ەلباسى بيىلعى جولداۋىندا ەلدىڭ احۋالىن جاقسارتۋ ءۇشىن جاڭا الەۋمەتتىك ساياساتتىڭ اسا قاجەتتىگىن اتاپ كورسەتىپ, ۇكىمەتكە حالىقتى ەڭبەكپەن قامتۋ جونىندە جاڭا باعدارلاما قابىلداۋدى تاپسىرعانى بەلگىلى.
جامبىل جۇيكە اۋرۋلارى ينتەرنات ءۇيى قالادان 40 شاقىرىم جەردەگى تابيعاتى سۇلۋ تاۋلى ايماقتىڭ ەتەگىنە ورنالاسقان. تاياق تاستام جەردە تەرىس-اششىبۇلاق توعانىنىڭ ايدىنى جارقىراپ كورىنىپ جاتىر. بۇگىندە 3 قاباتتان تۇراتىن عيماراتتا اكىمشىلىك, دارىگەرلىك بولىمدەر, ءدارىسحانالار, اسحانا جانە ينتەرنات تۇرعىندارىنىڭ كوپتەگەن بولمەلەرى ورنالاسقان. ول بولمەلەردە كۇتىمگە ءزارۋ جاسى 18-دەن اسقان 340 ادام مەملەكەتتىڭ قامقورلىعىنا الىنعان. ولارعا الەۋمەتتىك جاعداي جاساۋ ءۇشىن قاجەتتى نارسەلەردىڭ ءبارى قاراستىرىلعان. شومىلامىن, كىر جۋامىن, شاشىمدى قيدىرامىن, كيىمىمدى تىگەمىن نەمەسە دەنساۋلىعىمدى تەكسەرتەمىن دەي قالسا, ينتەرناتتا نە قاجەتتىڭ ءبارى ساقاداي-ساي دايىن.
وتكەن جىلدان باستاپ ينتەرنات ءۇيىندەگى مەملەكەت قامقورلىعىنداعى ازاماتتارعا جاڭا ستاندارت بويىنشا الەۋمەتتىك سالا ماماندارى كومەك كورسەتە باستادى. سوعان ساي جاڭا شتات قۇرىلىپ, ماماندار الىندى. بۇگىندە پسيحولوگ, دەفەكتولوگ, مۇعالىم, مۋزىكا مەن الەۋمەتتىك قىزمەت كورسەتۋ ماماندارى, ەڭبەك تەراپياسى نۇسقاۋشىلارى, دەنە شىنىقتىرۋ جانە مادەني ۇيىمداستىرۋشىلار مەملەكەت قامقورلىعىنداعى ازاماتتاردىڭ كوڭىل-كۇيىن جاسقارتۋ ماقساتىندا كۇندىز-ءتۇنى ەڭبەك ەتۋدە.
قازىر ينتەرناتتا حالىقتى الەۋمەتتىك قورعاۋ سالاسى بويىنشا ارناۋلى الەۋمەتتىك قىزمەتتەردى كورسەتۋ ستاندارتىنىڭ 8 باعىتى بويىنشا جۇمىستار جاسالۋدا. ولار: ءبىرىنشى, الەۋمەتتىك-تۇرمىستىق قىزمەت, ياعني قىزمەت الۋشىلاردىڭ كۇندەلىكتى ومىردە تىرشىلىك ارەكەتىنە كومەكتەسۋگە باعىتتالعان; ەكىنشى, الەۋمەتتىك-مەديتسينالىق قىزمەت, ياعني قىزمەت الۋشىلاردىڭ دەنساۋلىعىن جاقسارتۋ جانە قولداۋ ارەكەتىنە باعىتتالعان; ءۇشىنشى, الەۋمەتتىك-پسيحولوگيالىق قىزمەت, ياعني قىزمەت الۋشىلاردىڭ قورشاعان ورتاعا الەۋمەتتىك بەيىمدەلۋى, پسيحولوگيالىق جاعدايىن تۇزەتۋگە باعىتتالعان; ءتورتىنشى, الەۋمەتتىك-پەداگوگيكالىق قىزمەتتەرى, ياعني 18 جاستان اسقان ازاماتتاردى تۇرمىستىق داعدىعا ۇيرەتۋ, پەداگوگيكالىق كوررەكتسيا مەن وقىتۋعا باعىتتالعان; بەسىنشى, الەۋمەتتىك-ەڭبەك قىزمەتى, ياعني قىزمەت الۋشىلاردىڭ ەڭبەك قابىلەتىن قالىپتاستىرۋ, 18 جاستان اسقان ازاماتتار, مۇگەدەكتەر مەن قارتتاردى ەڭبەككە باۋلۋ مەن ولارعا جاعداي جاساۋ; التىنشى, الەۋمەتتىك-مادەني قىزمەتتەرى, ياعني الەۋمەتتىك-مادەني شارالاردى ۇيىمداستىرۋ جانە وعان قىزمەت الۋشىلاردى تارتۋ; جەتىنشى, الەۋمەتتىك-ەكونوميكالىق قىزمەت, ياعني قىزمەت الۋشىلاردىڭ تۇرمىس جاعدايىن جاقسارتۋعا باعىتتالعان جانە سەگىزىنشى, الەۋمەتتىك-قۇقىقتىق قىزمەت, ياعني قىزمەت الۋشىلاردىڭ قۇقىقتىق ستاتۋسىن دەمەۋگە نەمەسە وزگەرتۋگە باعىتتالعان, زاڭگەرلىك كومەك كورسەتۋ, قۇقىقتارىن زاڭدى تۇردە قورعاۋ.
بيىل شىلدە ايىندا ينتەرناتقا ەڭبەك جانە حالىقتى الەۋمەتتىك قورعاۋ ءمينيسترى گ.ابدىحالىقوۆا كەلىپ, وسىنداعى ۇيىمداستىرۋ جۇمىستارىنا ريزالىق ءبىلدىرىپ, جاقسى باعا بەردى.
قايىرىمدى جۇرەك قارتايمايدى. ينتەرنات قىزمەتكەرلەرى جارىمجان ادامدارعا تاۋلىك بويى تىك تۇرىپ قىزمەت ەتىپ, قاجەتتى ەم-دومدارىن جاساپ, ۋاقتىلى تاماقتاندىرىپ, جۇيكەسi شارشاعان جانداردىڭ كوڭىلىن تاۋىپ, قايتا ءومىر سۇرۋگە قۇشتارلىعىن وياتۋعا قولدارىنان كەلگەننىڭ ءبارىن جاساپ جاتىر.
مىنا الماعايىپ زاماندا ادامعا ەڭ كەرەگى قايىرىمدىلىق پەن مەيىرىم, شاپاعات. بۇل جۇمىستى مەكەمە باسشىسى بالابەك نارباەۆ سياقتى ۇلكەن جۇرەكتى ازاماتتار عانا جاۋاپكەرشىلىكپەن اتقارا السا كەرەك دەپ بىلەمىز.
كوسەمالى ساتتىباي ۇلى.
جامبىل وبلىسى, جامبىل اۋدانى, قىزىلتاڭ اۋىلى.
