جاس سايلاۋشىلارمەن جۇزدەستى

قازاقستان پارلامەنتى ءماجىلىسىنىڭ دەپۋتاتتىعىنا قازاقستان كوممۋنيستىك حالىقتىق پارتياسىنان ۇمىتكەر, قكحپ اقتوبە وبلىستىق كوميتەتىنىڭ ءبىرىنشى حاتشىسى جانات مولداشەۆ پەن قكحپ-دان اقتوبە وبلىستىق ءماسليحاتى دەپۋ­تاتتىعىنا كانديدات بوتا جۇماعۇلوۆا ساز كوللەدجىنىڭ اكت زالىندا اقتوبە قا­لاسىنىڭ سايلاۋشىلارىمەن كەزدەستى. ج.مولداشەۆ قازاقستان كوممۋنيستىك حالىقتىق پارتياسىنىڭ سايلاۋالدى تۇعىرناماسى مەن باعدارلاماسى تۋ­را­لى ەگجەي-تەگجەيلى اڭگىمەلەدى. ۇمىتكەر ءبىرىنشى كەزەكتە جاستارعا قاتىستى پروب­لەمالارعا توقتالدى. اتاپ ايت­قان­دا, ول تەگىن جانە ساپالى ءبىلىم بەرۋ, جوعارى جانە ورتا ارناۋلى وقۋ ورىندارىن بىتىرگەن جاستاردىڭ كەپىلدى تۇردە جۇمىسقا ورنالاسۋى, وسكەلەڭ ۇرپاقتى گۋمانيزم مەن پاتريوتيزم قۇندىلىقتارى نەگىزىندە تاربيەلەۋ ماسەلەلەرىن قوزعادى. – سەندەر وقۋ ورنىن بىتىرگەننەن كەيىن قايدا جۇمىس ىستەيتىندەرىڭدى بىلە­سىڭدەر مە؟ – دەپ سۇرادى دەپۋتاتتىققا كانديدات ستۋدەنتتەردەن. – جوق, – دەپ جاۋاپ بەردى جاس­تاردىڭ كوپشىلىگى. – ءبىزدىڭ كوممۋنيستىك حالىقتىق پار­تيا سەندەر بولاشاقتان قورىقپاي, كەرىسىنشە, وعان سەنۋ ءۇشىن, ۇمىتتەنۋ ءۇشىن الەۋمەتتىك كەپىلدىكتەرگە قول جەتكىزۋگە ۇمتىلاتىن بولادى. ياعني, ءبىز ماجىلىسكە وتسەك, سەندەردىڭ مىندەتتى تۇردە جۇمىسپەن قامتاماسىز ەتىلىپ, مەم­لەكەتتىك باعدارلاما بويىنشا تۇر­عىن ءۇي الۋلارىڭ, ۇل-قىزدارىڭنىڭ بالالار باقشاسى مەن ياسليلەرگە بارۋ­لا­رى, اتا-انالارىڭنىڭ لايىقتى زەينەت­اقى­عا قول جەتكىزۋلەرى ءۇشىن جۇمىس ىستەيتىن بولامىز, – دەدى جانات ءاب­دىعالي ۇلى. تۇرعىنداردىڭ قازىرگى تاڭدا الەۋ­مەتتىك جاعدايىن جاقسارتۋ قاجەتتىگى جونىندە اڭگىمەلەي كەلە, بوتا ەرمەك­قىزى بىلاي دەدى: – قازاقستان كوممۋنيستىك حالىقتىق پارتياسىنىڭ وكىلى رەتىندە مەن سەندەردى پارتيانىڭ باعدارلاماسى ەلدىڭ الەۋ­مەتتىك احۋالىن تۇبىرىمەن وزگەرتۋگە قابىلەتتى ەكەنىنە سەندىرگىم كەلەدى. قازاقستان كوممۋنيستىك حالىقتىق پارتياسىنىڭ اقتوبە وبلىستىق كوميتەتىندەگى سايلاۋالدى شتابىندا اقتو­بە قالاسىنىڭ كومسومول بەلسەندى-ۇگىت­شى­لەرى, مۋزىكانتتار مەن انشىلەر پاي­دالاناتىن ۇگىت پويىزى جۇمىس ىستەۋدە. قازاقستاننىڭ كوممۋنيستىك حالىقتىق پارتياسىنىڭ نىشان-بەلگىلەرىمەن, پلا­كاتتارىمەن بەزەندىرىلگەن ۇگىت پوي­ى­زى جۇرتشىلىقتىڭ نازارىن بىردەن وزىنە اۋدارۋدا. پويىز قازىردىڭ وزىندە اقتوبە وب­لى­سىنىڭ قارعالى اۋدانىنىڭ ورتا­لى­عى – بادامشا كەنتىندە, مارتوك اۋدا­نى­نىڭ 11 سايلاۋ ۋچاسكەسىندە بولىپ ءۇل­گەردى. سايلاۋ ۋچاسكەلەرىندەگى ادام­دارعا قكحپ-نىڭ باعدارلاماسى مەن تۇعىرناماسى, پلاكاتتار مەن كۇنتىز­بەلەر ۇلەستىرىلىپ بەرىلدى. بۇدان باسقا, اۋىلداعى سايلاۋ­شى­لارمەن جەكە-جەكە كەزدەسۋلەر وتكىزىلىپ, ولارعا دا حالىقشىل كوممۋنيستەردىڭ سايلاۋالدى قۇجاتتارى تاراتىلدى. جاقىن كۇندەرى ۇگىت پويىزى وب­لىس­تىڭ ايتەكە بي, حرومتاۋ, مۇعالجار جانە العا اۋداندارىندا بولادى. جىلقىباي جاعىپار ۇلى.  اقتوبە وبلىسى.