استانادان – داستان كەنجالين.
كەشە استاناداعى «دۋمان» ويىن-ساۋىق ورتالىعىندا قازاقستان رەسپۋبليكاسى پرەزيدەنتىنىڭ اتىنان جەتىم بالالار مەن اتا-انا قامقورلىعىنان ايىرىلعان بالالارعا ارنالعان جاڭا جىلدىق شىرشا ءوتتى. وسىندا بالالاردى ەلباسى نۇرسۇلتان نازارباەۆ LED-ديسپلەيدەگى ەكران ارقىلى كەلە جاتقان جاڭا جىلمەن قۇتتىقتاپ, مول باقىت, زور دەنساۋلىق, وقۋدا وزات بولۋعا تىلەكتەستىگىن ءبىلدىردى. «قىمباتتى بالالار, بۇگىن بايتاق ەلىمىزدىڭ بارلىق وڭىرىندە ونەگەلى بالالار جاڭا جىلدىق شىرشانىڭ اينالاسىنا جينالدى. جاڭا جىل, ەڭ الدىمەن, بالالار مەن بۇلدىرشىندەرگە قۋانىش سىيلايتىن مەرەكە. مەن سەندەردى, سەندەر ارقىلى بارشا قازاقستاندىق بالالاردى كەلە جاتقان جاڭا جىل مەرەكەسىمەن قۇتتىقتايمىن. بيىل قازاقستاننىڭ تاۋەلسىزدىگىنە 20 جىل تولعانىن بىلەسىزدەر, سوندىقتان بۇل جىل بارشامىز ءۇشىن ايرىقشا جىل بولدى. ءتاۋەلسىزدىك ارقىلى ءبىزدىڭ ۇلى وتانىمىز جىلدان جىلعا وركەندەي تۇسۋدە. قازىر دۇنيە ءجۇزى قازاق ەلىن قۇرمەتتەيدى. سەندەر وسىنداي ەرەكشە ەلدە ءوسىپ كەلە جاتقان باقىتتى ۇرپاقسىڭدار. زەردەلى دە زەرەك, ءبىلىمدى دە بىلىكتى بولىڭدار. بۇعان ەلىمىزدە بارلىق ءمۇمكىندىك بار. جاسامپاز ىستەردىڭ بارلىعى سەندەردىڭ جارقىن بولاشاقتارىڭ ءۇشىن جاسالىپ جاتىر», – دەدى پرەزيدەنت ن.نازارباەۆ. ودان ءارى بالالار شىرشانىڭ اينالاسىندا الەمنىڭ ءارتۇرلى حالىقتارىنىڭ – قازاق جانە ورىس, اعىلشىن جانە شۆەد, نەمىس جانە فرانتسۋز, تۇرىك جانە دات ەرتەگىلەرىنىڭ كەيىپكەرلەرىمەن بىرگە باقىت فورمۋلاسىن ىزدەۋگە تىرىستى. وندا بۇلدىرشىندەرگە اياز اتا مەن اقشاقار باقىت فورمۋلاسىنىڭ 11 ارىپتەن تۇراتىنىن ايتىپ, سول ءسوزدى شەشۋ ءۇشىن بايقاۋلار مەن سوزجۇمباقتار وتكىزدى. ءسويتىپ, بالالار مەرەكەلىك شارا بارىسىندا باقىت فورمۋلاسىن تاپتى. ول فورمۋلا – «تاۋەلسىزدىك – التىن بەسىگىم» دەپ اتالدى. كەش سوڭىندا بالالارعا ەلباسى اتىنان سىيلىققا جەكە نوۋتبۋكتەر, «بال-بالا» ۇلتتىق ويىنشىقتار, «دارىن» رەسپۋبليكالىق ورتالىعىنىڭ كىتاپتارى, ءتاتتى سىيلىقتار مەن جۇمساق ويىنشىقتار تابىس ەتىلدى. وسى جەردە بالالارمەن بىرگە شاراعا قاتىسقان استانا قالاسى اكىمىنىڭ ورىنباسارى ايدا بالاەۆا بىزبەن اڭگىمەسىندە جاڭا جىلدىق شىرشاعا بالالار ۇيلەرىنەن 200-دەن استام تاربيەلەنۋشىنىڭ قاتىسقانىن, مۇنداي مەرەكەلىك ءىس-شارا جاڭا جىلعا دەيىن قالانىڭ ءار جەرىندە جالعاساتىنىن ايتتى. سونىمەن بىرگە, ول قالادا مىڭنان استام جاڭا جىلدىق شىرشالاردىڭ وتكىزىلىپ, وعان 50 مىڭنان استام بالانىڭ قاتىسىپ جاتقانىن جەتكىزدى. «جاڭا جىل قارساڭىندا بالالاردىڭ ءبارى مەرەكەلىك شارادان تىس قالمايدى. استانا قالاسىنىڭ اكىمدىگى دەمەۋشىلەردىڭ كومەگىمەن بارلىق ءبۇلدىرشىندەردىڭ, اسىرەسە, جەتىم, اتا-انا قامقورلىعىنان ايىرىلعان, تۇرمىسى تومەن وتباسىنان شىققان بالالاردىڭ كوڭىلىن تابۋ ءۇشىن ءبارىن جاسايتىن بولادى», – دەدى ول. ال ءبىزدىڭ جاڭا جىلدىق شىرشاعا قاتىسقان 200-دەن استام بالانىڭ ىشىندە وزگە ەتنوس وكىلدەرىنىڭ 16 ءبۇلدىرشىنىنىڭ مەملەكەتتىك تىلدە ەركىن سويلەپ, قازاقشا تاقپاقتار مەن اندەردى ناقىشىنا كەلتىرە ورىنداعانى قۋانتتى. ولاردىڭ ءبارى №63 بالالار ءۇيىنىڭ تاربيەلەنۋشىلەرى ەكەن.الماتىدان – ايناش ەسالي.
كەشە الماتىداعى قابىلداۋ ۇيىندە ەلباسى نۇرسۇلتان نازارباەۆتىڭ اتىنان بالالار ءۇيىنىڭ تاربيەلەنۋشىلەرى مەن جاعدايى تومەن وتباسىلاردىڭ بالالارىنا, وقۋ وزاتتارىنا جانە ءار ءتۇرلى بايقاۋلاردىڭ جەڭىمپازدارىنا ارنالعان ءداستۇرلى جاڭا جىلدىق شىرشا بولىپ ءوتتى. بيىل وسىمەن 12-رەت ۇيىمداستىرىلعان شىرشاعا 150 بالا قاتىستى. بالالارعا تەاتردىڭ, كينو مەن ەسترادانىڭ ەڭ ۇزدىك ءارتىستەرىنىڭ قاتىسۋىمەن ارنايى دايىندالعان مەرەكەلىك باعدارلاما ۇسىنىلدى. ولار شىرشانى اينالا ءان ايتىپ, بي بيلەپ, اياز اتا مەن اقشاقارعا ءوز ونەرلەرىن كورسەتتى. جاڭا جىلدىق قويىلىمدا سۇيىكتى ەرتەگى كەيىپكەرلەرى – الداركوسە مەن جيرەنشە, راپۋنتسەل, جالماۋىز كەمپىر, سونداي-اق كەلە جاتقان ايداھار جىلىنىڭ سيمۆولى ءبۇلدىرشىندەرمەن بىرگە الەم حالىقتارىنىڭ ءتۇرلى ويىندارىن بىرگە ويناپ, بايگەگە قاتىسىپ, حالىق بيلەرىن بيلەدى. بالالاردى 2012 جىلمەن سونداي-اق تانىمال ارتىستەر اليشمان, Emotion جانە «وردا» توپتارى قۇتتىقتاپ, دۋماندى مەرەكەنىڭ اجارىن اشتى. مەرەكەلىك شىرشانىڭ باستالۋىندا ارنايى جازىلعان بەينەتاسپا ارقىلى ەل پرەزيدەنتى نۇرسۇلتان نازارباەۆ شىرشاعا جينالعان بالالاردى كەلە جاتقان جاڭا جىل مەرەكەسىمەن قۇتتىقتاپ, ولارعا زور دەنساۋلىق, جاڭا جەتىستىكتەر مەن بارلىق ارماندارىنىڭ ورىندالۋىن, بارىنشا جاقسى وقىپ, ساپالى ءبىلىم الىپ, ماقساتتارىنا جەتە بەرۋلەرىن تىلەدى. مەرەكەلىك ويىن-ساۋىق باعدارلاماسىنان كەيىن ءار بالا ەلباسى اتىنان سىيلىقتار الدى.اقتوبەدەن – ساتىبالدى ءساۋىرباي.
«تاۋەلسىزدىك – التىن بەسىك» دەگەن اتپەن «اتامەكەن» دەمالىس ورتالىعىندا ۇيىمداستىرىلعان پرەزيدەنت شىرشاسىنا ءبىزدىڭ وبلىستىڭ 200 بالاسى قاتىستى. ولار — 9-13 جاس ارالىعىنداعى ۇزدىك وقيتىن, ۇلگىلى, ءتارتىپتى جەتىم, اتا-اناسىنىڭ قامقورلىعىنسىز قالعان, مۇگەدەك جانە از قامتىلعان, كوپبالالى وتباسىلاردىڭ بالالارى. قىزىلدى-جاسىلدى شامدارى جارقىلداعان, ادەمى بەزەندىرىلگەن الىپ شىرشانىڭ ماڭىنا توپتاسقان بالالار تاۋەلسىز قازاقستاننىڭ قۇرداسى التىن باتىر مەن اقشاقاردى قوشەمەتپەن قارسى الدى. كوڭىلدى توپتىڭ اجارىن الدار كوسە دە تولتىردى. بۇدان سوڭ وقۋشىلار ەرتەگىلەر ەلىنىڭ قوناقتارىمەن بىرگە رەسپۋبليكامىزدىڭ ءار وڭىرىنە ساياحات جاسادى. بالدىرعاندار اياز اتانى ەرەكشە ىقىلاسپەن قارسى الدى. مەرەكەنىڭ باس كەيىپكەرى بۇلدىرشىندەردى جاڭا جىلمەن قۇتتىقتاپ, جىلى لەبىزدەرىن ءبىلدىردى. بۇدان سوڭ بالالار ءبىر-ءبىرىنىڭ قولدارىن ۇستاپ, شىرشانى اينالىپ ءان سالدى, اۋەن ىرعاعىمەن بيلەدى. بۇدان كەيىن كوڭىلدى توپ جاڭا جىل «يەسى» – ۇلۋدى قوشەمەتپەن قارسى الدى. ەلىمىزدىڭ باس شىرشاسىنا ارنايى شاقىرتۋمەن كەلگەن بالالار ەلباسى نۇرسۇلتان نازارباەۆتىڭ قۇتتىقتاۋىن تىڭدادى. پرەزيدەنت قۇتتىقتاۋىنان سوڭ وبلىس اكىمى ارحيمەد مۇحامبەتوۆ قۇتتىقتاۋ ءسوز سويلەدى. ارحيمەد بەگەجان ۇلى پرەزيدەنت شىرشاسىنا جينالعان بالالاردىڭ ارقايسىسىنا ەلباسى اتىنان سىيلىق تاراتتى. ءار سىيلىقتا جىلى سىرت كيىم, باس كيىم, ەتىك, سپورتتىق كيىمدەر, كەڭسە تاۋارلارى سالىنعان ريۋكزاك, ءتاتتى تاعامدار بار.اتىراۋدان – جولداسبەك شوپەعۇل.
بۇل كۇندى, ياعني, ەلباسى نۇرسۇلتان نازارباەۆتىڭ جاڭا جىلدىق قۇتتىقتاۋىن اتىراۋلىق بالالار دا اسىعا توسادى. جاڭا جىلدىق شىرشاعا قاتىسۋعا شاقىرۋ العان 200 بالانىڭ كوڭىلى الابۇرتىپ, اتىراۋداعى دەنە شىنىقتىرۋ-ساۋىقتىرۋ كەشەنىنىڭ قاق ورتاسىنا قويىلعان جاسىل شىرشا جانىنداعى شاتتىق باستالعانشا دەگبىرى قالماعانىن بايقادىق. بۇل جولى پرەزيدەنتتىك شىرشاعا مۇنايلى ءوڭىردىڭ جەتى اۋدانىنىڭ ءارقايسىسىنان 10 بالادان شاقىرىلسا, اتىراۋ قالاسىنىڭ كىشكەنتاي تۇرعىندارىنا كوبىرەك شاقىرۋ بەرىلىپتى. بالالاردىڭ بارلىعى دا ءماز-مەيرام, ارالارىندا اياز اتانى كۇتۋگە ازىرلىگىن پىسىقتاۋ ۇستىندە جۇرگەنى كوپ. ءبىرى جاتتاعان تاقپاقتارىن قايتا-قايتا قايتالاپ الەك. ەندى ءبىرى بي ىرعاعىنا بەرىلىپ ءجۇر. الدىمەن ورتاعا بارشامەن قوشتاسۋ ءۇشىن قويان شىقتى. ونىڭ ءىزىن الا ۇلۋ شىعىپ, بارشاعا باق-بەرەكە تىلەدى. التىن ادام دا قازاقستاننىڭ تاۋەلسىزدىك الۋىمەن قول جەتكىزگەن تابىستارىنىڭ الداعى كەزەڭدە دە جالعاسۋىنا تىلەكشى ەكەنىن جەتكىزدى. اق تاياعىن تايانىپ, اق ساقالى جەلبىرەپ اياز اتا ورتاعا شىعىپ, سيقىرلى تاياعىمەن الۋان ءتۇرلى ويىنشىقتارعا كومىلىپ تۇرعان جاسىل شىرشانىڭ شامدارىن جاققاندا, ۇلكەن زالدى بالالاردىڭ قۋانىشتى ۋ-شۋى كەرنەدى. وسى ساتتە قابىرعاعا ىلىنگەن ۇلكەن ەكراننان ەلباسى نۇرسۇلتان نازارباەۆتىڭ قازاقستاننىڭ بارلىق بالدىرعاندارىنا ارناعان جاڭا جىلدىق قۇتتىقتاۋى باستالدى. ەلباسى بالالاردى جاڭا جىلمەن قۇتتىقتاپ, ءبىلىمدى بولۋعا, عىلىمدى مەڭگەرۋگە ساتتىلىك تىلەدى. اتىراۋ وبلىسى اكىمىنىڭ ءبىرىنشى ورىنباسارى بولات داۋكەنوۆ ەلباسى اتىنان جاڭا جىلدىق شىرشا مەرەكەسىنە جينالعان بالالارعا جىلى كيىمدەردى تارتۋ ەتتى. ورتاعا الىپ ءتاتتى تورت تا اكەلىندى. ال قۋانىشتان جۇزدەرى بال-بۇل جانعان بالالار اياز اتامەن بىرگە شىرشانى اينالا دوڭگەلەنىپ بيلەي جونەلدى.قوستانايدان – ءنازيرا جارىمبەتوۆا.
جانگەلدين اۋدانىندا تۇراتىن جاقان دۋمان پرەزيدەنت شىرشاسىنا دايىندالعالى قاشان. وسى شىرشاعا باراتىنىن ەستىگەندە قۋانىپ, ساباققا دا بار ىقىلاسىن ءبولىپ, «بەستىكتەر» الىپ ءجۇردى. اناسى قوياننىڭ كيىمىن تىگىپ بەردى. اق قار, كوك مۇزدا 8 ساعات ءجۇرىپ, سوناۋ شالعايداعى جانگەلدين اۋدانىنان قوستانايعا دا جەتتى. وبلىس ورتالىعىنداعى «اق شاڭىراق» مەيرامحاناسىنا بالالار وبلىستىڭ بارلىق اۋداندارى مەن قالالارىنان جينالىپتى. مەيرامحانانىڭ ءىشى ەرتەگىدەگىدەي بەزەندىرىلگەن. ەكراندا ەلباسى نۇرسۇلتان نازارباەۆ بالالاردى جاڭا 2012 جىلمەن قۇتتىقتاپ, ولاردىڭ دەنساۋلىعىنىڭ مىقتى بولىپ, جاقسى وقۋىنا تىلەك ءبىلدىردى. – ەلباسىنىڭ اتىنان العان سىيلىعىما كەرەمەت قۋاندىم, – دەيدى كىشكەنتاي جاقان. بالالاردى مۇنان كەيىن وبلىس اكىمى سەرگەي كۋلاگين كەلە جاتقان جاڭا جىلمەن قۇتتىقتادى. وبلىس باسشىسى جاس ۇرپاق ءۇشىن ەلىمىزدە كوپتەگەن يگىلىكتى جۇمىستار اتقارىلىپ جاتقانىنا توقتالدى. قازاقستاننىڭ پاتريوتى بولىپ ءوسۋى ءۇشىن ولارعا جاقسى وقىپ, ۇستازدارىنىڭ اقىل-كەڭەسىن بۇلجىتپاي ورىنداۋى كەرەكتىگىن ايتتى. بالالارعا باقىت تىلەدى. پرەزيدەنت شىرشاسىنا وبلىستىڭ بارلىق وڭىرىنەن 150 بالا قاتىستى. الىس اۋداندار مەن اۋىلدارداعى كوپ بالالى, الەۋمەتتىك از قورعالعان وتباسىنان شىققان جانە جەتىم بالالار شىرشا قىزىعىن, اياز اتا مەن اقشاقاردىڭ كەلۋىن جانە كىشكەنتاي ونەرپازداردىڭ كونتسەرتىن تاماشالادى, ولارعا ەلباسى اتىنان بەرىلگەن سىيلىقتارىن تاراتتى.قاراعاندىدان – ايقىن نەسىپباي.
جاڭا جىل مەرەكەسى, اسىرەسە, بالالار ءۇشىن ۇلكەن قۋانىش. تەمىرتاۋداعى ەڭ ءزاۋلىم ءارى كەڭ عيمارات – مادەنيەت ۇيىندە باس قوسقان قالانىڭ 200-گە تارتا جەتكىنشەگى جۇزدەرى بال-بۇل جايناپ, ومىرلەرىندەگى شاتتىق شاقتى بىرگە قارسى الىپ تۇرعاندارىنا مەرەيلەرى تاسىپ, ۇمىتىلماس اسەرگە بولەندى. بۇعان دەيىن ءبىر-ءبىرىن بىلمەيتىن ءار مەكتەپتەردەگى وقۋ وزاتتارى, كوپ بالالى جانە الەۋمەتتىك جاعدايى ءالسىز وتباسىلار ورەندەرى, مۇگەدەك جاسوسپىرىمدەر مۇنىڭ الدىندا شاھاردىڭ ادەمى ورىندارىن, ولكەتانۋ-تاريحي مۇراجايىن ارالاۋ كەزىندە تانىسىپ-تابىسىپ, باۋىرلاسقان بولاتىن. اسەم كورىكتەندىرىلگەن, بيىك, ساۋلەلەرى جارقىراعان پرەزيدەنت شىرشاسى الدىندا ءار ەتنوس ۇلاندارى قول ۇستاسىپ, دوڭگەلەنە ءان مەن بيگە قوسىلدى. ەلباسىنىڭ وزدەرىندەي بارشا قازاقستاندىق زامانداستارىنا ارنالعان قۇتتىقتاۋ ءسوزى كوڭىلدەرىن ءوسىردى. قۋانىشتارىنا ورتاقتاسۋعا, ءبولىسۋگە كەلگەن وبلىس اكىمى سەرىك احمەتوۆ 2012 جىل بارىنە باقىت پەن شاتتىق, اتا-انالارىنا بەرەكە مەن تابىس اكەلۋىن تىلەدى. مەملەكەتىمىزدىڭ ەرتەڭگى وركەندەۋىن جالعاستىراتىن وسكەلەڭ ۇرپاق رەتىندە تەرەڭ ءبىلىم, سانالى ءتاربيە ءسىڭىرۋ ارقىلى ەرەن ىستەرگە لايىقتى ۇلەس قوساتىندىقتارىنا, ەلباسىنىڭ ايالى قامقورلىعىن اقتاي الاتىندىقتارىنا سەنىم ءبىلدىردى. پرەزيدەنت شىرشاسى كەزدەسۋىنە جينالعان بالالار قۋانىشىن بارىنە بىردەي سىيلانعان تارتۋ-تارالعىلار ودان سايىن جاراستىردى.وسكەمەننەن – وڭداسىن ەلۋباي.
جاڭا جىلدىق پرەزيدەنت شىرشاسىنا كەندى التايدىڭ اۋداندارى مەن قالالارىنان 200-گە تارتا بالا كەلدى. ونىڭ ىشىندە 41-ءى جەتىم بالالار, 80-ءى تۇرمىسى از قامتىلعان وتباسىلاردىڭ بالالارى, ال قالعاندارى وقۋدا وزات شاكىرتتەر. دەنساۋلىق ساقتاۋ كەشەنىنىڭ كەڭ زالىنداعى ساحنا تورىندە جاڭا جىلدىق شىرشا جارقىراپ تۇر. ءبىر ۋاقىتتا ساحناعا جامبىل اتىنداعى قازاق دراما تەاترىنىڭ ارتىستەرى شىعىپ, ايداھار, تازشا بالا, تاريحشى اجە كەلە جاتقان جاڭا جىلدىڭ ەرەكشەلىكتەرى جايلى قىزىقتى ەتىپ ايتىپ بەردى. بالالار بي بيلەپ, ءان سالدى. ەلباسى ن. نازارباەۆ تەلەديداردان ءوز قۇتتىقتاۋىن جولدادى. وبلىستىق ءبىلىم بەرۋ باسقارماسى باستىعىنىڭ ورىنباسارى دۋمانعازى ارعىنعازيننىڭ ايتۋىنشا, ەلباسىنىڭ سالەمدەمەسى – 50 مىڭ تەڭگەنىڭ قىسقى كيىمدەرى سىيعا تارتىلدى. ءبىز ريددەر قالاسىنداعى گاگارين اتىنداعى مەكتەپ-ينتەرناتتىڭ ۇستازى ءاليا جانباتىروۆامەن تىلدەسكەنىمىزدە, ولاردىڭ پرەزيدەنت شىرشاسىنا كوڭىلدەرى تولاتىنىن تىلگە تيەك ەتتى. اتا-اناسى جوق بالالار كوركەيگەن, جاڭا عيماراتتار سالىنىپ جاتقان وسكەمەندى ارالاپ, تەاتردا بولدى.قىزىلوردادان – Cەرىك ءپىرنازار, جۋرناليست
(ارنايى «ەگەمەن قازاقستان» ءۇشىن).
كەشە قىزىلوردا قالاسىندا دا پرەزيدەنت شىرشاسىنىڭ شامى جاعىلدى. ول سىر بويى باس قالاسىنداعى № 264 مەكتەپ-ليتسەيدە ساعات 11-دە شاپاعىن شاشتى. مۇندا دا ەلباسى جاڭا جىلدىق شىرشاسى قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالدى. نەگىزگى مازمۇنى «تاۋەلسىزدىك – التىن بەسىك» تاقىرىبى اياسىنا استاسا وتكىزىلگەن سالتاناتتى شاراعا وبلىستاعى 9-13 جاس ارالىعىنداعى وقۋ وزاتتارىنىڭ اراسىنان جەتىم, اتا-انا قامقورلىعىنان قاعىس قالعان, از قامتاماسىز ەتىلگەن جانە كوپ بالالى وتباسىنان شىققان بالالار قاتىستى. نەگىزىنەن شارا سەگىز بولىمنەن تۇردى. ول تەاترلاندىرىلعان كورىنىسپەن ورنەكتەلدى. مۇندا ءبارى دە بولدى. بالالار ەرتەگىلەر ەلىنە دە ساياحات جاسادى, قازىرگى زاماننىڭ تاماشالارىنا دا قانىقتى. سونىڭ ءتورتىنشى بولىمىندە بالالاردىڭ شاقىرۋى بويىنشا اياز اتا مەن اقشاقار ورتاعا شىعىپ, دۋمان كورىگىن قىزدىردى. وبلىس اكىمى بولاتبەك قۋاندىقوۆ وسى ساتتە سيقىرلى تاياقشانىڭ كومەگىمەن شىرشا شىراعىن تۇتاتتى. بۇدان سوڭ بالاقايلار ەلباسىنىڭ ينتەراكتيۆتى قۇتتىقتاۋىن دەن قويا تىڭدادى. مۇنىڭ سوڭىن الا ايماق باسشىسى دا قاتىسۋشىلاردى جاڭا جىلمەن قۇتتىقتاپ, بالالارعا سىيلىقتار تاپسىردى. بارلىق بالالار نوۋتبۋك, كىتاپتار مەن ءتاتتى سىيلىقتارعا يە بولىپ, قۋانىشقا بولەندى. سودان كەيىن بالالاردى سۋرەتكە ءتۇسىرۋ ءراسىمى بولدى. بالالار وبلىس اكىمىمەن, كەلگەن قوناقتارمەن, ەرتەگى كەيىپكەرلەرىمەن سۋرەتكە ءتۇسىپ شاتتاندى. تويدىڭ سوڭى مەرەكەلىك داستارقانعا جانە مۋزىكالىق باعدارلاماعا ۇلاستى.كوكشەتاۋدان – باقبەرگەن امالبەك.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اتىنان بالالاردىڭ جاڭا جىلدىق شىرشا تويى ادەتتەگىدەي ەڭ ۇلكەن عيمارات – «كوكشەتاۋ» مادەنيەت سارايىندا وتكىزىلدى. «تاۋەلسىزدىك – التىن بەسىك» اتاۋىنداعى مەرەكەگە بارلىق 16 اۋداننان, قالالاردان جاستۇلەكتەر قاتىستى. ولاردىڭ اراسىندا 7 بالالار ۇيىنەن, 4 وبلىستىق ارنايى مەكتەپ-ينتەرناتىنان, بالالار مەن جاسوسپىرىمدەردى وڭالتۋ جانە الەۋمەتتىك بەيىمدەۋ ورتالىعىنان, ساناتوريلىك مەكتەپ-ينتەرناتىنان وبلىستىق مۇگەدەك بالالار اسسوتسياتسياسىنان, كوپبالالى وتباسىلاردان وكىلدەر بار. جالپى, 9-13 جاس ارالىعىنداعى 200 بالا شاقىرىلىپتى. ەكى كۇنگە سوزىلعان الاقاي تويدىڭ العاشقى كۇنىندە كوكشەتاۋ قالاسىنىڭ كورنەكتى جەرلەرىن ارالاعان بالالار جاڭادان سالىنعان «بۋراباي» سپورت كەشەنىندە, مۇزدى قالاشىقتا بولدى. كەشكى مەرەكەلىك اس مازىرىنەن ءدام تاتقان بالعىندارعا ارناپ №3 وبلىستىق دارىندى بالالار مەكتەپ-ينتەرناتىنىڭ كۇشىمەن قىزىقتى كونتسەرت قويىلدى. اسىعا كۇتكەن شىرشا تويى دا باستالدى. سارايدا ولاردى ەرتەگىلەر جانە مۋلتفيلمدەر كەيىپكەرلەرى قارسى الدى. ەرتەگىلەر الەمىنىڭ قۇشاعىنداعى بالالار كوپ ۇزاماي تەاترلاندىرىلعان كورىنىستەر قاھارمانىنا اينالىپ كەتكەنىن دە بايقاماي قالعانداي. ولاردى مەملەكەت باسشىسى نۇرسۇلتان نازارباەۆ ۇلكەن ەكران ارقىلى جاڭا جىل مەرەكەسىمەن قۇتتىقتادى. وبلىس اكىمى سەرگەي دياچەنكو ەلباسى اتىنان شىرشا دۋمانىنا شاقىرىلعان بالالاردىڭ بارىنە نوۋتبۋكتەر مەن ءتاتتى ساۋعالار تابىستادى.ورالدان – تەمىر قۇسايىن.
جۇردەك پويىز قازاقستان قالالارىنا ايالداپ, ودان سوڭ ءجۇرىسىن قايتادان ۇدەتە تۇسەدى. سوڭعى بەكەت – استانا. ەلوردانىڭ مىڭ قۇبىلعان وتتارى سامالاداي جارقىراپ كورىنگەندەي بولادى. بۇلدىرشىندەردى مۇندا باس قالانىڭ باس ساۋلەتشىسى ۇلكەن مەيىرىممەن, اتالىق جۇرەكپەن قارسى الىپ, جاڭا جىلدارىمەن قۇتتىقتاپ, كوكىرەكتەرىنە مەنمۇندالاعان ارمان شىراعىن جاققانداي. باس ساۋلەتشى دەپ وتىرعانىمىز – ەلباسى, ۇلت كوشباسشىسى نۇرسۇلتان نازارباەۆتىڭ ءوزى ەكەنى پرەزيدەنت شىرشاسىنا جينالعان بالالاردىڭ قۋانىشىن ودان ءارى كوبەيتە تۇسكەندەي. ءبىر قاراعاندا, ولاردىڭ كەشەگى ەرتەگىدەي كورگەن الەمى شىندىققا اينالىپ, وتە قىسقا ۋاقىتتا اسەم ەلوردا بوي تۇزەپتى. ەرتەگى ەمەس, شىندىق قوي بۇل. بيىل اقجايىقتا پرەزيدەنت شىرشاسىن ۇيىمداستىرۋشىلار وعان قاتىسۋشىلارعا وسىنداي تىڭ دا توسىن تەاترلاندىرىلعان ستسەناري ۇلگىسىن ۇسىندى. تاعى ءبىر ەرەكشەلىك – بيىل وبلىس ورتالىعىنا, پرەزيدەنت شىرشاسىنا قاتىسۋعا كەلگەن بالدىرعاندار وتكەن جىلدارمەن سالىستىرعاندا كوبىرەك كورىندى. ءيا, تۇيسىگىمىز الداماپتى. ولاردىڭ قاتارىنا بيىل 50 ءبۇلدىرشىن قوسىلىپتى. كوپ بالالى جانە تۇرمىسى تومەن وتباسىلاردىڭ پەرزەنتتەرى, وقۋ ۇزدىكتەرى ءوز ونەرلەرىن ورتاعا سالدى. ولاردىڭ قاي-قايسىسى دا پرەزيدەنتتىڭ ارنايى جولداعان سىي-سياپاتىنان تىس قالعان جوق. ەلباسىنىڭ جارقىن ءجۇزى ەكراننان كورىنگەن كەزدە بالالار ەشكىمنىڭ نۇسقاۋىنسىز دۋ قول شاپالاقتاپ نۇرسۇلتان ءابىش ۇلىنىڭ وزدەرىنە جولداعان قۇتتىقتاۋىنا ىقىلاستانا قۇلاق ءتۇردى.پاۆلوداردان – فاريدا بىقاي.
جىل سايىن جەلتوقسان ايىنىڭ سوڭىندا ەلباسى اتىنان جاڭا جىلدىق شىرشانى وتكىزۋ داستۇرگە اينالعانى بەلگىلى. جاڭا جىل كەلەر الدىندا وزدەرىن ەلباسى قۇتتىقتايتىن جاڭا جىلدىق شىرشا مەرەكەسى بولاتىنىن بالالاردىڭ ءبارى دە بىلەدى. بيىل دا سولاي, وبلىس ورتالىعىنداعى «استانا» مۇز ايدىنى سارايىندا وبلىس اكىمى باقىتجان ساعىنتاەۆتىڭ قاتىسۋىمەن ەلباسى نۇرسۇلتان نازارباەۆتىڭ اتىنان جاڭا جىلدىق شىرشا وتكىزىلدى. جالپى, بۇل مەرەكە جەتىم بالالارعا, مۇگەدەك بالالارعا, از قامتاماسىز ەتىلگەن جانە كوپ بالالى وتباسىلارىنان شىققان بالالارعا, سونداي-اق 9-13 جاسقا دەيىنگى ەلىمىزدىڭ ۇزدىك وقۋشىلارىنا ارنالىپ وتكىزىلەدى. جۋىقتا وبلىستىڭ 150 بالاسى رەسپۋبليكالىق جاڭا جىلدىق شىرشاعا قاتىسىپ قايتتى. ال كەشە وبلىستىڭ قالالارى مەن اۋىلدارىنان كەلگەن 150 بالا جاڭا جىلدىق اسەم شىرشا مەرەكەسىنە قاتىستى. ەلباسى نۇرسۇلتان نازارباەۆ ۇلكەن تەلەديدار ارقىلى بالالارعا قۇتتىقتاۋ جولدادى. ءار بالاعا سپورت كوستيۋمدەرى, كىتاپتار, مەكتەپكە ارنالعان قۇرالدارى بار سومكە, تاتتىلەر تولى مەرەكەلىك قوراپتار بەرىلدى. بالالار كوڭىلدى, اندەر شىرقاپ, شىرشانى اينالا ويىندار ويناپ, بيلەر بيلەدى. تاۋەلسىزدىك, وتان تۋرالى تاقپاقتار ايتتى. تەرەڭكولدەگى بالالار ۇيىنەن 8 بالا كەلدى. مۇندا تاربيەلەنىپ جاتقان وزگە ەتنوس وكىلدەرىنىڭ بالالارى قازاق تىلىندە ءان ايتىپ, تاقپاقتار وقىپ بەردى. باسقا دا بالالار ۇيلەرىنىڭ ءتاربيەلەنۋشىلەرى ءوز ونەرلەرىمەن كوزگە ءتۇستى. بۇدان كەيىن شاكەن ايمانوۆ اتىنداعى كينوتەاتردا 3 «D» پىشىنىندە «سمەشاريكي» كينوفيلمى كورسەتىلدى.پەتروپاۆلدان – ءومىر ەسقالي.
پرەزيدەنتتىڭ جاڭا جىلدىق شىرشاسى پوگودين اتىنداعى ورىس دراما تەاترىندا اتالىپ ءوتتى. وعان قاتىسۋ قۇرمەتىنە اتا-انانىڭ قامقورلىعىنسىز قالعان 200 بالا يە بولدى. «تاۋەلسىزدىك – التىن بەسىگىمىز» دەگەن تاقىرىپتا وتكەن جيىندى تاماشالاۋشىلار ەلباسى نۇرسۇلتان نازارباەۆتىڭ جاڭا جىلدىق قۇتتىقتاۋىن ەرەكشە ىنتامەن تىڭداعاننان كەيىن بال كەشىن قىزىقتاۋعا كىرىستى. ەرتەگىلەر ەلىنە ساياحاتتاپ, نەشە ءتۇرلى وقيعالاردى باستان كەشتى. ساتتىلىككە جەتكەندەرىنە قۋانىستى. بالالاردىڭ قۋانىشىنا وبلىس اكىمى سەرىك ءبىلالوۆ تە ورتاقتاسىپ, يگى تىلەگىن جەتكىزدى. پرەزيدەنتتىڭ جاڭا جىلدىق سىيلىقتارىن سالتاناتتى جاعدايدا تابىستادى. كارناۆالدىق كوستيۋمدەر كونكۋرسى قورىتىندىلانىپ, شوپتىكول كوررەكتسيالىق مەكتەپ-ينتەرناتىنىڭ 5 سىنىپ وقۋشىسى دانيار يسمايلوۆ گران-ءپريدى ۇتىپ الدى. ايىرتاۋ اۋداندىق جانە وبلىستىق جەتىم بالالار ۇيلەرىنىڭ تاربيەلەنۋشىلەرى نافيسا يۆانوۆا مەن سوفيا پيسالەۆا ءبىرىنشى ورىندى يەلەندى. جەڭىمپازدار مەن جۇلدەگەرلەر باعالى سىيلىقتارعا يە بولدى.تارازدان – كوسەمالى ساتتىباي ۇلى.
پرەزيدەنتتىڭ جامبىل وڭىرىندەگى جاڭا جىلدىق شىرشاسىنا وبلىستىڭ بارلىق اۋداندارى مەن تاراز قالاسىنان 200 بالا قاتىستى. ولاردىڭ 58-ءى كوپ بالالى, 99-ى از قامتاماسىز ەتىلگەن وتباسىلاردان بولسا, 22 بالا جەتىم, ال 21 بالا اتا-انالارىنىڭ قامقورلىعىنسىز قالىپتى. اتا-انالارى مۇگەدەك بۇلدىرشىندەر دە بار. بىراق بۇعان قاراپ بەيكۇنا سابيلەردى باقىتسىز دەۋگە بولمايدى. ويتكەنى, ولار وتان-اناسى باردا ومىردەن وگەيلىك كورمەك ەمەس. سوندىقتان بولار, بالالاردىڭ جاڭا جىلدىق مەرەكەسىن بار مازىرىمەن كوڭىلدى وتكىزۋ ءۇشىن جەرگىلىكتى بيۋدجەتتەن 13 ميلليون 362 مىڭ 200 تەڭگە ءبولىنىپتى. وسىنداي قامقورلىقتىڭ ارقاسىندا پرەزيدەنت شىرشاسىنىڭ تاڭعاجايىپتارىن تاماشالاۋعا كەلگەن بالالاردىڭ ارقايسىسىنا 60 مىڭ 300 تەڭگە كولەمىندەگى سىيلىقتار تاپسىرىلدى. ولاردىڭ ىشىندە بالالاردىڭ شولاق تونى, سپورتتىق باس كيىم مەن اياق كيىمدەر, ءتۇرلى وقۋ قۇرالدارى سالىنعان سومكە, جۇمساق ويىنشىقتار مەن تاتتىلەر بار. پرەزيدەنت شىرشاسىنا الىستان كوڭىلدەرى الابۇرتىپ جەتكەن بالالار ءوزدەرىنە ارنالعان مادەني باعدارلامالاردى تاماشالاپ, «ەۋرازيا» ويىن-ساۋىق ورتالىعىنداعى ويىندارعا قاتىستى. وبلىستىق دراما تەاتردىڭ ارتىستەرى دايىنداعان قويىلىمدى قىزىقتادى. سونداي-اق, ولكەتانۋ مۋزەيىندەگى تاريحي جادىگەرلەرمەن تانىسىپ, قازاقستان رەسپۋبليكاسىنىڭ تۇڭعىش پرەزيدەنتى اتىنداعى ساياباقتا سەرۋەن قۇردى.تالدىقورعاننان – كۇمىسجان بايجان.
ەلباسىنىڭ جاڭا جىلدىق شىرشاسىنا جەر-جەردەن الەۋمەتتىك جاعىنان جەتكىلىكسىز قامتىلعان وتباسىلارىنداعى وزات وقۋشىلار قاتىستى. بيىك, ءارى اسەم بەزەندىرىلگەن شىرشا سالتاناتى ب. ريموۆا اتىنداعى دراما تەاتر ءارتىستەرىنىڭ مەرەكەلىك باعدارلاماسىمەن باستالدى. مەملەكەت باسشىسىنىڭ بالالارعا ارناعان اقجارقىن تىلەگى كەڭ ەكراننان تاماشالاندى. وسى قۋانىشتى ءساتتى ەلىمىزدىڭ تۇپكىر-تۇپكىرىندەگى جاڭا جىلدىق شىرشانى تاماشالاعاندار ءبىر مەزەتتە تىڭداۋعا مۇمكىندىك العانى ءبىر عانيبەت. ەلباسىنىڭ قۇتتىقتاۋىنان كەيىن وبلىس اكىمى انزار مۇساحانوۆ ءدال قازىر ەلباسىنىڭ وزدەرىڭە دەگەن ىستىق لەبىزىن تىڭداپ, مەرەيلەندىڭدەر, دەدى. قاي كەزدە دە بىزگە تاۋەلسىزدىكتەن اسقان باقىت جوق. سەندەر ەركىن ەلدىڭ ۇلانىسىڭدار. دەمەك, ەلىمىزدىڭ كەلەشەگىنە ۇلەس قوساتىن ازامات بولۋلارىڭ كەرەك. ەلباسىنىڭ وزدەرىڭنىڭ وقىپ, ءبىلىم الۋلارىڭا جاساعان قامقورلىعى زور. باسەكەگە قابىلەتتى ءبىلىم الىپ, تاربيەلى ازامات بولىڭدار. بالالارعا ەلباسىنىڭ اتىنان وبلىس باسشىسى قىستىق كيىم, جاڭا جىلدىق بازارلىق تاراتتى. بالالار مۇنداي جاقسىلىققا العىس ايتىپ, ۇمىتتەرىن اقتايتىنىن جەتكىزدى. اياز اتا مەن اقشاقار دا كەلدى. اياز اتا جاسىل شىرشا جانىنداعى دۋماندى قىزدىرىپ, جاڭا جىل – ۇلۋ ورتاعا شاقىرىلدى. ۇلۋ جىلى تەك جاقسىلىق بولاتىنىن جەتكىزدى. ءان ايتىلىپ, بي بيلەنىپ, بازارلىققا كەنەلگەندەر اننەن شاشۋ شاشتى. سپورت كەشەنىندە بۇدان سوڭ ەلباسى شىرشاسىن تالدىقورعان قالاسىنداعى وزات وقۋشىلار جالعاستىرىپ اكەتتى. بازارلىق العاندار «ەلباسىنا العىس ايتامىز, وقۋدا وزات, تاۋەلسىز ەلدىڭ نۇرلى بولاشاعىنا ۇلەس قوسامىز» دەگەن كوڭىل-كۇيمەن مەرەكە شىرايىن كىرگىزدى.شىمكەنتتەن – باقتيار تايجان.
بالالاردىڭ جاڭا جىلدىق تاماشاسى – پرەزيدەنت شىرشاسىنا ارنالعان سالتانات ەلىمىزدەگى ءبىر پارتيانىڭ وبلىستىق فيليالىندا ءوتتى. ورتادا – شىرشا. وبلىس اكىمى اسقار مىرزاحمەتوۆ ءبىر ءبۇلدىرشىندى كوتەرىپ بارىپ, شىراعدانىن جاقتى. سودان كەيىن-اق جاڭا جىل قىزىعى باستالىپ كەتكەن. اياز اتا, اقشاقار, ەرتەگىلەر ەلىنەن كەلگەن كەيىپكەرلەر كەڭ زالدى دۋمانعا بولەدى. ۇلكەن ەكراننان ەلباسىنىڭ قۇتتىقتاۋى تىڭدالدى. دارىندى بالالارعا سىيلىقتار تاپسىرىلدى. – سىزدەردىڭ ءبىلىمدى, بيىك پاراساتتى ازامات بولىپ ءوسىپ, الەمدە باسەكەگە قابىلەتتى بولىپ جەتىلۋلەرىڭىزگە مەملەكەت كوپتەگەن يگىلىكتەر اتقارۋدا, –دەدى وبلىس اكىمى اسقار مىرزاحمەتوۆ. – وبلىسىمىزدا ەلىمىز تاۋەلسىزدىك العان 20 جىلدىڭ ىشىندە 225 مەكتەپتىڭ قۇرىلىسى سالىنىپ, پايدالانۋعا بەرىلدى. وبلىستا 2005 جىلى مەكتەپكە دەيىنگى ۇيىمداردىڭ سانى 117 بولسا, 2011 جىلى قورىتىندىسىمەن جالپى 88425 بالانى قامتيتىن 904 مەكتەپكە دەيىنگى ۇيىمدار جۇمىس ىستەۋدە. مەملەكەت الدىندا تۇرعان اۋقىمدى مىندەتتەردى الداعى ۋاقىتتا جۇزەگە اسىرۋ جاس ۇرپاققا جۇكتەلىپ, ۇلكەن ءۇمىت ارتىلىپ وتىر. سوندىقتان دا جاقسى وقىپ, باسەكەگە قابىلەتتى بولۋ ءۇشىن تەرەڭ ءبىلىم الىڭىزدار. تاۋەلسىزدىكتى قاستەرلەي بىلەتىن, ءوز وتانىن جانىنداي سۇيەتىن ەلىمىزدىڭ ناعىز پاتريوتى بولىپ وسىڭىزدەر. ءبىزدىڭ جاسامپاز ەلىمىزگە ەڭسەسى بيىك, ورەسى كەڭ, دەنى ساۋ, كەمەلدەنگەن اقىل-ويلى, پاراساتتى جاستار قاجەت. سىزدەردىڭ ارقايسىڭىزدىڭ وسىنداي ازامات بولاتىندارىڭىزعا سەنىمىم مول, دەدى وبلىس باسشىسى ءسوزىنىڭ تۇيىنىندە.
