ءىس-شاراعا ۇلتتىق ەكونوميكا جانە اۋىل شارۋاشىلىعى مينيسترلىكتەرىنىڭ, «بايتەرەك» ۇبح» اق, «سامۇرىق-قازىنا» ۇاق» اق, «Kazakh Invest» اق, «اتامەكەن» ۇلتتىق كاسىپكەرلەر پالاتاسى, نازارباەۆ ۋنيۆەرسيتەت, «استانا» حالىقارالىق قارجى ورتالىعىنىڭ رەسمي وكىلدەرى, مەملەكەتتىك ساۋدا ۇيىمدارىنىڭ جانە ەكى ەلدىڭ ءىرى كومپانيالارىنىڭ باسشىلارى قاتىستى.
وتىرىس بارىسىندا كەڭەسكە قاتىسۋشىلار قازاقستاندا بيزنەس جۇرگىزۋ مۇمكىندىكتەرى تۋرالى تاجىريبەلەرىمەن جانە ويلارىمەن ءبولىستى. سونىمەن بىرگە قازاقستاننىڭ بيزنەستى قولداۋعا, ينۆەستيتسيالاردى قورعاۋعا, وتاندىق جانە شەتەلدىك كومپانيالاردىڭ تەڭ جاعدايلارىن قامتاماسىز ەتۋگە ارنالعان قارجى قۇرالدارىن جەتىلدىرۋگە باعىتتالعان ساياساتىنا ەرەكشە نازار اۋدارىلدى.
كەزدەسۋ بارىسىندا قازاقستان تاراپىنان ىسكەرلىك كەڭەستىڭ تەڭ توراعاسى, «بايتەرەك» ۇبح» اق باسقارما توراعاسى ايدار ءارىپحانوۆ اتاپ وتكەندەي, «قازاقستان-يسپانيا» ىسكەرلىك كەڭەسى شەڭبەرىندەگى كەلىسسوزدەرگە 40-تان استام يسپانيالىق جانە 60 قازاقستاندىق كومپانيا قاتىستى.
– قازاقستان نارىعىندا كوپتەن بەرى جۇمىس ىستەپ كەلە جاتقان بىرقاتار يسپانيالىق كومپانيالار بار. ءبىزدىڭ مىندەتىمىز – قازاقستانعا جاڭا كومپانيالار تارتۋ جانە ساۋدا سالاسىنداعى ىنتىماقتاستىقتى نىعايتۋ. سونىمەن قاتار بىرلەسكەن كاسىپورىندار قۇرۋ جانە بىرلەسكەن جوبالاردى, اسىرەسە مەملەكەت-جەكەمەنشىك ارىپتەستىگىنە قاتىستى جوبالاردى جۇزەگە اسىرۋ بولىپ تابىلادى, دەدى ىسكەرلىك كەڭەستىڭ 5-ءشى وتىرىسىندا قازاقستان-يسپانيا ۇكىمەتارالىق كوميسسياسىنىڭ تەڭ توراعاسى, يسپانيانىڭ ساۋدا جونىندەگى مەملەكەتتىك حاتشىسى كسيانا مەندەس.
ىسكەرلىك كەڭەس بارىسىندا «بايتەرەك» حولدينگى ەكى مەموراندۋمعا قول قويدى. ونىڭ ءبىرىنشىسى يسپانيا كورولدىگىنىڭ ساۋدا جونىندەگى مەملەكەتتىك حاتشىلىعىمەن يندۋستريالدىق جانە ينفراقۇرىلىمدىق جوبالاردى قولداۋ, ىسكە اسىرۋ جانە بىرلەسىپ ينۆەستيتسيالاۋ سالاسىنداعى ىنتىماقتاستىققا باعىتتالعان. ەكىنشى مەموراندۋم, يسپانيالىق كومپانيا تاراپىنان ينفراقۇرىلىم, تەلەكوممۋنيكاتسيا, تۋريزم, اگروونەركاسىپ جانە «جاسىل ەنەرگەتيكا» سالالارىنداعى ەكسپورتتىق شارالار ىنتىماقتاستىعىنا باعىتتالعان COFIDES-ءتى دامىتۋدى قارجىلاندىرۋ بولىپ تابىلادى.
سونىمەن قاتار فورۋم شەڭبەرىندە «Kazakhstan Project Preparation Fund» جشس («بايتەرەك» حولدينگىنىڭ ەنشىلەس ۇيىمى») جانە «ە-جاسىل» جشس قازاقستان اۋماعىنداعى قوقىس وڭدەيتىن زاۋىتتار قۇرىلىسى سالاسىنداعى يسپانيالىق تاراپپەن ىنتىماقتاستىققا باعىتتالعان ءوزارا تۇسىنىستىك تۋرالى مەموراندۋمعا قول قويىلدى. وسى مەموراندۋم اياسىندا ەلىمىزدىڭ اۋماعىندا جالپى قۇنى 150 ميلليون ەۋرو بولاتىن قوقىس وڭدەيتىن 9 نىسان سالىنباق.
جىلقىباي جاعىپار ۇلى,
«ەگەمەن قازاقستان»
