«قازاقستان تەمىر جولى» ۇك» اق قابىرعاسىندا وتكەن ءداستۇرلى «جىگىت سۇلتانى» مەن «تەمىر جول ارۋى» بايقاۋى مارەسىنە جەتتى! وندا ادىلقازىلاردىڭ شەشىمىمەن, كوپشىلىكتىڭ تاڭداۋ-قالاۋىمەن بايقاۋدىڭ جەڭىمپازى بولىپ «سەگىز قىرلى, ءبىر سىرلى» سايىپقىران ءجىگىت باعلان داۋىسباەۆ پەن اقىلىنا كوركى, بىلىمىنە بىلىگى جاراسقان ارۋ كامشات كاكىشەۆا تانىلدى.
باعلانعا «جىگىت سۇلتانى–2011» ديپلومىمەن قاتار, قازاقى بورىك-شاپان تارتۋ ەتىلسە, كامشاتقا «تەمىر جول ارۋى – 2011» ديپلومى تابىس ەتىلىپ, «تەمىر جول ارۋى – 2010» بايقاۋىنىڭ يەگەرى نۇرگۇل بالتاەۆا اۋىسپالى ارۋ ءتاجىن كيدىردى. سونداي-اق, ۇلتتىق ناقىشتا جاسالىپ, اسىل تاستارمەن بەزەندىرىلگەن قوس بىلەزىك, ساقينا-جۇزىك, شاشپاۋ-سىرعا, القا ءبارى تازا اق كۇمىستەن جاسالعان اشەكەيلەردى سىيعا تارتتى. بۇعان قوسا, ەكى جەڭىمپازعا دا ۇلكەن-ۇلكەن تەلەديدارلار سىيعا بەرىلدى.
بيىل ۇلتتىق ەكى بايقاۋدا ۇيىمداستىرۋشىلار قاتىسۋشىلارعا قويىلار شارتتاردى بارىنشا شيراتقان بولسا, ءوز كەزەگىندە سايىسقا تۇسەر جىگىتتەر مەن قىزداردىڭ بۇرناعى جىلدارداعىدان اناعۇرلىم تياناقتى دايىندالعانى ايدان انىق كورىنىپ تۇر. «جىگىت سۇلتانى» سايىسىنا 21 جىگىت ءتۇسىپ, ءوز ونەرلەرىن سىنعا سالسا, «تەمىر جول ارۋى» بايقاۋىندا 23 ارۋ ونەر جارىسىنا شىقتى.
ەجەلگى قازاق ارۋلارى سالتاناتتى كەشتەر مەن توي-جيىنداردا كيگەن كيىمدەردىڭ سان ۇلگىسى اققۋداي تارانعان ارۋلاردىڭ سالتاناتىمەن ساحناعا شىقتى. «ارۋلار اسىل جاندار, شۋاق بوپ شاشىلعاندار» دەپ, مۇقاعالي اقىن مىناداي كەرەمەت سۇلۋلىقتى كورگەندە جىرلاعان بولار دەگەن وي كەلەدى. بۇل جىلى كوركىنە اقىلى ساي ارۋ ءتاجىن كيۋگە 23 كەرىم كەربەز سۇلۋ ارەكەت ەتتى. بىرىنەن ءبىرى وتكەن ارۋلاردىڭ قايسىسىنىڭ باعى جانارى بەيمالىم. ولاردىڭ جۇرگەن ءجۇرىسىن, ءار ايتقان ءسوزى مەن كورسەتكەن ونەرىن بەس بىردەي قازى قاس قاقپاي, قادالا باقىلاپ وتىر. بايقاماي ءبىر عانا شالىس باسقان قادام وڭدىرماي وپىق جەگىزەرى كادىك. سوندىقتان ارۋلاردىڭ ءبارى قاتەلىك جىبەرمەي, ونەرىن جوعارى دەڭگەيدە پاش ەتۋگە بارىن سالىپ-اق ءجۇر. شىنىن ايتۋ كەرەك, ءان شىرقاپ, بي بيلەگەن, ولەڭ وقىپ, كۇي تارتقان قىزداردىڭ ونەرى زالدى دۋىلداتىپ جىبەردى. ءوز ونەرلەرىن جۇرتشىلىققا پاش ەتكەن 23 ارۋدىڭ اراسىنان اقىلىنا كوركى ساي ەڭ كەرىمىن تاڭداۋ ءادىلقازىلارعا دا, كورەرمەن قاۋىمعا دا وڭاي سوقپاعانى انىق.
دەسەك تە, «تەمىر جول ارۋى – 2011» بايقاۋىنىڭ جەڭىمپازى بولعان كامشات كاكىشەۆانىڭ ونەرى بارشانى ءتانتى ەتتى. حالقىمىزدىڭ كوركەمسوز شەبەرى, ۇلى جازۋشىمىز عابيت مۇسىرەپوۆتىڭ «قوزى-كورپەش-بايان سۇلۋ» تراگەديالىق دراماسىنىڭ سوڭعى بولىمىنەن قويىلىم جاساعان كامشات قىز ساحنادا تەاتر ارتىستەرىنەن ءبىر دە كەم تۇسپەدى دەسەك اسىرا ايتقاندىق ەمەس. دراما ءۇزىندىسى وتە قىسقا بولعانىمەن ءوزىنىڭ ماقساتى مەن درامالىق سيپاتىن تولىق اشىپ بەرە العانىنا داۋ جوق. سايىستىڭ تاعى ءبىر تاپسىرماسى ۇرشىق ءيىرۋ بولدى. بۇل كەزدە دە كامشات قىز قاتارلاستارىن جەڭىپ شىقتى. سايىس سوڭىندا 23 ارۋدىڭ اراسىنان وزىپ شىققان تەمىر جول ارۋى «جولاۋشىلار تاسىمالى» اق بۇقارالىق اقپارات قۇرالى جانە سىرتقى بايلانىستارمەن جۇمىس ءجۇرگىزۋ ءبولىمىنىڭ باس مامانى كامشات كاكىشەۆا ءوزىنىڭ پىكىرىمەن ءبولىستى: «قازاقستان تەمىر جولى سيياقتى ۇلتتىق كومپانيادا «اتىنا زاتى ساي» ۇلتتىق سالت-ءداستۇرىمىزدى ءدارىپتەيتىن سايىستىڭ بار ەكەنىنە قۋانىشتىمىن. بايقاۋ جوعارى ءدارەجەدە ءوتتى. نەگىزى ماماندىعىم ءتىلشى بولعاندىقتان ۇلتىمىزدىڭ سالت-ءداستۇرىن ءبىر ادامداي بىلەمىن. سايىستىڭ ءبىر تاپسىرماسى بويىنشا ۇرشىق ءيىرۋ كەرەك بولدى. ءاجەمنىڭ تاربيەسىن كورگەندىكتەن ۇرشىق ءيىرۋ مەن ءۇشىن اسا قيىن بولمادى. بۇل جەڭىس قازاق قىزىنىڭ بولمىسىن بويىما سىڭىرە بىلگەن, اسىرەسە اجەمنىڭ, اتا-انامنىڭ جەڭىسى دەپ بىلەمىن, ولارعا شەكسىز العىسىمدى ايتامىن.»
بايقاۋ ماقساتى – قازاقتىڭ ۇلتتىق قۇندىلىقتارىن قايتا جاڭعىرتۋمەن بىرگە جاس تالانتتاردى انىقتاۋ. ءاربىر قاتىسۋشى ونەردىڭ, سپورتتىڭ سان سالاسى بويىنشا زال تولى جۇرتشىلىقتىڭ العىسىنا بولەندى. قاتىسۋشىلاردىڭ ءتۇرلى قويىلىمدارى مەن ونەرلەرىنە كورەرمەندەر دە ءتانتى بولىپ, ءجيى قول سوعىپ, قوشەمەت كورسەتىپ وتىردى. بايقاۋدىڭ بارلىق قاتىسۋشىلارى «قتج» ۇك» اق ارنايى ديپلومدارى مەن ەستەلىك سىيلىقتارمەن ماراپاتتالدى. جەڭىمپازدارعا تۋريستىك جولدامالار, ۇلتتىق كيىمدەر جيناعى, تۇرمىستىق تەحنيكالار تابىس ەتىلدى.
نۇرباي ەلمۇراتوۆ.
