كەشە باس پروكۋراتۋرانىڭ رەسمي وكىلى ن.سۇيىندىكوۆ جاڭاوزەنگە بايلانىستى سوڭعى جاعدايدى ايتىپ بەردى. ول 16 جەلتوقساندا ورىن العان جاپپاي تارتىپسىزدىكتەرگە بايلانىستى قوزعالعان قىلمىستىق ىستەردىڭ ناتيجەسىندە 20 ادام ۇستالدى, ولاردىڭ 18-ءى سوتتىڭ سانكتسياسىمەن قاماۋعا الىندى, دەدى.
جاڭاوزەن قالاسىنداعى ءتارتىپسىزدىكتەر ناتيجەسىندە 16 ادام قايتىس بولدى. دەگەنمەن, رەسمي وكىلدىڭ ايتۋىنشا, ولاردىڭ كەيبىرەۋلەرىنىڭ ءولىمى قۇقىقتىق ءتارتىپتى قورعاۋ ورگاندارىنىڭ ارەكەتتەرىمەن بايلانىستى ەمەس كورىنەدى. ماسەلەن, قايتىس بولعان ليتسەي وقىتۋشىسى اتابەرگەن ءدۇيسەكەنوۆتىڭ اكەسى ءوزىنىڭ ۇلىن تاربيەلەنۋشىلەرىن مەرەكەلىك شارالارعا الىپ شىققانى ءۇشىن بۇزاقىلار ولتىرگەنىن حابارلاعان. ال ءمايىتى «سۋلپاك» دۇكەنىندە تابىلعان نۇرلان مۇنالباەۆتىڭ ءولىمىنىڭ سەبەبى جوعارى تەمپەراتۋرانىڭ اسەرى ەكەن.
سول سياقتى اتاباي قۇلقايروۆتى ءولتىرۋ قىلمىسى اشىلعان. بۇل قىلمىستى جاساعان دەگەن كۇدىكپەن جاڭاوزەن قالاسىنىڭ ءبىر تۇرعىنى قاماۋعا الىندى. كۋالەردىڭ ايعاقتارى بويىنشا ءدال وسى ادام 2011 جىلدىڭ 17 جەلتوقسانىندا جاڭاوزەن قالاسىنىڭ 5-ءشى مولتەك اۋدانىندا قۇلقايروۆقا وق اتقان.
وسىلايشا, تەرگەۋمەن ادامداردىڭ قازا بولۋىنىڭ ءاربىر فاكتىسى بويىنشا, ونىڭ ىشىندە قىلمىستىڭ جولىن كەسۋدە قاجەتتى شارالاردىڭ شەگىنەن شىعىپ تابەلدىك قارۋ قولدانعان پوليتسيا قىزمەتكەرلەرى ارەكەتتەرىنىڭ زاڭسىزدىعى تۋرالى حابارلار بويىنشا دا دەرەكتەر انىقتالۋدا جانە قۇقىقتىق باعا بەرىلۋدە دەيدى. بۇل ورايدا باس پروكۋراتۋرا 2011 جىلدىڭ 27 جەلتوقسانىندا پوليتسيا قىزمەتكەرلەرىنىڭ قارۋدى ادامدارعا قاراي اتۋ ءناتيجەسىندە ولىمگە سوقتىرۋ دەرەگى بويىنشا قىلمىستىق كودەكستىڭ 308-بابى 4-بولىگىنىڭ «ب» تارماعىمەن قىلمىستىق ءىس قوزعاعان. شىنايىلىقتى قامتاماسىز ەتۋ ماقساتىندا بۇل ءىس ارنايى پروكۋروردىڭ باسشىلىعىنداعى توپپەن تەرگەلۋدە. قازىرگى ۋاقىتتا ءىس بويىنشا ءبىرقاتار قاجەتتى سوت ساراپتامالارى تاعايىندالدى. ونىڭ جۇمىسىنا ماڭعىستاۋ وبلىسى ارداگەرلەر كەڭەسىنىڭ ءتوراعاسى ومىرزاق وزعانباەۆتىڭ باسقارۋىمەن قوعامدىق كوميسسيا تارتىلدى. كوميسسيا مۇشەلەرىنىڭ قالالىق مۇردەحاناعا, ۋاقىتشا ۇستاۋ اباقتىسىنا بارۋى جانە قىلمىستىق ءىس بويىنشا ۇستالعان تۇلعالارمەن كەزدەسۋى قامتاماسىز ەتىلدى.
قالا تۇرعىندارىن زاڭسىز ۇستاۋعا جانە ولارعا تىيىم سالىنعان تەرگەۋ ادىستەرىن (قيناۋ) قولدانۋعا قاتىستى شاعىمداردى قاراۋ ماقساتىندا بولەك كوميسسيا قۇرىلدى. ونىڭ قۇرامىنا پروكۋراتۋرا جانە باسقا قۇقىق قورعاۋ ورگاندارى قىزمەتكەرلەرىمەن قاتار ەڭبەك ارداگەرلەرى, قالانىڭ اقساقالدارى, ۇكىمەتتىك ەمەس ۇيىمداردىڭ مۇشەلەرى, سونداي-اق جاپپاي تارتىپسىزدىك كەزىندە جانە ودان كەيىن ۇستالعان ادامداردىڭ تۋىستارى ەندى.
كوميسسيا مۇشەلەرىنە قاماۋعا الىنعانداردىڭ جانە اكىمشىلىك تارتىپپەن ۇستالعانداردىڭ تىزىمدەرى ۇسىنىلدى, ولارمەن ۋاقىتشا ۇستاۋ اباقتىسىنا, اكىمشىلىك قاماۋعا الىنعاندارعا ارنالعان قابىلداعىشقا بارۋ جۇزەگە اسىرىلدى. ءسويتىپ, كوميسسيا مۇشەلەرى ۇستالعاندارمەن اڭگىمەلەستى, ولاردى ۇستاۋ جاعدايىن جەكە ءوزدەرى كورىپ, دەنساۋلىقتارى دۇرىس ەكەندىگىنە كوز جەتكىزدى. سونداي-اق, كوميسسيا مۇشەلەرى قالالىق ءىىب-نىڭ شارۋاشىلىق اۋلاسىن, گاراجدارىن جانە قالالىق اۋرۋحانانىڭ جەرتولەسى مەن مۇردەحاناسىن قاراپ شىقتى. بۇل شارا كوميسسيا مۇشەلەرىنە ادامداردى زاڭسىز ۇستاۋ, ولاردى قورلاۋ جانە ءولتىرۋ تۋرالى قاۋەسەتتەردىڭ نەگىزسىزدىگىنە كوز جەتكىزۋلەرى ءۇشىن قاجەت بولدى.
وسىنداي قاۋەسەتتەردىڭ نەگىزدىگىن انىقتاۋدا قۇقىق قورعاۋ ورگاندارى جاڭاوزەن قالاسىنداعى وقيعالارعا قاتىستى رەسمي قۋاتتالماعان اقپاراتتاردى دا تەكسەرۋدە ەكەن. ماسەلەن, كەيبىر بۇقارالىق اقپارات قۇرالدارى ارقىلى ءوزىنىڭ كەلىنى شولپان جاڭاوزەن قالاسىنداعى جاپپاي ءتارتىپسىزدىكتەر كەزىندە مەرت بولعان 23 ادامنىڭ كوزدەرىن جاپقانىن ايتقان ا.ۋنگاروۆادان جاۋاپ الىندى, دەيدى رەسمي وكىل. وسى ورايدا سۇرالعان شولپان وتەكەەۆا ۋنگاروۆانىڭ سوزدەرىن جوققا شىعاردى جانە ولگەندەردىڭ كوزدەرىن جاپپاعانىن, ءوزى تىكەلەي 2011 جىلعى 16 جەلتوقساندا قازا بولعان تەك 3 ادامدى كورگەنىن حابارلادى. سونىمەن قاتار, ول ۋنگاروۆاعا كەلىن ەمەس كورىنەدى. سوندىقتان دا قازىرگى ۋاقىتتا ا.ۋنگاروۆانى بۇقارالىق اقپارات قۇرالدارىنا كورىنەۋ جالعان ءمالىمەتتەر بەرگەنى ءۇشىن اكىمشىلىك جاۋاپكەرشىلىككە تارتۋ ماسەلەسى قارالۋدا, دەدى ن.سۇيىندىكوۆ.
الەكساندر تاسبولاتوۆ.
