1 قازان – حالىقارالىق قارتتار كۇنى. قازاقستاندا دا جىل سايىن بۇل كۇن قارتتارىمىزدىڭ عۇمىر بويى ىستەگەن ەڭبەكتەرىنە ءارى مەملەكەتىمىزدىڭ قالىپتاسۋىنا قوسقان زور ۇلەستەرىنە ساي سىي-قۇرمەت كورسەتىلەدى. بيىل دا مەرەيلى مەرەكە ءوز دەڭگەيىندە اتالىپ وتىلمەك. ءداستۇرلى جيىنداردان بولەك ەلىمىزدەگى ارداگەرلەر ۇيىمى 1 قازان – حالىقارالىق قارتتار كۇنىنە وراي «قارتتارىم – اسىل قازىنام» اتتى قايىرىمدىلىق اكتسياسىنا شاقىراتىن ۇندەۋ جاريالاپ وتىر.
قاشاندا ۇلكەندى سىيلاۋ, قاريانى قۇرمەتتەۋ ءداستۇرى – قازاق حالقىنىڭ اتا سالتى ەكەنى بەلگىلى. ەلىمىزدە قارت ادامدارعا دەگەن ىقىلاس جىل سايىن ارتىپ, مەملەكەت تاراپىنان ولارعا كورسەتىلەتىن كومەكتىڭ كولەمى دە ۇلعايىپ كەلەدى.
ء«اربىر ازاماتتىڭ قارتايعان كەزىندەگى ءومىرىن لايىقتى ەتۋ – مەملەكەتىمىزدىڭ الەۋمەتتىك ساياساتىنىڭ باستى باعىتتارىنىڭ ءبىرى. وسىنىڭ ايقىن دالەلى رەتىندە مەملەكەت باسشىسى نۇرسۇلتان نازارباەۆتىڭ جىل سايىنعى حالىققا ءداستۇرلى جولداۋىندا كوتەرىلگەن مىندەتتەردىڭ ءبىرى زەينەتاقى مولشەرى جىلدان-جىلعا ارتىپ كەلەدى. ەكىنشى دۇنيەجۇزىلىك سوعىس ارداگەرلەرىنە بەرىلەتىن ارنايى مەملەكەتتىك جاردەماقىنىڭ مولشەرى دە ۇلعايدى. قارتتار ءۇشىن مەملەكەت تاراپىنان كورسەتىلىپ وتىرعان يگىلىكتى ىستەر ءالى دە جالعاسا بەرمەك», دەيدى ورتالىق كەڭەس توراعاسىنىڭ ورىنباسارى بەكبولات مۇقىشەۆ.
دەي تۇرعانمەن, جاستىق شاعىن ەلىمىزدىڭ گۇلدەنۋى مەن وركەندەپ دامۋىنا ارناپ, ماڭداي تەرىن توككەن اتالار مەن اجەلەرگە قۇرمەت كورسەتۋ تەك مەملەكەت تاراپىنان عانا ەمەس – بۇگىنگى جاس بۋىننىڭ باستى پارىزى ەكەنىن دە ۇمىتپاعان ءجون.
ۇندەۋدىڭ ىشىندە وسى باعىتتا, ياعني كومەككە مۇقتاج قارتتارىمىزدى جاستار بولىپ قامقورلىققا الۋ جايلى ايتىلادى. حالقىمىزدا «جۇمىلا كوتەرگەن جۇك جەڭىل» دەگەن جاقسى ماقال بار. بارشاڭىزدى 1 قازان – حالىقارالىق قارتتار كۇنىنە وراي, ءوز وڭىرلەرىڭىزدەگى ارداگەرلەر ۇيىمدارىمەن بايلانىس جاساپ, حالقىمىزعا ءتان ادامگەرشىلىكپەن قامقورلىققا ءزارۋ ادامدارعا كومەك كورسەتۋگە شاقىرامىز. جۇمىلا قيمىلداپ, ەلدىگىمىزدى كورسەتەيىك, ارداگەرلەرىمىزدى ارداقتايىق» دەلىنگەن ۇندەۋدە.
بيىل ناۋرىز ايىنىڭ باسىندا ەلباسىمىز ۇلتتىڭ الەۋمەتتىك جاڭعىرۋ جولىندا جاڭا, اۋقىمدى قادام جاساۋعا شاقىرىپ, بەس الەۋمەتتىك باستامادان تۇراتىن ۇندەۋىن جاريالاعانى بەلگىلى. ولاردىڭ قاتارىندا باسپانا الۋدىڭ جاڭا مۇمكىندىكتەرى, جالاقىسى تومەن جۇمىسشىلاردىڭ سالىق جۇكتەمەسىن ازايتۋ, جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ, شاعىن نەسيە بەرۋدى كوبەيتۋ, ەلدى گازبەن قامتاماسىز ەتۋ ماسەلەلەرى بار. قازىرگى ۋاقىتتا ۇكىمەتتە پرەزيدەنتتىڭ بەس الەۋمەتتىك باستاماسىن ىسكە اسىرۋ جونىندە جول كارتاسى قابىلدانعان. مۇنى ايتىپ وتىرعان سەبەبىمىز, نەگىزگى جۇمىستاردىڭ بارلىعى «مەملەكەتتىڭ بولاشاعى – جاستار, ەل ەرتەڭىنە كەلەشەك كەپىل» دەگەن باعىتتا جۇرگىزىلىپ كەلەدى. الايدا وسى قوعامنىڭ ىرگەتاسىن نىعايتۋ ءۇشىن بۇگىنگى جاس بۋىنعا ۇزدىك ۇلگىلى, ونەگەلى تاربيە, ەلجاندىلىققا باۋلۋ سياقتى مورالدىق نورمالاردىڭ باستاۋىندا قازىنالى قارتتارىمىزدىڭ تۇرعانىن ارقاشان ەستە ۇستاۋىمىز قاجەت. سونىمەن قاتار ەلىمىزدىڭ جاس ازاماتىن وتانسۇيگىشتىككە تاربيەلەۋ مەن بەلسەندى ءومىر ۇستانىمىن قالىپتاستىرۋدا دا ارداگەر اتا-اپالارىمىزدىڭ ءومىرى مەن ەڭبەك جولدارى ۇلگى.
جوعارىدا ۇندەۋدە ايتىلعانداي, قايىرىمدىلىق اكتسياسىنا ءوز ۇلەسىمىزدى قوسىپ, قارتتارعا قولقانات بولۋدى ارقايسىمىز وزىمىزگە بورىش ساناۋىمىز كەرەك.
ميراس اسان,
«ەگەمەن قازاقستان»
