وتكەن 40 جىل ىشىندە سۋ توعاندارىنداعى سۋ اپاتتى جاعدايعا دەيىن تومەندەگەنىمەن قويماي, جايىق وزەنى شامادان تىس لاستاندى. كەيبىر تەلىمدەردە سۋ دەڭگەيى نەبارى 40-50 سم. وسىعان وراي, قازىرگى تاڭدا ءتۇپ تەرەڭدەتۋ جۇمىستارىن «پاۆلودار وزەن پورتى» اق جۇرگىزۋدە.
- 1 تامىزدان بەرى ءبىز شارون تارماعىندا 3 كم تەرەڭدىكتە, تەڭىزدە مىڭ مەترگە دەيىن قازۋ جۇمىستارىن جۇرگىزدىك. سونداي-اق, ەكسكاۆاتورلار ارقىلى وزەندەردى كوپ قوقىستاردان تازارتتىق. قيعاشتا ءبىز 480 مىڭ تەكشە مەتر جەردى قازۋىمىز كەرەك, وسى جوسپاردى جىلدىڭ اياعىنا دەيىن ورىندايمىز,-دەيدى «پاۆلودار وزەن پورتى» اق توراعاسىنىڭ ورىنباسارى ماقسات سادۋاقاسوۆ.
ايتا كەتۋ كەرەك, بۇل جۇمىستار ەكوجۇيەگە زيان كەلتىرمەيدى, كەرىسىنشە, تۇبىندەگى شوگىندىلەر وسىمدىكتەردىڭ وسۋىنە ىقپال ەتەدى جانە بالىقتىڭ وسۋىنە وڭ اسەرىن تيگىزەدى.
-قازىرگى ۋاقىتتا قۇرىلعىلارمەن سۋدىڭ 3-3.20 مەتر تەرەڭدىگىن قازۋدامىز. بالتيكالىق جۇيە بويىنشا ارنانىڭ ەنى 40 مەتر بولسا, سونىڭ 25 مەترى وسى 2,5-3 مەتر تەرەڭدىك كولەمىندە بولۋى شارت. قازۋ جۇمىستارىنان كەيىن توپىراق نەمەسە باسقا دا قالدىقتار اسەرىنەن تەرەڭدىك جويىلماۋ ءۇشىن 20-30 سم تەرەڭىرەك قازىپ جاتىرمىز,- دەيدى تەلىم باسشىسى ديدار اليپوۆ.
جايىق جانە قيعاش وزەندەرىنىڭ ءتۇبىن تەرەڭدەتۋ بويىنشا ءىس-شارالاردىڭ باستى ماقساتى – بالىق جۇرەتىن ارنالاردا بالىقتىڭ جويىلىپ بارا جاتقان باعالى تۇقىمدارىنىڭ ءوسىمىن ۇلعايتۋ, بالىقتاردىڭ ۋىلدىرىق شاشۋعا ەركىن ءوتۋىن قامتاماسىز ەتۋ. بۇل جۇمىستار وزەن ورتاسىنىڭ بيولوگيالىق الۋان تۇرلىلىگى ءۇشىن قولايلى جاعدايلار جاساۋ, سونداي-اق مەليوراتسيا جانە وزەن ارنالارىن تەرەڭدەتۋگە باعىتتالعان.
شورتانباي اۋىلدىق وكرۋگى ارداگەرلەر كەڭەسىنىڭ توراعاسى ساياسات زۇلقارناەۆتىڭ ايتۋىنشا, اتالعان جۇمىستار باستالعان كەزدە تۇرعىندار تاراپىنان: "قازىپ جاتىرعان جەردەگى سۋدىڭ قالدىقتارى مال جايىلاتىن جەرلەرگە كەسىرىن تيگىزبەي مە؟" دەگەن ساۋالدار تۋعان. ولار وزەننىڭ سۋىن اۋىل شارۋاشىلىق ماقساتتارىندا پايدالانادى, اتاپ ايتقاندا, مالدى سۋارادى جانە جەم دايىندايدى.
-بۇل بالىق جۇرەتىن وزەك. 126 شاقىرىمدى ءوزىنىڭ ۋاقىتىندا تازالاي السا العا قاراي ەلدى-مەكەنىمىزدە, اۋدانىمىزدا بالىق ءونىمى كوبەيەدى دەگەن ويدامىز. بۇل جۇمىستار قازىرگى كەزدە بالىق وسۋگە كەدەرگى كەلتىرمەيدى. كەرىسىنشە, تۇرعىندار اتىنان جىلدار بويى كەدەرگى بولعان ماسەلەنى شەشۋگە كومەكتەسىپ جاتىرعان وبلىس باسشىلىعىنا العىس ايتامىز.تەك جۇمىستار اياقتالعاننان كەيىن اۋماقتىڭ تازالىعىن تەكسەرىپ, قاداعالاپ وتىراتىن ءبىر مەكەمە قۇرىلسا دەيمىز,-دەپ حالىق سۇرانىسىن ءبىلدىردى ارداگەر ساياسات زۇلقارناەۆ.
ايتا كەتەيىك, جايىق جانە قيعاش وزەندەرىنىڭ ءتۇبىن تەرەڭدەتۋ بويىنشا ءىس-شارالار 2017-2020 جىلدار ارالىعىندا ءتورت جىلعا سوزىلادى.
