استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «الاش» مادەنيەت جانە رۋحاني دامۋ ينستيتۋتى كورنەكتى الاش قايراتكەرى, عالىم, العاشقى ماتەماتيكا وقۋلىعى اۆتورلارىنىڭ ءبىرى ءا.ەرمەكوۆتىڭ تۋعانىنا 120 جىل تولۋىنا وراي «تاۋەلسىز قازاقستان جانە ءالىمحان ەرمەكوۆ مۇراسى» اتتى عىلىمي-پراكتيكالىق كونفەرەنتسيا وتكىزدى. عىلىمي جيىندى ۇيىمداستىرۋشىلار الاش وردانىڭ جانە قازاق زيالىلارىنىڭ ۇلت تاريحىنداعى, تاۋەلسىزدىك پەن ءبىلىم-عىلىم باستاۋىنداعى ميسسياسىن قايراتكەر, عالىم ءا.ەرمەكوۆتىڭ مۇراسى ارقىلى زەردەلەۋدى ماقسات ەتكەن. كونفەرەنتسياعا اكادەميك مۇحتارباي ءوتەلباەۆ, ادام قۇقىقتارى ءجونىندەگى وكىل اسقار شاكىروۆ, جازۋشى الدان سمايىل, ۇلتتىق مۇراعاتتىڭ باس ديرەكتورى مارات ابسەمەتوۆ جانە باسقا دا عالىمدار مەن ماماندار قاتىسىپ, بايانداما جاسادى. تانىمال عالىمداردىڭ ءتاۋەلسىزدىك ءۇشىن كۇرەسكەن, قازاق جەرىنىڭ تۇتاستىعىن بولشەۆيكتەر كوسەمى ۆ.ي. لەنيننىڭ الدىندا ءدالەلدەي العان ازامات-تۇلعا تۋرالى جان-جاقتى ويلارى ەلوردا زيالىلارىنا, ستۋدەنت قاۋىمىنا ەرەكشە اسەر ەتتى.
شارا بارىسىندا ءالىمحان ەرمەكوۆتىڭ نەمەرەسى ولەگ ماعاۋيا ۇلى باستاعان الاش تۇلعالارىنىڭ ۇرپاقتارى ەستەلىكتەر ايتتى. قايراتكەر ءسوزىنىڭ ءتۇپنۇسقا ءماتىنى حاتتالعان اۋديوجازبا تىڭدالىندى.
عىلىمي جيىن قورىتىندىسىندا الاش قايراتكەرى, العاشقى ماتەماتيكتەردىڭ بىرەگەيى ءا.ەرمەكوۆتىڭ اتى مەن ەڭبەگىن رەسپۋبليكا جانە ەلوردا كولەمىندە ۇلىقتاۋ, ەسكە الۋ تۋرالى قارار قابىلداندى.
«ەگەمەن-اقپارات».
