قر ۇلتتىق ەكونوميكا ءمينيسترى ت. سۇلەيمەنوۆتىڭ ايتۋىنشا, جالپىۇلتتىق جوسپاردا ەلىمىزدىڭ دامۋى ءۇشىن قولعا الىناتىن نەگىزگى التى مىندەت بويىنشا 100 ءىس-شارا قامتىلعان.
مەملەكەت باسشىسى جولداۋداعى ءبىرىنشى تاپسىرما — «حالىق تابىسىنىڭ ءوسۋى» مىندەتى بويىنشا قازاقستاندىقتاردىڭ ءال-اۋقاتىنىڭ وسۋىنە ەرەكشە نازار اۋداردى. بۇل ماقساتقا جەتۋ ءۇشىن قازاقستاندىقتاردىڭ تابىسىن ارتتىرىپ, ءومىر ءسۇرۋ ساپاسىن جاقسارتۋعا باعىتتالعان 24 ءىس-شارا قاراستىرىلىپ وتىر.
«قازاقستاندىقتار ءۇشىن اسا ماڭىزدى شارالاردىڭ ءبىرى – 2019 جىلعى 1 قاڭتاردان باستاپ ەڭ تومەنگى جالاقى مولشەرىن بىرتىندەپ 1,5 ەسە ارتىرۋ شاراسى. حالىقتىڭ كىرىسىن قورعاۋ ءۇشىن زاڭناماعا تاريف بەلگىلەۋ تەتىگىنىڭ, كوممۋنالدىق قىزمەتتەردى تۇتىنۋشىلاردىڭ قاراجاتىن پايدالانۋدىڭ اشىقتىعىن قامتاماسىز ەتۋ ءۇشىن وزگەرىستەر ەنگىزىلەتىن بولادى. بيزنەستى ءتيىمدى قولداۋ ماقساتىندا 2025 جىلعا دەيىنگى بيزنەستىڭ جول كارتاسى باعدارلاماسى جالعاستىرىلادى», — دەدى ت. سۇلەيمەنوۆ.
«تۇرمىس ساپاسىن ارتتىرۋ» ەكىنشى مىندەتتىڭ اياسىندا ەكى ماڭىزدى سالا — ءبىلىم بەرۋ جانە دەنساۋلىق ساقتاۋدى قامتيتىن 24 ءىس-شارا كوزدەلگەن. ۇلتتىق ەكونوميكا ءمينيسترىنىڭ مالىمدەۋىنشە, وقۋشىلار ورنىنىڭ تاپشىلىعىن جويۋ جانە ءۇش اۋىسىمدى مەكتەپتەر پروبلەماسىن شەشۋ ماقساتىندا وسى جىلدىڭ سوڭىندا وڭىرلەردە مەكتەپتەردىڭ قۇرىلىسى باستالاتىن بولادى.
دەنساۋلىق ساقتاۋ سالاسىندا مەديتسينا قىزمەتتەرىنىڭ ساپاسىن ارتتىرۋ ءۇشىن 2019 جىلعى 1 قاڭتاردان باستاپ بارلىق ەمحانالار مەن اۋرۋحانالار مەديتسينالىق قۇجاتتامانى قاعازسىز, تسيفرلىق تۇردە جۇرگىزۋگە كوشەدى.
«بيىل استانادا ۇلتتىق عىلىمي ونكولوگيالىق ورتالىقتىڭ قۇرىلىسى باستالادى. ول قازىرگى زامان تالابىنا جاۋاپ بەرەتىن قۇرىلعىلارمەن جابدىقتالادى. حالىقتى ساپاسىز جانە دەنساۋلىققا قاۋىپتى تاۋارلار مەن قىزمەتتەردەن قورعاۋ ماقساتىندا تاۋارلار مەن قىزمەتتەر ساپاسىن جانە قاۋىپسىزدىگىن باقىلاۋ كوميتەتى قۇرىلادى», — دەدى ت. سۇلەيمەنوۆ.
ۇلتتىق ەكونوميكا ءمينيسترى جالپىۇلتتىق جوسپاردىڭ بارلىق شارالارى تۇرعىن ءۇي جاعدايلارىن جاقسارتۋعا, ەلىمىزدىڭ كەز كەلگەن ەلدى مەكەنىندە جايلى ءارى قاۋىپسىز ءومىر سۇرۋگە جاعداي جاساۋعا باعىتتالعانىن اتاپ ءوتتى.
بۇعان قوسا, ەلىمىزدى ءتيىمدى اۋماقتىق ۇيىمداستىرۋ ماقساتىندا ەلىمىزدى اۋماقتىق-كەڭىستىكتىك دامىتۋدىڭ 2030 جىلعا دەيىنگى بولجامدى سحەماسى قابىلداناتىن بولادى, بۇل ەلىمىزدىڭ باسقارىلاتىن كەنتتەنۋىنىڭ جاڭا كارتاسىنا اينالادى. ءمينيستردىڭ ايتۋىنشا, وڭىرلەردى دامىتۋدىڭ 2025 جىلعا دەيىنگى باعدارلاماسى ناقتى ءىس-شارالارىن, جوبالارى مەن قارجىلاندىرۋ كولەمىن كورسەتە وتىرىپ كەلەسى جىلى قابىلداناتىن بولادى. كولىك ينفراقۇرىلىمىن, كوممۋنالدىق جانە تۇرعىن ءۇي قۇرىلىسىن دامىتۋ ماقساتىندا «نۇرلى جول», «نۇرلى جەر» مەملەكەتتىك باعدارلامالارى ۇزارتىلاتىن بولادى.
سونداي-اق, ت. سۇلەيمەنوۆتىڭ ايتۋىنشا, قۇقىق قورعاۋ ورگاندارىنىڭ جۇمىسىن تۇبەگەيلى جاقسارتۋ جانە ازاماتتار قاۋىپسىزدىگىن قامتاماسىز ەتۋ ماقساتىندا حالىقپەن جۇمىس ىستەۋدىڭ جاڭا زاماناۋي فورماتىن ەنگىزۋدى, قوعامدىق قاۋىپسىزدىكتى مونيتورينگىلەۋ جۇيەلەرىمەن قامتاماسىز ەتۋدى كوزدەيتىن ىشكى ىستەر ورگاندارىن جاڭعىرتۋ بويىنشا جول كارتاسى قابىلداناتىن بولادى.
«سوتتاردىڭ جۇمىس ىستەۋىنىڭ زاماناۋي فورماتىن جانە وزىق ەلەكتروندىق سەرۆيستەردى ەنگىزۋ, ارتىق سوت راسىمدەرىن قىسقارتۋ ارقىلى سوت جۇيەسى ودان ءارى جاڭعىرتىلاتىن بولادى», — دەدى ول.
«ازاماتتار سۇرانىسىنا بەيىمدەلگەن مەملەكەتتىك اپپارات» اتتى ءتورتىنشى مىندەت اياسىندا 19 ءىس-شارا كوزدەلگەن. مەملەكەت پەن قوعام اراسىنداعى الشاقتىقتى قىسقارتۋ ماقساتىندا مەملەكەتتىك ساياساتتىڭ ناقتى شارالارى مەن ناتيجەلەرىن ادامدارعا ءتۇسىندىرۋدى كوزدەيتىن «جاڭا فورماتسيانىڭ باسشىسى» باعدارلاماسى ازىرلەنەتىن بولادى.
ء«تيىمدى سىرتقى ساياسات» بەسىنشى مىندەتى اياسىندا سىرتقى ساياساتتى قازىرگى جاعدايلارعا بەيىمدەۋ جانە ۇلتتىق مۇددەنى پراگماتيزم قاعيداتتارىندا ىلگەرىلەتۋ بويىنشا شارالار قابىلداناتىن بولادى.
ء«اربىر قازاقستاندىقتىڭ ەلىمىزدەگى وزگەرىستەر ۇدەرىستەرىنە اتسالىسۋى» التىنشى مىندەتتىڭ شەڭبەرىندە 6 ءىس-شارا كوزدەلگەن.
ت. سۇلەيمەنوۆتىڭ ايتۋىنشا, «رۋحاني جاڭعىرۋ» باعدارلاماسىنا جاڭا مازمۇن مەن باعىتتاردى قاراستىراتىن وزگەرىستەر مەن تولىقتىرۋلار ەنگىزىلەدى. مەملەكەت باسشىسى جاريالاعان جاستار جىلى اياسىندا جاستاردىڭ بارلىق ساناتىن قولداۋ شارالارىن كوزدەيتىن ءىس-شارالار جوسپارى قابىلداناتىن بولادى. اسكەري-پاتريوتتىق تاربيەنىڭ ءرولىن كۇشەيتۋ ءۇشىن مەكتەپتەردە «سارباز» بالالار-جاسوسپىرىمدەر بىرلەستىگى قۇرىلادى.
«جالپى العاندا جالپىۇلتتىق جوسپاردى ۋاقىتىلى ورىنداۋ مەملەكەت باسشىسىنىڭ حالىقتىڭ ءال-اۋقاتىن جاقسارتۋعا باعىتتالعان جولداۋدا بەرگەن تاپسىرمالارىن ءتيىمدى ىسكە اسىرۋدى قامتاماسىز ەتۋگە مۇمكىندىك بەرەدى جانە ەلىمىزدەگى الەۋمەتتىك-ەكونوميكالىق تۇراقتىلىقتى قامتاماسىز ەتۋگە نەگىز بولادى», — دەپ تۇيىندەدى ۇلتتىق ەكونوميكا ءمينيسترى.
