جاڭا جولداۋدىڭ ەلدىڭ الەۋمەتتىك الەۋەتىن ارتتىرۋدان بولەك, رۋحاني مازمۇنى دا تەرەڭ. تاريحي قۇجاتتىڭ جۇيەلى جۇزەگە اسۋىنا, قوعامدىق وي-پىكىر قوزعاۋدا قالامگەرلەر قاۋىمى دا قالىس قالماي, بەلسەندىلىك تانىتپاق. ەلباسى ءوز جولداۋىندا الداعى جىلدى جاستار جىلى دەپ جاريالاعانى بەلگىلى. وسىعان وراي جازۋشىلار وداعى جاستار شىعارماشىلىعىن جان-جاقتى دامىتۋعا ارنالعان ارنايى باعدارلاما ازىرلەمەك. جوبادا جاستار پوەزياسى مەن پروزاسىن دامىتۋ, دراماتۋرگيا مەن سىن جانرىنا سونى سەرپىن بەرۋ باستى باعىتتاردىڭ ءبىرى بولماق.
قازاقستان جازۋشىلار وداعى باسقارما توراعاسىنىڭ ورىنباسارى اقىن باۋىرجان جاقىپ: «مەملەكەت باسشىسى ءسوز باسىندا ەلىمىزدىڭ سان سالادا قول جەتكىزگەن ەلەۋلى جەتىستىكتەرىن ءتۇيىپ-ءتۇيىپ ايتىپ كەتتى. راسىندا كوڭىل قۋانتارلىق جەتىستىكتەر كوپ-اق. ەلباسى كەلەر جىلدىڭ قاڭتارىنان باستاپ ەڭ تومەنگى جالاقى مولشەرى 1 جارىم ەسەگە, ياعني 28 مىڭنان 42 مىڭعا دەيىن وسەتىندىگىن ايتتى. سونىمەن قاتار 3 جىلدىڭ ىشىندە وڭدەۋ ونەركاسىبى مەن شيكىزاتتىق ەمەس ەكسپورتتى قولداۋعا 500 ميلليارد تەڭگە بولىنەتىندىگى, باسىمدىعى بار جوبالارعا قولجەتىمدى نەسيە بەرۋ ءۇشىن ۇلتتىق بانكتەن كەمىندە 600 ميلليارد كولەمىندە ۇزاق مەرزىمگە قارجى ءبولۋ ءىسى تاپسىرىلدى. مۇنىڭ ءبارى حالىققا جاسالىپ وتىرعان ۇلكەن قولداۋ. اسىرەسە, پەداگوگتىڭ مارتەبەسى تۋرالى زاڭ قابىلداۋ ماسەلەسى وتە وڭدى دۇنيە. «الاش بالاسىنىڭ باسى قوسىلسا, ءتور مۇعالىمدىكى» دەيتىن ماعجان ءسوزىنىڭ باسىرەسىن بيىكتەتىپ, ۇستازدارىمىزدىڭ مارتەبەسىن ءوسىرۋ ۇلتتىڭ بولاشاعى ءۇشىن جاسالعان يگى قادام» دەيدى.
باسقوسۋ بارىسىندا زيالى قاۋىم جازۋشىلاردىڭ قوعامداعى ءرولى, جاستار ادەبيەتىن قولداۋ, جولداۋدى ىسكە اسىرۋدا قالامگەرلەر قاۋىمىنا ارتىلعان جاۋاپكەرشىلىك تۇرعىسىندا اڭگىمە ءوربىتىپ, ءوز ۇسىنىستارىن ورتاعا سالدى.
– كەز-كەلگەن جولداۋ جازۋشىلارعا تىكەلەي قاتىستى. ويتكەنى «رۋحاني جاڭعىرۋ» باعدارلاماسىنا بايلانىستى بارلىق جۇمىستارعا قازاقستان جازۋشىلار وداعى تىكەلەي قاتىسادى دەپ ەلباسى قاداپ ايتقان بولاتىن. بۇل قالامگەرلەر ءۇشىن ۇلكەن مارتەبە ءارى زور مۇمكىندىك. جولداۋدى جازۋشىلار قىزۋ تالقىلادى. كەلەسى جىل جاستار جىلى بولاتىنى ۇلكەن جاڭالىق بولىپ جاتىر. ويتكەنى ءبىزدىڭ جازۋشىلارىمىز ۇنەمى كەيىنگى تولقىنمەن تولىعىپ, ادەبيەتكە تولقىن-تولقىن جاستار كەلىپ وتىرۋى كەرەك, – دەيدى جازۋشى درامماتۋرگ ءسۇلتانالى بالعاباەۆ.
بۇدان بولەك بەلگىلى جازۋشىلار مارال ىسقاقباي مەن احمەتجان اشيري, اقىن ليۋبوۆ شاشكوۆا مەن عالىم تەمىرحان تەبەگەنوۆ ءسوز الىپ, حالىققا ساپالى الەۋمەتتىك قىزمەت كورسەتۋ, ءبىلىم مەن مەديتسينا سالاسىن دامىتۋ, حالىق تابىسىنىڭ ءوسۋى سىندى جولداۋدا قامتىلعان بىرقاتار تاقىرىپتارعا قاتىستى ءوز وي-پىكىرلەرىن ءبىلدىردى.
ارمان وكتيابر,
«ەگەمەن قازاقستان»
الماتى
