ءوز تاۋارلارىمىز كوبەيە ءتۇستى

11 ايدا شاعىن جانە ورتا بيزنەس سۋبەكتىلەرى وندىرگەن ءونىم كولەمى 2,5 پايىزعا ارتتى. كاسىپورىندار سانى قازاقستاندا 2011 جىلدىڭ قاڭتار-قازان ايلارىندا 4,2 پايىزعا ۇلعايدى. بۇگىندە ەلدە بەلسەندى جۇمىس ىستەيتىن شوب سۋبەكتىلەرى سانى 695 635 بىرلىكتى قۇرايدى. مۇنداي تەندەنتسيا, حالىقارالىق ساراپشىلاردىڭ ايتۋىنشا, ەلدەگى بيزنەس-احۋالدىڭ جاقسارۋىنان پايدا بولعان. بارلىعى تاۋەلسىزدىك جىلدارىندا شاعىن جانە ورتا بيزنەس سۋبەكتىلەرى 35 ەسەدەن استامعا ارتتى, دەپ اتاپ ءوتتى پرەزيدەنت نۇر­سۇل­تان نازارباەۆ 15 جەلتوقساندا تاۋەلسىز­دىكتىڭ 20 جىلدىعىنا ارنالعان سالتاناتتى جينالىستا. 1993 جىلعى 19 مىڭنان 2011 جىلى 671 مىڭعا دەيىن ۇلعايدى. ءبىزدىڭ 2 ميلليوننان استام ازاماتتارىمىز وسى سالادا وزدەرىنە جۇمىس تاپتى. سوڭعى 10 جىلدا ەكونوميكانىڭ وسى سەكتورىنىڭ شىعارعان ونىمدەرى 20 ەسە ءوسىپ, بۇگىندە 7 تريلليون تەڭگەنى قۇرايدى. بيىل بۇكىلالەمدىك بانكتىڭ رەيتينگىندە قازاقستان بيزنەس جۇرگىزۋدە, تمد-نىڭ بۇكىل ەلدەرىن ارتقا قالدىرا وتىرىپ, قۇرمەتتى 47-ءشى ورىن الدى, دەدى مەملەكەت باسشىسى. بۇكىلالەمدىك بانك پەن حالىقارالىق قار­جى كورپوراتسياسىنىڭ باعالاۋى بويىنشا, «بيز­نەستى جۇرگىزۋ-2012» رەيتينگىندە قازاق­ستان شەتەل ينۆەستورلارى ءۇشىن ورتالىق ازياداعى نەعۇرلىم تارتىمدى ەل بولىپ تا­بىلادى. «قازاقستان مۇددەلى جاقتار اراسىن­داعى مامىلەلەردى قۋاتتاۋعا قاتىستى تالاپ­تاردى وزگەرتىپ جانە مۇددەلى جاقتار ارا­سىنداعى مامىلەلەردەن ولقىلىق شىققان جاع­دايدا تالاپ-ارىز بەرۋ ۇدەرىسىن جەڭىلدە­تىپ, ينۆەستورلار قۇقىن قورعاۋدى كۇشەيتتى», دەلىنگەن بۇكىلالەمدىك بانكتىڭ بايانداما­سىندا. ەلىمىز 11 ساتىعا كوتەرىلىپ, 47-ءشى ورىن الدى – بۇل تمد ەلدەرى اراسىنداعى ەڭ جاقسى كورسەتكىشتەردىڭ ءبىرى. «Doing Business» رەيتينگىندە كاسىپكەرلىك قىزمەتتى رەتتەۋ جانە ينۆەستورلاردىڭ قۇقىقتارى مەن مۇددەلەرىن قورعاۋ جونىندەگى رەفورمالاردى ەنگىزۋگە, سول سياقتى 183 ەلدىڭ جەرگىلىكتى كومپانيالارىنا ىقپال ەتەتىن رەتتەۋشى نورمالارعا باعا بەرىلەدى. بۇتىندەي العاندا, كوپتەگەن پوزيتسيالار بويىنشا, ءتىپتى سالىق سالۋ مەن اكىمشىلەندىرۋ سياقتى بولىك­تە دە وڭ ناتيجەلەر الىندى, دەدى كارىم ءماسىموۆ 15 قاراشاداعى ۇكىمەت وتىرىسىندا. سونىمەن بىرگە, ول ەكى ينديكاتور بويىنشا قازاقستان پوزيتسياسىنىڭ جوعارى ەمەس ەكەنىن اتاپ ءوتتى. جۇرگىزىلگەن جۇمىستارعا قارا­ماس­تان «قۇرىلىسقا رۇقسات الۋ» جانە «حالىق­ارالىق ساۋدا» ينديكاتورلارى بويىنشا رەسپۋبليكا تيىسىنشە 147 جانە 176-شى ورىندار الادى. قۇرىلىس جانە تۇرعىن ءۇي-كوممۋنال­دىق شارۋاشىلىق ىستەرى اگەنتتىگى بازاسىندا توپ قۇرىپ, قۇرىلىس بويىنشا قوماقتى ناتيجەلەرگە جەتۋىمىز ءۇشىن تۇبە­گەيلى شارالار قابىلداۋ قاجەت, دەدى ۇكىمەت باسشىسى. ول ناتيجەلەردى جاقسارتۋ ءۇشىن بەلگىلى ءبىر ۇسىنىستار ازىرلەپ, ەنگىزۋ جونىندە ەكونو­ميكالىق دامۋ جانە ساۋدا مينيسترلىگىنە قارجى مينيسترلىگىمەن بىرلەسە جۇمىس ىستەۋدى تاپسىردى. ونىڭ سىرتىندا قارجى مينيسترلىگىنە ەڭ قىسقا مەرزىمدە ەلەكتروندى دەكلاراتسياعا كوشۋدى جۇكتەدى. بۇگىندە قازاقستاندا كاسىپورىندار ءوندى­رە­تىن ونىمدەر كولەمى 2,5 پايىزعا ارتتى, بۇل جونىندە ەكونوميكالىق دامۋ جانە ساۋدا ءمينيسترى قايرات كەلىمبەتوۆ 28 جەلتوقسانداعى ۇكىمەتتىڭ قورىتىندى وتىرىسىندا حابار­لادى. كاسىپكەرلىك دامۋىنىڭ نەعۇرلىم جاقسى كورسەتكىشتەرى سولتۇستىك قازاقستان, قوستاناي, اقمولا وبلىستارىندا بايقالادى, دەدى ول. سونىمەن بىرگە, استانادا قالانىڭ ستاتيستيكا دەپارتامەنتىنىڭ مالىمەتتەرى بويىنشا, رىنوكتا بەلسەندى جۇمىس ىستەيتىن شاعىن جانە ورتا كاسىپكەرلىك سۋبەكتىلەرىنىڭ سانى 2011 جىلدىڭ 1 جەلتوقسانىنا قاراستى 44,4 پايىزعا ارتىپ, 38926 بىرلىكتى قۇراعان. سوڭ­عى 2 جىلدا استانادا شاعىن كاسىپورىندار­دىڭ 10,8 مىڭ, بەلسەندى كاسىپورىنداردىڭ 7,4 مىڭ بىرلىككە تومەندەۋ ديناميكاسىنىڭ بايقالىپ وتىرعانىن اتاپ كورسەتۋ قاجەت. ستاتيستيكا اگەنتتىگىنىڭ مالىمەتتەرى بويىن­شا وڭتۇستىك استاناداعى بەلسەندى جۇمىس  ىستەيتىن كاسىپورىندار سانى تىركەلگەن كاسىپ­ورىنداردىڭ 50,2 پايىزىن قۇرايدى. زارينا كارىموۆا.