ەڭسەلى مەشىت ەل يگىلىگى ءۇشىن

ۇلان اۋدانىنىڭ ور­تا­لىعى  – قاسىم قاي­سە­نوۆ اتىنداعى كەنتتە ەل ەسىندە قالاتىنداي ەلەۋلى وقيعا بولدى. وسى اۋداننىڭ تۋماسى, اۋعان سوعىسىنىڭ ارداگەرى, تاياۋدا عانا كاسىپكەرلىكتى دامىتۋعا قوسقان ەرەكشە ۇلەسى ءۇشىن «قۇرمەت» وردەنىمەن ماراپاتتالعان, الدىڭعى جىلى ەلباسىنىڭ قولىنان «پارىز» سىيلىعىن العان قايرات مۋسين ءوز قارجىسىنا سوققان, ىشىنە 500 ادام ەركىن سىياتىن ەڭسەلى مەشىتتى جەرلەستەرىنە سىيعا تارتتى. وبلىس اكىمى بەردىبەك ساپارباەۆتىڭ باستاماسى­مەن وسىدان ەكى جىل بۇرىن «تۋعان ەلگە – تاعزىم» اك­تسيا­سى جۇزەگە اسا باستاعان. ونىڭ ماقساتى – جەرگىلىكتى جەردەن شىققان قالتالى ازاماتتاردى كىندىك قانى تام­عان ولكەگە باستارىن بۇ­رىپ, مەكتەپ, بالاباقشا, سپورت كەشەندەرى مەن مەشىتتەردى ءوز قارجىلارىنا سالعىزۋ بولاتىن. سونىڭ ناقتى دالەلى ەمەس پە, ەكى جىلدا ءوڭىر باس­شى­سىنىڭ باستاماسىنا ءۇن قوس­قان ەلۋگە تارتا ازامات جەر­لەستەرىنىڭ العىسىنا بولەندى. ەندى, مىنە, ۇلانداعى ەڭسەلى مەشىت ەل يگىلىگىنە اينالدى. مەشىتتىڭ اشىلۋىنا ءوڭىر باسشىسى ب.ساپارباەۆ, اۋعان­ستاندا ق.ءمۋسيننىڭ كومانديرى بولعان ەلىمىزدىڭ ءبىرتۋار ازا­ما­تى, «حالىق قاھارمانى» با­قىتجان ەرتاەۆ, شىمكەنت, تاراز, سەمەي, باسقا قالالاردان كاسىپكەردىڭ  دوستارى ارنايى كەلدى, قۋانىشتارىن بىرگە ءبولىستى. «قايرات سياقتى ەلىنىڭ كەلەشەگىن ويلاعان ازاماتتارعا العىستان باسقا ايتارىمىز جوق. ول بۇدان بۇرىندارى دا سپورت, مادەنيەت سايىستارىنا دەمەۋشىلىك جاسايتىن. بۇگىن قۇنى 200 ميلليون تەڭگەدەن اساتىن مەشىتتى جەرلەستەرىنە سىيلاپ تۇر», دەدى ءوڭىر باس­شىسى. «قايرات مەن باسقارعان باتالوندا ەرلىكپەن شاي­قاس­تى. قازىر ونىڭ ومى­راۋ­ىن­دا جيىرمادان استام جاۋ­ىنگەرلىك ناگرادالار بار. جاقىندا ەلباسىنىڭ جار­لى­عىمەن «قۇرمەت» وردەنىمەن ماراپاتتالدى. ءبىز اۋعان سوعىسىنىڭ ارداگەرلەرى اتى­نان قايراتقا اقبوز ات سىي­لايمىز», دەپ ب.ەرتاەۆ كا­سىپ­كەردىڭ يىعىنا شاپان جاۋ­ىپ, تۇلپارعا  مىنگىزدى. وڭداسىن ەلۋباي. شىعىس قازاقستان وبلىسى.