جەزدى وڭىردە بولدى
قازىرگى تاڭدا وڭتۇستىك جەزقازعان جانە تاعى باسقا 16 كەنىشتە ءبىر جىلدا 33 ميلليون تونناعا جۋىق مىس قورىتىلادى. ول 10 بايىتۋ فابريكالارىندا وڭدەۋدەن ءوتكىزىلەدى. وسىلايشا كاسىپورىن قورىتىندى ءونىمدى ءوزى شىعارادى. كەشە نۇروتاندىقتار جەزقازعان قالاسىنا كەلىپ, سايلاۋالدى تۇعىرنامانىڭ نەگىزگى ۇستانىمدارىن ءوندىرىس ورنالاسقان جەر استىندا كەنشىلەرمەن تالقىلادى. كەزدەسۋ بارىسىندا ءوندىرىستى جاڭعىرتۋ, جاڭا تەحنولوگيالاردى ەنگىزۋ جانە ءوندىرىستى كەڭەيتۋ ماسەلەلەرى كوتەرىلگەن بولاتىن. وسى ماڭىزدى اسپەكتىلەر باعدارلامالىق قۇجاتتا ەسكەرىلگەن. باعدارلامادا ەل پرەزيدەنتى, پارتيا ءتوراعاسى نۇرسۇلتان نازارباەۆتىڭ باستاماسىمەن قابىلدانعان يندۋستريالاندىرۋ ستراتەگياسىن ىسكە اسىرۋعا باسا نازار اۋدارىلادى. بۇل تۋرالى پارتيا توراعاسىنىڭ ءبىرىنشى ورىنباسارى, رەسپۋبليكالىق شتاب جەتەكشىسى نۇرلان نىعماتۋلين ايتىپ ءوتتى. كەزدەسۋگە قاتىسقاندار پارتيالىقتاردى قولداپ, تاڭدالعان باعىتتىڭ كاسىپورىندى بۇرىنعىدان دا تابىستى ەتەتىنىنە سەنىم ءبىلدىردى. ول, ارينە, تەك جەزقازعان ەمەس, بۇكىل ەلىمىز ءۇشىن قاجەت. شاحتەرلەر «قازاقمىستىڭ» جۇمىسپەن قامتىپ قانا قويماي, سونىمەن قاتار, قالاعا دا ۇلكەن قولداۋ كورسەتىپ وتىرعانىن جاقسى بىلەدى. پارتيالىق باعدارلاما وندىرىسكە, الەۋمەتتىك سالاعا قۇيىلاتىن ينۆەستيتسيالاردىڭ ءوسىمىن قامتاماسىز ەتۋ ءۇشىن قولايلى جاعداي تۋعىزۋدى كوزدەيدى. سونداي-اق وسى قۇجاتتا جەرگىلىكتى جۇمىسشىلاردىڭ قۇقىقتارىن قورعاۋ ماسەلەسى دە قاراستىرىلعان. شاحتەرلەر يننوۆاتسيالىق ەكونوميكانى قۇرۋعا الىنعان باعداردى قولدايدى. «نۇر وتاندى» جەزقازعاندىقتار تۇراقتىلىق پەن بەرەكە اكەلەتىن پارتيا رەتىندە تۇسىنەدى. ءبىز «نۇر وتاندى» تولىق قولدايمىز, دەيدى ولار ۇلكەن سەنىمدىلىكپەن. داستان كەنجالين. قاراعاندى وبلىسى.* * *
كاسىپكەرلەر پارتياعا ءۇمىت ارتادى
قازاقستان پاتريوتتارى پارتياسى سوڭعى كەزدە كاسىپكەرلەرگە قامقورلىق كورسەتۋ باعىتىندا كوپتەگەن باستامالار كوتەرىپ كەلەدى. استانادا وتكەن پارتيا بەلسەندىلەرى مەن تاۋەلسىز كاسىپكەرلەر اسسوتسياتسياسى مۇشەلەرى اراسىنداعى كەزدەسۋدە وسى ماسەلە كەڭىنەن ءسوز بولدى. اتالعان كەزدەسۋگە كاسىپكەرلەر كوپ جينالدى. كاسىپكەرلەر قازاقستان پاتريوتتارى پارتياسى وكىلدەرى الدىندا بىرقاتار پروبلەمالاردىڭ ۇشىعىن شىعاردى. سونىڭ ىشىندە كاسىپكەرلەردى مازالايتىن ماسەلە سالىق تولەۋ ءتارتىبى بويىنشا ەسەپتىلىك جۇيەسىن وڭتايلاندىرۋدى جۇزەگە اسىرۋ. سونىڭ ىشىندە ارتىق تولەم تولەگەنى ءۇشىن ايىپپۇل تولەتۋ نەمەسە ەسەپ-شوتقا تىيىم سالۋ سياقتى كەدەرگى كەلتىرەتىن تەتىكتەردى الىپ تاستاۋ ماسەلەسى قويىلدى. وسى رەتتە ينۆەستيتسيالىق جوبالار ءۇشىن جەر تەلىمدەرىن تەگىن بەرۋ سياقتى ماسەلە دە كوتەرىلدى. كاسىپ قۋعان ازاماتتار ءوز ساۋالدارىندا پيك (پاتەر يەلەرىنىڭ كووپەراتيۆى) نەلىكتەن جەكە تۇلعالار مەن كاسىپكەرلەرگە قىزمەت كورسەتۋ تاريفتەرىن ءار ءتۇرلى ەتىپ تاعايىندايدى دەگەندى العا تارتتى. ولاردىڭ پايىمىنشا, قىزمەت ەكى جاققا دا بىردەي كولەمدە كورسەتىلگەندىكتەن, كاسىپكەرلەردەن ارتىق تولەم الۋدىڭ ەش رەتى جوق. پاتريوتتار پارتياسى ءتىزىمى بويىنشا ءماجىلىس دەپۋتاتتىعىنان ۇمىتكەر بوتاگوز لەسوۆا باستاعان بەلسەندىلەر ءوز سوزدەرىندە كاسىپكەرلەر ەلىمىز ازاماتتارىنا جۇمىس تاۋىپ بەرىپ وتىرعان ەرەكشە كاسىپ يەلەرى ەكەندىگىن باسا ايتىپ ءوتتى. قازىرگى تاڭدا وسى سالادا جۇرگەن ازاماتتارعا ەرەكشە ۇلكەن جاۋاپكەرشىلىك جۇكتەلەدى. الەمنىڭ كوپتەگەن ەلدەرىن تىعىرىققا تىرەگەن قارجى داعدارىسى قىسپاققا العان كەزدە وسى ورتا جانە شاعىن كاسىپ يەلەرى جۇمىس ورىندارىن ساقتاپ قالۋعا بارىن سالدى. سونىڭ ىشىندە قازاقستاندىق كاسىپكەرلەر دە ءوز جۇمىسشىلارىنا جالاقىلارىن ۋاقتىلى تولەپ, قولدارىنان كەلگەنشە الەۋمەتتىك قولداۋ كورسەتىپ كەلەدى. اسقار تۇراپباي ۇلى.* * *
اقجولدىقتار – اباي ەلىندە
اقجولدىقتار سەمەيگە كەلىپ, وسىنداعى قالا جۇرتشىلىعىمەن جۇزدەستى. كەزدەسۋگە حالىق ايتارلىقتاي كوپ جينالدى. «اق جول» پارتياسىنىڭ توراعاسى ازات پەرۋاشەۆ جينالعانداردى ءوز پارتيالارىنىڭ تاريحىمەن جانە سايلاۋالدى باعدارلاماسىمەن تانىستىردى. كەلەر جىلى قۇرىلعانىنا ون جىل تولاتىن پارتيانىڭ باعدارلاماسى سالماقتى ما دەدىك. ون باعىتتى قامتيتىن بۇل باعدارلامادا, اسىرەسە, الەۋمەتتىك ماسەلەلەر كەڭىنەن قوزعالعانى بايقالادى. سونىڭ ىشىندە سىناق سالدارىنىڭ زارداپتارى دا نازاردان تىس قالماعان. سىناق تۋرالى ۇكىمەت قاۋلىسىنا سايكەس سەمەيلىكتەرگە اي سايىن ەكولوگيالىق تولەم تولەنۋى ءتيىس دەدى پارتيا باسشىسى. ال سونى مۇندا جەكەمەنشىك كاسىپورىن يەلەرى تولەيتىن كورىنەدى. بۇل دەگەن الەۋمەتتىك ادىلەتسىزدىك ەمەس پە؟ ۇكىمەتتىڭ مۇنى جەكە كاسىپكەردىڭ موينىنا ءىلىپ قويىپ وتىرعانى دۇرىس ەمەس. پارتيا توراعاسىنىڭ سەمەي سىندى ۇلكەن قالانى دامىتۋ, جىلۋ, جارىق تولەمدەرىن تومەندەتۋ, مەديتسينا ساپاسىن جاقسارتۋ سەكىلدى وي-پىكىرى جينالعانداردىڭ كوڭىلىنەن شىققانى اڭعارىلدى. جەدەل ءجاردەمگە دەيىن اقىلى ەتۋگە تىرىسىپ جاتقانداردىڭ تىرلىگىن تۇسىنبەيمىن, دەدى ول. وسى ماسەلەلەرگە وراي جيىنعا قاتىسۋشىلار تاراپىنان دا سۇراقتار كوپتەپ قويىلدى. ايتالىق, سۇراق يەلەرىنىڭ ءبىرى قالا تۇرعىندارىنىڭ سىناق تۋرالى زاڭدا قاراستىرىلعان كوپتەگەن جەڭىلدىكتەردەن سىرت قالىپ وتىرعانىن ايتا كەلىپ, سوندا بەيبىت زاماندا قىرىق جىلعا سوزىلعان اپاتتى جاعداي سەمەي قالاسىن اينالىپ وتكەن بە دەدى. وزىنە قويىلعان قاي سۇراققا بولسىن تياناقتى جاۋاپ بەرۋگە تىرىسقان ازات پەرۋاشەۆ ءوز پارتيالارىنىڭ پارلامەنتكە ءوتكەن جاعدايدا حالىقتىڭ كوڭىلىندەگى مۇنداي ماسەلەلەردى نازارلارىنان تىس قالدىرمايتىنىنا سەندىردى. جۇزدەسۋ سوڭى قازاقستاننىڭ ەڭبەك ءسىڭىرگەن ءارتىسى, پروفەسسور, بەلگىلى ءانشى كەنجەعالي مىرجىقباەۆتىڭ تاماشا كونتسەرتىنە ۇلاستى. داۋلەت سەيسەن ۇلى.* * *
سايلاۋ مۇراتى – جەڭۋ
جول مۇراتى – جەتۋ بولسا, سايلاۋ ماقساتى – جەڭۋ. بۇل كۇندەرى جالپىۇلتتىق سوتسيال-دەموكراتيالىق پارتيانىڭ سەركەلەرى جاڭاوزەن وقيعاسىنا وراي ءباسپاسوز ءماسليحاتىن ءجيى ۇيىمداستىرۋدا. كەشە جسدپ جەتەكشىلەرى وزدەرىنىڭ الماتىداعى باس كەڭسەلەرىندە باق وكىلدەرىمەن قايتا كەزدەسىپ, جاڭاوزەن وقيعاسىنا قاتىستى قوعامدىق كوميسسيا قويىپ وتىرعان تالاپتاردى قايتا العا تارتتى. ال بۇل كەزدە جالپىۇلتتىق سوتسيال-دەموكراتيالىق پارتيانىڭ تەڭ توراعاسى جارماحان تۇياقباي الماتىداعى «شاڭىراق» شاعىن اۋدانىنىڭ تۇرعىندارىمەن جۇزدەسىپ, پارتيا كوزدەگەن كوكەيكەستى ءماسەلەلەرمەن ءبولىسىپ جاتقان بولاتىن. جالپىۇلتتىق سوتسيال-دەموكراتيالىق پارتيانىڭ وكىلدەرى «شاڭىراققا» سايلاۋ كەزىندە عانا كەلىپ وتىرعان جوق. ولار «شاڭىراق» ماسەلەسىمەن ەكى جىلدان بەرى اينالىسىپ كەلەدى. ولار مۇنداعى تۇرعىنداردىڭ اربىرىنە كومەك بەرۋگە ءازىر ەكەندىكتەرىن بىلدىرۋدە. بۇل اۋداننىڭ تۇرعىندارى ءۇشىن جەر تەلىمدەرى مەن سالىنعان ۇيلەردى زاڭداستىرۋ باستى تۇيتكىل بولىپ وتىر. تۇرعىن ۇيلەرى زاڭداستىرىلماعاندىقتان, ءوزدەرى تىركەۋدە جوق ازاماتتار سايلاۋعا قاتىسا المايدى. پارتيا وكىلدەرىنىڭ ايتۋىنشا, بۇل – ازاماتتاردىڭ كونستيتۋتسيالىق قۇقىعىنىڭ شەكتەلۋى, سوندىقتان 15 قاڭتارعا دەيىن بۇل ماسەلە شەشىلۋى ءتيىس. پارتيا بەلسەندىلەرىنىڭ ايتۋىنشا, قوعامداعى تەپە-تەڭدىكتى ساقتاۋ ءۇشىن كەشەندى ءىس-شارالار كەرەك. سونداي-اق, ولار ءوز باعدارلامالارىن ءاربىر سايلاۋشىعا ەتەنە جاقىن دەپ مالىمدەۋدە. سوتسيال-دەموكراتتار قوعامنىڭ ءال-اۋقات دەڭگەيىن الەۋمەتتىك ساياساتتى كۇشەيتۋ ارقىلى كوتەرۋ قاجەت دەپ سانايدى. جسدپ اتىنان سايلاۋعا تۇسكەلى وتىرعان ۇمىتكەرلەر كۇنكورىس دەڭگەيىنىڭ تومەن مولشەرىن ەسەپتەۋدى ءوزىندىك ادىستەرىمەن جاساماقشى. پارتيالىقتار ەڭبەكاقى مەن الەۋمەتتىك تولەمدەر كولەمىن وسىعان ساي ەسەپتەپ ۇسىنباق. ايناش ەسالي. * * *ۇيىمشىلدىقپەن جالعاستىرۋدا
قازاقستان كوممۋنيستىك حالىقتىق پارتياسى ورتالىق كوميتەتىنىڭ حاتشىسى ۆلاديسلاۆ كوسارەۆ وسكەمەن قالاسىنداعى تاۋەلسىز ءباسپاسوز-كلۋبىندا ءباسپاسوز ءماسليحاتىن وتكىزدى. وعان ۆ.كوسارەۆتەن باسقا قكحپ-نىڭ شىعىس قازاقستان وبلىستىق كوميتەتىنىڭ حاتشىسى يۋ.كۋشكۋنوۆ پەن قالالىق ءماسليحات دەپۋتاتتىعىنا كانديداتتار گ.بوتاباەۆا, ن.بوريسوۆا, ۆ.ليتۆينوۆ قاتىستى. ۆ.كوسارەۆ پارتيانىڭ سايلاۋالدى تۇعىرناماسىمەن تانىستىرىپ, قكحپ الدىندا تۇرعان پەرسپەكتيۆالى مىندەتتەر مەن ولاردى شەشۋدىڭ جولدارى تۋرالى جان-جاقتى اڭگىمەلەپ بەردى. سونداي-اق, الداعى سايلاۋعا بايلانىستى قويىلعان جۋرناليستەردىڭ كوپتەگەن سۇراقتارىنا جاۋاپ قايتاردى. ءماسليحاتتان سوڭ ۆ.كوسارەۆ پارتيانىڭ وبلىستىق كوميتەتىنىڭ وفيسىندە قكحپ-دان قالالىق ءماسليحات دەپۋتاتتىعىنا كانديداتتارمەن كەزدەسۋ وتكىزدى. ۇگىت-ناسيحات جۇمىستارىمەن قاراعاندىعا پارتيادان ءماجىلىس دەپۋتاتتىعىنا كانديداتتار جامبىل احمەتبەكوۆ, بوريس سوروكين جانە تولەش كەنجين كەلدى. سەرىكتەرىنىڭ قولداپ, قولپاشتاۋىمەن ولار قالاداعى ورتالىق بازاردا بولىپ, د.قوناەۆ اتىنداعى ۋنيۆەرسيتەتتە سايلاۋشىلارمەن كەزدەستى. «شىعىس» بازارىنا قازاقستان كوممۋنيستىك حالىقتىق پارتياسىنىڭ مۇشەلەرى تۇستەن كەيىن كەلدى. كىرە بەرىستە قىزىل جامىلعى مەن سونداي تۇستەگى شارف تاققان ادامدار پايدا بولعانى سول ەدى, بازارداعىلار بىردەن ولارعا نازار اۋداردى. حالىقشىل كوممۋنيستەر كوپتەگەن ساتۋشىلار مەن ساتىپ الۋشىلاردى, ولاردىڭ پروبلەمالارىن ۇكىمەتتىك دەڭگەيدە كوتەرۋگە ۋادە ەتىپ, الداعى سايلاۋدا وزدەرىنە داۋىس بەرۋگە شاقىردى. پارتيانىڭ اقمولا وبلىستىق كوميتەتى مەكتەپتەردى قولداۋ ماقساتىندا «بولاشاق» اكتسياسىن ۇيىمداستىردى. مامانداندىرىلعان مەكتەپتە حالىقشىل كوممۋنيستەر ەرتەڭگىلىك وتكىزدى. بالالارعا كىتاپتار مەن سىيلىقتار تارتۋ ەتىلدى. جىلقىباي جاعىپار ۇلى.* * *
اۋىلدى كوتەرۋ – بارشانىڭ مىندەتى
«اۋىل» پارتياسىنىڭ وكىلدەرى مۇنايلى وڭىردەگى اۋىل شارۋاشىلىعىمەن كوبىرەك اينالىساتىن ماحامبەت, قىزىلقوعا اۋداندارىنا بەت بۇردى. اۋىل ەڭبەككەرلەرىنىڭ مۇڭ-مۇقتاجىن كوبىرەك بىلەتىن, سوعان وراي سايلاۋالدى باعدارلاماسىنا وسى سالانىڭ پروبلەمالارىن مولىراق تۇزگەن پارتيا وكىلدەرى كەلەشەكتە شوپاندار مەن ەگىنشىلەردىڭ مۇددەسىن قورعاۋدى كوزدەيدى. ءوڭىر ورتالىعىنداعى كەزدەسۋ اتىراۋ اگرارلى تەحنيكالىق كوللەدجىندە جالعاسىن تاپتى. مۇنىڭ وزىندىك سەبەبى بار. بۇل – وبلىستا اۋىل شارۋاشىلىعى ماماندارىن دايارلايتىن بىردەن-ءبىر وقۋ ورنى. كوللەدجدە بولاشاق مال دارىگەرلەرى مەن زووتەحنيكتەر, مەحانيزاتورلار مەن بالىق ونەركاسىبىنىڭ ماماندارى ءدارىس الىپ ءجۇر. وقۋ ورنىنىڭ ءماجىلىس زالىنا جينالعان بولاشاق اۋىل شارۋاشىلىعى ماماندارىن «اۋىل» پارتياسىنىڭ وكىلدەرى وزدەرىنىڭ سايلاۋالدى باعدارلاماسىمەن تانىستىردى. اۋىل-سەلولار مەن اۋىل شارۋاشىلىعىن دامىتۋدىڭ جولدارى تۋرالى ويلارىن ورتاعا سالدى. «اۋىل» دەپ اتالعانىمەن, ءبىزدىڭ پارتيا قالا مەن دالاعا ورتاق پروبلەمالاردى قامتيدى. سەبەبى, ەلىمىزدى ازىق-ت ۇلىكپەن قامتىپ وتىرعان اۋىل شارۋاشىلىعى ەكەنى داۋسىز. ەندەشە, اۋىل تۇرمىسى, ونداعى وزەكتى ماسەلەلەردى شەشۋ جولدارىن بارشامىز بىرلەسىپ شەشۋىمىز كەرەك. ويتكەنى, اۋىل – قازاقتىڭ التىن بەسىگى». بۇل – «اۋىل» پارتياسى وكىلدەرىنىڭ جۇرەكجاردى پىكىرى. – اۋىل شارۋاشىلىعى سالاسىن وركەندەتۋ ءۇشىن ليزينگتىك جولمەن جۇمىس جاساۋ تيىمدىرەك بولادى. بۇل سالادا بىردەن تابىسقا جەتۋ مۇمكىن ەمەس. ياعني, ۇزاق ۇدەرىس شىدامدىلىقتى قاجەت ەتەدى. سول سەبەپتەن, اۋىل شارۋاشىلىعىنا ۇزاق مەرزىمدى نەسيە بەرىلۋى كەرەك دەپ ەسەپتەيمىز. ءبىز وسى ءماسەلەنىڭ وڭ شەشىلۋىن قالايمىز. بۇل – ءبىزدىڭ باعدارلامامىزدىڭ باستى تارماعى, – دەيدى «اۋىل» قسدپ توراعاسىنىڭ ورىنباسارى, اكادەميك كوپماعامبەت ەلەمەسوۆ. جولداسبەك شوپەعۇل. اتىراۋ وبلىسى. * * *ادىلەتتىلىككە ءۇن قوسۋدا
«ادىلەت» دەموكراتيالىق پارتياسىنىڭ سايلاۋالدى ۇگىت-ناسيحات جۇمىستارى ءبىزدىڭ وڭىردە دە بەلسەندى جۇرگىزىلۋدە. وبلىسقا پارلامەنت ماجىلىسىنە دەپۋتاتتىققا «ءادىلەت» پارتياسىنىڭ تىزىمىمەن تۇسكەن ءۇمىتكەرلەر – پارتيا توراعاسىنىڭ ءبىرىنشى ورىنباسارى ءۋاليحان قايساروۆ جانە ءتوراعا ورىنباسارى ءمادي ارتىعاليەۆ كەلدى. ولار اقتوبە قالاسىنداعى «بۇلبۇل» بالاباقشاسىنىڭ, ق.جۇبانوۆ اتىنداعى ۋنيۆەرسيتەت پەن كوللەدج قىزمەتكەرلەرىمەن جانە ستۋدەنتتەرىمەن كەزدەستى. اقتوبە قالاسىنداعى №كا–168/1 قىلمىستىق-اتقارۋ جۇيەسى مەكەمەسىنىڭ قىزمەتكەرلەرىمەن, جىلجىمالى مەحانيكالىق ستانساداعى تەمىر جول قىزمەتكەرلەرىمەن, №7 ليتسەي ۇجىمىمەن دە جىلى ءجۇزدى جۇزدەسۋلەر وتكىزىلدى. كەزدەسۋلەردىڭ باستى ماقساتى «ادىلەت» پارتياسىنىڭ باعدارلاماسىمەن حالىقتى تانىستىرۋ, تۇرعىنداردىڭ كوكەيكەستى ماسەلەلەرى بويىنشا سۇراقتارىنا جاۋاپ بەرۋ, سونىمەن قاتار, ازاماتتاردى بەلسەندى تۇردە سايلاۋعا قاتىسۋعا شاقىرۋ بولىپ تابىلادى. ولار بۇل جۇمىستاردى وڭىردە ۇيىمشىلدىقپەن وتكىزۋدە. ادىلەتتىكتەر قازاقستان پارلامەنتى ماجىلىسىنە جانە بارلىق دەڭگەيدەگى ماسليحاتتارعا وزدەرى ۇسىنعان ۇمىتكەرلەردىڭ سايلاۋدا جەڭىسكە جەتەتىنىنە سەنىمدى. جۇزدەسۋلەردە “ادىلەت” دەموكراتيالىق پارتياسى توراعاسىنىڭ ءبىرىنشى ورىنباسارى ءۋاليحان قايساروۆ پارتيانىڭ سايلاۋالدى تۇعىرناماسىنىڭ نەگىزگى باعىتتارىن جۇيەلەي اڭگىمەلەپ, ءبىرتالاي وزەكتى ماسەلەلەرگە توقتالدى. ول وتانىمىز ۇلكەن مۇمكىندىكتەردىڭ الدىندا تۇرعانىن, وزدەرىنىڭ ماقساتى – كۇرمەۋى قيىن ماسەلەلەردىڭ ءتۇيىنىن شەشۋگە قۇقىقتىق تۇرعىدان كومەكتەسۋ ەكەنىن جەتكىزدى. قازاقستاننىڭ «ادىلەت» دەموكراتيالىق پارتياسىنان پارلامەنت ءماجىلىسى دەپۋتاتتىعىنا كانديداتتار سونداي-اق «كاپيتال پلازا» بيزنەس-ورتالىعىندا بۇقارالىق اقپارات قۇرالدارى وكىلدەرىمەن ءباسپاسوز ءماسليحاتىن وتكىزىپ, وعان وبلىستاعى قوعامدىق بىرلەستىكتەر وكىلدەرى, سوعىس ارداگەرلەرى, زەينەتكەرلەر, دەنساۋلىق ساقتاۋ ورگاندارىنىڭ قىزمەتكەرلەرى جانە مۇگەدەك ازاماتتار مەن شەتەلدىك بايقاۋشىلار قاتىستى. مۇندا دا پارلامەنت ماجىلىسىنە جانە بارلىق دەڭگەيدەگى ماسليحاتتارعا سايلاۋدىڭ اشىق جانە زاڭدىلىقتارعا ساي ءوتكىزىلۋى, ەلىمىزدىڭ ەكونوميكالىق دامۋىنا قاتىستى ماسەلەلەر توڭىرەگىندە, قۇقىق جانە زاڭدىلىق تالاپتارىن ساقتاۋ جايى اڭگىمە بولدى. ساتىبالدى ءساۋىرباي. اقتوبە وبلىسى.
