۋ جولدارى تالقىلانعان ماجىلىستە مالىمدەدى. جەمقورلىق دەرەكتەرى اسىرەسە, ءبىلىم سالاسىندا ءجيى كەزدەسەدى. مىسالى, جىل باسىنان بەرگى 8 ايدا ءبىلىم سالاسى بويىنشا 11 فاكتى تىركەلگەن. ونىڭ ىشىندە 5 مەكتەپ ديرەكتورى جانە ءبىر بالاباقشا مەڭگەرۋشىسى پارامەن ۇستالعان. بۇل ورايدا وبلىستىق ءبىلىم باسقارماسى باسشىسىنىڭ ورىنباسارى ا.سادىقوۆا كوررۋپتسيانىڭ الدىن الۋ ءۇشىن باسقارما تاراپىنان بىرقاتار قىزمەتتەردى تسيفرلاندىرۋ شارالارى قولعا الىنعانىن ايتىپ ءوتتى. ماسەلەن, بالاباقشالارعا جولداما بەرۋ جانە كەزەككە قويۋ اۆتوماتتاندىرىلىپ, 12 مىڭنان استام بالا بالاباقشاعا ورنالاسقان. ياعني, ادامي فاكتور ازايىپ, وتىنىشتەر ەلەكتروندى تۇردە رەتتەلگەن. 902 ورتا مەكتەپ mektep.sitcen.kz جۇيەسىنە قوسىلىپ, وقۋشىلار وسى ارقىلى مەكتەپكە قابىلدانىپ جاتىر. سونىمەن قاتار 902 ءبىلىم ۇياسىندا jumys.sitسen.kz جۇيەسى ەنگىزىلىپ, 2718 ءوتىنىش كەلىپ تۇسكەن. جۇيە قىزمەتى ارقىلى 321 مۇعالىم جۇمىسقا قابىلدانىپتى. ا.سادىقوۆانىڭ ايتۋىنشا, قازىرگى تاڭدا جۇيەدە 652 بوس جۇمىس ورنى تۋرالى مالىمەت تۇر. جاڭا جۇيە ديرەكتورعا نەمەسە باسقالارعا جولىقپاي جۇمىسقا ورنالاسۋعا مۇمكىندىك بەرەدى. ال تەحنيكالىق قىزمەتكەرلەردى جۇمىسقا قابىلداۋدى مەكتەپ ديرەكتورىنىڭ قۇزىرەتىنەن الىپ تاستاپ, اۋتسورسينگكە وتكىزۋ ۇسىنىسى قاراستىرىلىپ جاتىر ەكەن.
ماجىلىستە وبلىس اكىمى جانسەيىت تۇيمەباەۆ پاراقورلىققا, زاڭسىزدىققا جول بەرگەن لاۋازىمدى تۇلعالارعا قاتاڭ شارا قولدانىلاتىنىن ايتىپ, قىزمەتكەرلەرىنە ەسكەرتۋ جاسادى. حالىق اراسىندا سىبايلاس جەمقورلىققا قارسى مادەنيەتتى قالىپتاستىرۋ جۇمىستارىن قولعا الۋ, ءبىلىم بەرۋ ۇيىمدارىندا مادەني-اعارتۋشىلىق جۇمىستارىن اتقارۋ تاپسىرىلدى. سونداي-اق سىبايلاس جەمقورلىققا قارسى كوميسسيا جانىنان ىشكى تالداۋ جۇمىستارىن جۇرگىزۋ ءۇشىن جۇمىسشى توبى قۇرىلىپ, اۋدان, قالا اكىمدەرى مەن باسقارما باسشىلارى جەمقورلىققا قارسى كۇرەستى كۇشەيتۋى ءتيىس.
عالىمجان ەلشىباي,
«ەگەمەن قازاقستان»
