ەل تاۋەلسىزدىگىنىڭ 20 جىلدىعىنا وراي تۇركسىبتىڭ بەل بالاسى, ۇشتوبە قالاسىنىڭ بايىرعى تۇرعىنى, الماتى وبلىسىنداعى قازىرگى بىردەن-ءبىر كوزى ءتىرى كەڭەس وداعىنىڭ باتىرى, «قاراتال اۋدانىنىڭ قۇرمەتتى ازاماتى», «قۇرمەتتى تەمىرجولشى» يۆان ۆاسيلەۆيچ كوسەنكوۆ «قازاقستان رەسپۋبليكاسىنىڭ تاۋەلسىزدىگىنە – 20 جىل» مەرەكەلىك مەدالىمەن ماراپاتتالدى. وسىلايشا حاس باتىردىڭ ومىراۋىنداعى ەگەمەندىككە قول جەتكەن تاۋەلسىزدىك جىلدارى يەلەنگەن «قۇرمەت» وردەنى مەن «ەرەن ەرلىگى ءۇشىن» مەدالىنىڭ قاتارى تاعى ءبىر ايشىقتى ناگرادامەن تولىعا ءتۇستى. بۇگىنگى تاڭدا تولىقتاي مەملەكەت قامقورلىعىنا الىنعان ەرەن ەرگە ۇكىمەت ناگراداسىن قاراتال اۋدانىنىڭ اكىمى سۇلتان دۇيسەنبىنوۆ سالتاناتتى جاعدايدا تابىستاپ, قارت مايدانگەرگە زور دەنساۋلىق, قاجىماس قايرات تىلەدى. ءوز كەزەگىندە داڭقتى باتىر وزىنە جاسالىپ وتىرعان تۇرمىستىق جاعدايعا, ەلباسىنىڭ سارابدال ساياساتىنا اتالىق ريزاشىلىعىن ءبىلدىردى
وتكەن عاسىردىڭ 1941-1945 جىلدارى ادامزات بالاسىنا قيساپسىز قايعى-قاسىرەت اكەلگەن وتان سوعىسىنا باستان-اياق قاتىسىپ, جالىنداعان وت پەن ىسقىرعان وق كورگەن اعا بۋىننىڭ سۋارىلعان قۇرىشتان دا بەتەر بولىپ جاراتىلعان وكىلى بۇگىنگى تاڭدا سەكسەننىڭ سەڭگىرىنە شىقسا دا ءوزىن سەرگەك سەزىنەدى. حاق ءتاڭىرىنىڭ شاراپاتى ءتيىپ, ۇزاعىنان ءسۇيسىندىرە بەرسە, باتىر اعامىز اراعا ەكى جىل سالىپ (1923 جىلى تۋعان) توقسان دەگەن اسۋدى دا باعىندىرعالى تۇر. شاعىن قالا – ءۇشتوبەنىڭ عانا ەمەس, كۇن شۇعىلالى قازاقستاننىڭ ماقتانىشى سانالاتىن يۆان كوسەنكوۆتىڭ ونەگەلى ءومىر جولى جاستاردى ءوتانسۇيگىشتىككە جانە پاتريوتتىق رۋحتا ءتاربيەلەۋدىڭ جارقىن مىسالى, ىزگى كورىنىسى بولا الادى.
قاراشا قارامان.
الماتى وبلىسى, ۇشتوبە قالاسى.
