داعدارىستى ەڭسەرۋدىڭ ءتيىمدى جولى
بىرقاتار شارۋاشىلىق ءجۇرگىزۋشى نىسانداردىڭ ءدارمەنسىز بورىشكەرلەر قاتارىنا قوسىلىپ, بانكروتتىققا ۇشىراپ جاتاتىنى جاسىرىن ەمەس. الەمدىك قارجى داعدارىسىنىڭ سالقىنى تيگەن كاسىپورىندار مەن مەكەمەلەردى ساۋىقتىرۋ جايى قالاي؟ وبلىستاعى دارمەنسىز بورىشكەرلەردى وڭالتۋ ءراسىمىنىڭ تيىمدىلىگى قانداي, قانشالىقتى قايتارىمدى؟«ەگەمەن قازاقستاننىڭ» اقتوبە وبلىسى بويىنشا ءتىلشىسى ساتىبالدى ءساۋىرباي قارجى مينيسترلىگى دارمەنسىز بورىشكەرلەرمەن جۇمىس كوميتەتىنىڭ «باتىس» وڭىرارالىق دەپارتامەنتىنىڭ باستىعى امانعوس دەربىسالينگە:
– ءسىز بۇعان نە دەيسىز؟ – «بانكروتتىق تۋرالى» زاڭدا تاراتۋمەن قاتار, مەكەمەنى وڭالتۋعا باعىتتالعان ءراسىمدەر كوزدەلگەن. ەكونوميكالىق جاعدايى قيىنداعان مەكەمەلەرگە قارجى داعدارىسىنا بايلانىستى وڭالتۋ شارالارىن كەڭىنەن قولدانۋ قارجى مينيسترلىگىنىڭ ستراتەگيالىق جوسپارىندا كورسەتىلىپ, ونى ورىنداۋ ماقساتىندا جۇمىستار باستالعان بولاتىن. ەگەر 2001-2007 جىلدارى وڭالتۋ راسىمىنە اقتوبە وبلىسى بويىنشا كىرگىزىلگەن كاسىپورىندار سانى 4-ەۋ عانا بولسا, 2008-2011 جىلدار ىشىندە 23-كە جەتتى. بۇل ءراسىمدى ەنگىزۋ كورسەتكىشتەرى بويىنشا اقتوبە وبلىسى ەلىمىزدە كوشباسشىلاردىڭ قاتارىندا كەلەدى. 9 ايدىڭ قورىتىندىسى بويىنشا ەلىمىزدەگى بارلىق وڭالتۋ راسىمىنەن ءوتىپ جاتقان مەكەمەلەردىڭ 25 پايىزى اقتوبە وبلىسىنىڭ ۇلەسىنە تيەسىلى. بىراق, بۇل جەردە اڭگىمە وڭالتۋ راسىمىندەگى مەكەمەلەردىڭ سانىندا ەمەس, ونىڭ ساپاسىندا بولسا كەرەك. بۇلاي دەيتىن سەبەبىم, بۇل ءراسىمدى كىرگىزۋ ونشا قيىن ەمەس, الايدا, ونىڭ ءارى قاراي جۇمىسىن جۇرگىزۋ, تابىس تابۋ ماسەلەلەرىن شەشۋ وڭايعا تۇسپەيدى. دەگەنمەن, قيىندىقتارعا قاراماستان, سوڭعى ەكى جىلدا بارلىق ءراسىمدى ءوتىپ جاتقان مەكەمەلەر بويىنشا كوپتەن بەرى تولەنبەگەن جالاقىدان بەرەشەكتى 185,2 ملن. تەڭگە نەمەسە 99,3 پايىز وتەۋ ارقىلى الەۋمەتتىك شيەلەنىستى جاعدايلاردىڭ الدىن الدىق. جالپى, 650 ادامنىڭ الا الماي جۇرگەن ەڭباقىلارى قولدارىنا ءتيدى. جالاقىدان باسقا, بانكتەردىڭ, كونكۋرستىق كرەديتورلاردىڭ 506,7 ملن. تەڭگە الاشاقتارى وتەلدى. التى مەكەمە وڭالتۋ ءراسىمىنەن ءوتىپ, جۇمىستارىن قالپىنا كەلتىردى. ءبىر سوزبەن ايتقاندا, وڭالتۋ ءراسىمىن كەڭىنەن پايدالانۋ داعدارىستان شىعاراتىن نەگىزگى جولدىڭ ءبىرى بولىپ وتىر. اقتوبە وبلىسى.
